1 ¹ Мен ҳақиқатда севадиган севикли Гайга мен – қариядан салом! ² Эй, севиклигим! Сенинг жонинг муваффақият қозонаётгани каби, сен барча нарсада муваффақият қозонишинг ва соғ-саломат бўлишинг учун ибодат қилмоқдаман. ³ Зеро биродарлар келиб, сенинг содиқлигинг, яъни сенинг ҳақиқатда юрганинг ҳақида гувоҳлик берганларида, мен жуда қувондим. ⁴ Мен учун менинг болаларим ҳақиқатда юрганликларини эшитишдан каттароқ қувонч йўқдир. ⁵ Эй, севиклигим, биродарлар ва мусофирлар учун қилаётган ишларингда сен содиқ йўл тутмоқдасан. ⁶ Улар сенинг севгинг ҳақида Жамоат олдида гувоҳлик бердилар. Агар сен Худога муносиб равишда уларни йўлга кузатиб қўйсанг, яхши йўл тутган бўласан, ⁷ чунки Унинг номи ҳақи мажусийлардан ҳеч нарса олмасдан, улар чиқиб кетдилар. ⁸ Биз ҳақиқатнинг ҳамкорлари бўлишимиз учун бундайларни қўллаб-қуватлашимиз керак. ⁹ Мен Жамоатга ёздим, лекин уларнинг орасида биринчиликни севадиган Диотрефос бизни қабул қилмаяпти. ¹⁰ Шу сабабли, агар мен борсам, унинг бизни ёмон сўзлар билан ҳақоратлаб қилган ишларини эслатиб қўяман. У булар билан ҳам қаноатланмасдан, ўзи ҳам биродарларни қабул қилмаяпти ва қабул қилишни хоҳлаётганларга таъқиқлаб, уларни Жамоатдан қувиб юборяпти. ¹¹ Эй, севиклигим, ёвузликка эмас, балки эзгуликка тақлид қилгин. Ким эзгулик қилса, у Худодандир. Ёвузлик қилувчи эса Худони кўрмаган. ¹² Деметриус ҳақида барчанинг томонидан ҳам, ҳақиқатнинг ўзи томонидан ҳам яхши гувоҳлик берилган. Биз ҳам гувоҳлик берамиз ва сен биласанки, бизнинг гувоҳлигимиз ҳақиқатдир. ¹³ Сенга кўп нарсани ёзмоқчи эдим, аммо пат ва сиёҳ билан ёзишни хоҳламайман. ¹⁴ Шунинг учун сени тезда кўриб, юзма-юз суҳбатлашишга умид қиламан.