1 ¹ Отамиз Худо ва Раббий Исо Масиҳдаги Салоника шаҳрининг Жамоатига Повул, Силван ва Тимўтийдан: ² Отамиз Худо ва Раббий Исо Масиҳдан сизларга иноят ва тинчлик бўлсин! ³ Ҳақиқатан, биродарлар, биз ҳамиша сизлар учун Худога миннатдорчилик билдиришга мажбурмиз, чунки сизларнинг имонингиз жуда ҳам ўсиб бормоқда ва ҳаммангизнинг бир-бирингизга бўлган севгингиз кўпаймоқда. ⁴ Шу тариқа сизларнинг чидаётган барча қувғинлару қайғуларингиздаги сабр-тоқат ва имонингиз учун биз Худонинг Жамоатларида сизларни мақтамоқдамиз. ⁵ Чидаётган қайғуларингизда Худонинг ҳақ ҳукми бўлишидан далолат бор: сизлар Худо Шоҳлигига лойиқ бўлишингиз учун энди азоб чекмоқдасизлар ⁶ Ҳақиқатан ҳам Худонинг олдида бу ҳақ ишдир: сизларга азоб бераётганларга У азоб билан қайтаради ⁷ ва сиз, азоб чекаётганларни эса Раббий Исо Ўзининг қудратли фаришталари билан осмондан зоҳир бўлганида, биз билан оромга эриштиради. ⁸ Ўшанда У, Худони тан олмаган ва Раббимиз Исо Масиҳнинг Хушхабарига бўйсунмаган ҳамма одамлардан алангали олов билан қасос олади. ⁹ Улар Раббийнинг ҳузуридан ва Унинг куч-қудратининг шуҳратидан абадий ҳалокат билан жазоланадилар. ¹⁰ Барча имонлиларни эса У келган куни ҳайратда қолдиради ва Ўз муқаддаслари орасида улуғланади. Сизлар ҳам бундан баҳраманд бўласизлар, чунки бизнинг гувоҳлигимизга ишондингизлар. ¹¹ Шу сабабдан биз доимо сизлар учун ибодат қилмоқдамиз, токи Худойимиз сизларни даъватига сазовор қилсин ва ҳар қандай эзгу ниятингизни ҳамда сизларнинг имонингизнинг ишини Ўзининг куч-қудратида амалга оширсин, ¹² ва Раббимиз Исо Масиҳнинг номи сизларда улуғлансин, сизлар эса Худойимиз ва Раббимиз Исо Масиҳнинг инояти бўйича Масиҳда улуғланинглар.