1 ¹ Исо Масиҳдаги ҳаёт ваъдасига биноан Худонинг иродаси бўйича Исо Масиҳнинг ҳаворийси бўлган мен, Повул ² севикли ўғлим Тимўтийга Отамиз Худодан ва Раббимиз Исо Масиҳдан иноят, шафқат ва тинчлик тилайман. ³ Мен ота-боболаримдан буён пок виждон билан хизмат қилиб келаётган Худодан миннатдорман, чунки туну кун ўз ибодатларимда сен ҳақингда тинмасдан эслаяпман ⁴ ва сенинг кўз ёшларингни эслаб, қувончга тўлиб-тошишим учун сени кўришни истаяпман. ⁵ Илгари сенинг бувинг Лоисада ҳамда онанг Эвникада бўлган риёсиз имонинг ёдимда бор. Энди у сенда ҳам жо бўлганига аминман. ⁶ Шу сабабдан, қўлларимни қўйишим орқали сенга берилган Худонинг инъомини алангалатиб туришингни сенга эслатяпман. ⁷ Чунки Худо бизга қўрқоқлик руҳини эмас, балки куч-қудрат, севги ва соғлом онг Руҳини берган. ⁸ Шундай қилиб, Раббимиз ҳақида гувоҳлик беришдан ҳам, У учун маҳбус бўлган мендан ҳам уялма, лекин Хушхабар учун бўлган азобларимда Худонинг куч-қудрати билан иштирок этгин. ⁹ Худо бизни савоб ишларимиз бўйича эмас, балки Ўзининг нияти ва инояти бўйича қутқариб, муқаддас даъват билан чақирди. Унинг шу инояти асрлар бошланишидан олдин бизга Исо Масиҳда берилган, ¹⁰ лекин энди Нажоткоримиз Исо Масиҳнинг зоҳир бўлиши билан ошкор бўлди. У эса Хушхабар орқали ўлимни яксон қилиб, ҳаёт ва чиримасликни нурга олиб чиқди. ¹¹ Мана шу учун мен воиз, ҳаворий ва мажусийларнинг муаллими қилиб тайинландим. ¹² Шу сабабдан мен шундай азоб чекмоқдаман, лекин бундан уялмайман. Чунки мен Кимга имон келтирганимни биламан ва аминманки, мен Унга ишониб топширганимни У ўша кунга қадар сақлаб қолишга қодир. ¹³ Мендан эшитган соғлом таълимотнинг намунасини Исо Масиҳдаги имон ва севги билан маҳкам тутгин. ¹⁴ Бизнинг ичимизда яшайдиган Муқаддас Руҳ ёрдами билан сенга топширилган яхши омонатни сақлагин. ¹⁵ Асияликларнинг ҳаммаси, шу жумладан, Фигел билан Ҳермоген ҳам мендан юз ўгирганларини биласан. ¹⁶ Раббий Онисифорнинг уйига раҳм-шафқат ато этсин. Чунки у мени кўп маротаба хотиржам қилди ва менинг занжирларимдан уялмади. ¹⁷ У Рим шаҳрида бўлганида, мени астойдил излаб топди. ¹⁸ Раббий унга ўша кунда Раббийдан раҳм-шафқат топишини ато қилсин. Эфес шаҳрида эса у менга қанча кўп хизмат қилганини сен яхши биласан.