1 ¹ Худонинг иродаси бўйича Исо Масиҳнинг ҳаворийси бўлган Повул ва биродарингизТимўтийдан ² Колоса шаҳридаги Исо Масиҳда бўлган муқаддас ва содиқ биродарларга: ³ Отамиз Худодан ва Раббимиз Исо Масиҳдан сизларга иноят ва тинчлик бўлсин! Биз доимо сизлар учун ибодат қилиб, Худога – Раббимиз Исо Масиҳнинг Отасига шукрона айтяпмиз, ⁴ чунки биз Исо Масиҳга бўлган имонингиз ва барча муқаддасларга кўрсатган севгингиз ҳақида эшитдик. ⁵ Буларга эса сизлар осмонда сақлаб қўйилганига бўлган умид туфайли эгасизлар. Бу мерос ҳақида сизлар аввал ҳақиқат Сўзида, яъни Хушхабарда эшитган эдингизлар. ⁶ Ана шу Хушхабар сизларга етиб борганидай, бутун дунё бўйлаб ҳам ёйилмоқда ва Худонинг инояти ҳақидаги ҳақиқатни эшитган ҳамда уни таниб билган кунингиздан бошлаб ҳосил келтириб улғаймоқда. ⁷ Севикли ҳамкоримиз ва Масиҳнинг сизлар учун содиқ хизматкори бўлган Эпафрасдан сизлар ҳам шундай таълим олгансизлар. ⁸ У Руҳдаги севгингиз ҳақида бизга хабар қилди. ⁹ Шунинг учун биз бу ҳақида эшитган кунимиздан бери сизлар учун тўхтамасдан илтижо қиляпмиз ва сизлар ҳар қандай доноликда ҳамда руҳий фаҳм-идрокда Худонинг иродасининг билимига тўлган бўлишингиз учун ибодат қиляпмиз, ¹⁰ токи сизлар Раббингизга муносиб яшаб, ҳамма нарсада Уни рози қилинглар ва ҳар қандай эзгу ишда ҳосилдор бўлиб, Худони таниб билишда улғайинглар. ¹¹ Унинг шуҳратининг қудрати бўйича бор қувват билан кучайинглар. Ҳамма нарсага сабр-тоқат ва қувонч билан чидаб, ¹² Отамиз Худога миннатдорчилик билдиринглар. Чунки У муқаддасларнинг нурда бўлган меросида қатнашишимиз учун бизга имконият берди. ¹³ У бизни зулмат ҳукмронлигидан халос қилиб, севимли Ўғлининг Шоҳлигига олиб кирди. ¹⁴ Биз Масиҳда Унинг қони билан қайта сотиб олинишга ва гуноҳларимизнинг кечирилишига эгамиз. ¹⁵ Исо Масиҳ бутун мавжудотнинг тўнғичи бўлиб, кўринмас Худонинг тасвиридир. ¹⁶ Чунки самодаги ва ер юзидаги, кўринадиган ва кўринмайдиган ҳамма нарса У орқали яратилган. Тож-тахтлар, ҳукмронликлар, бошлиқлар, ҳокимиятларнинг ҳаммаси У орқали ва У учун яратилган. ¹⁷ Масиҳ ҳамма нарсадан аввал бўлган ва ҳамма нарса У билан турибди. ¹⁸ Масиҳ – Жамоат Танасининг бошидир. У – бошланишдир, ўликлардан тўнғичидир, токи ҳамма нарсада биринчиликка эга бўлсин. ¹⁹ Худо бор тўла-тўкисликнинг Масиҳда жо бўлишини ²⁰ ва У орқали бутун борлиқни Ўзи билан яраштиришни, яъни хочдаги қон орқали осмондаги ҳамда ер юзидагилар билан сулҳ тузишни хуш кўрди. ²¹ Сизлар ҳам ёмон ишлар қилишда фикр юритишингиз бўйича бир вақтлар Худога бегона ва душман эдингизлар. ²² Энди эса сизларни Ўз ҳузурида муқаддас, бенуқсон ва айбсиз ҳолда тақдим қилиш учун Худо Масиҳнинг инсоний танасида, Унинг ўлими орқали сизларни Ўзи билан яраштирди, ²³ фақатгина сизлар имонда мустаҳкам ва тебранмас бўлиб турсангизлар ҳамда эшитган Хушхабар орқали келган умидингиздан чекинмасангизлар бас. Мен – Повул осмон остидаги барча тирик жонзодга эълон қилинган бу Хушхабарнинг хизматкори бўлдим. ²⁴ Ҳозир эса мен сизлар учун чекаётган азобларимдан қувонмоқдаман ва Масиҳнинг Ўз Танаси, яъни Жамоати учун тортган қайғуларининг танамда бўлган камчиликларини тўлдирмоқдаман. ²⁵ Шундай қилиб, менга сизлар учун топширилган Худонинг идорачилиги бўйича мен Худонинг Сўзини бажаришим учун Жамоатнинг хизматкори бўлдим. ²⁶ Ана шу Сўз ўтган асрлар ва авлодлардан яширинган сир бўлиб, ҳозир эса Унинг муқаддасларига ошкора бўлди. ²⁷ Худо барча халқлар учун бўлган ушбу сирдаги шуҳратнинг нақадар бойлигини Ўзининг муқаддасларига очиб беришга рози бўлди. Бу сир – шуҳратнинг умиди, Масиҳ сизнинг ичингиздалигидир. ²⁸ Биз Уни воизлик қилмоқдамиз. Ҳар бир одамни Худога Исо Масиҳда баркамол тақдим қилиш учун биз ҳар бир одамга ақл киритиб, барча доноликларга ўргатмоқдамиз. ²⁹ Шунинг учун менда қудрат билан амал қилаётган Унинг бақувват ҳаракати бўйича мен меҳнат қилмоқдаман ва курашмоқдаман.