1 ¹ Мен ҳақиқатда севадиган, нафақат мен, балки ҳақиқатни билган ҳамма севадиган, Худо томонидан танланган хоним ва унинг фарзандларига мен – қариядан салом! ² Бизда истиқомат қиладиган ва биз билан бирга то абад бўладиган ҳақиқат ҳақи: ³ Ота Худодан ва Отанинг Ўғли Раббий Исо Масиҳдан ҳақиқат ва севгидаги иноят, раҳм-шафқат ва тинчлик сизлар билан бирга бўлсин! ⁴ Биз Отадан олган амрга кўра ҳақиқатда юраётган болаларингнинг бир нечтасини топганим учун мен жуда қувондим. ⁵ Энди эса, эй, хоним, сендан ўтинаманки: сенга гўё янги амрни ёзаётган эмас, балки биз азалдан эга бўлган амр бўйича бир-биримизни севайлик. ⁶ Севги шундан иборатки, биз Унинг амрлари бўйича ҳаракат қилайлик. Бу – сизлар азалдан эшитган амрдир, токи у бўйича ҳаракат қилинглар. ⁷ Зеро танада келган Исо Масиҳни тан олмайдиган кўпгина йўлдан оздирувчилар дунёга келдилар. Бундай одам – йўлдан оздирувчи ва Масиҳнинг муҳолифидир. ⁸ Ўзларингизга эътибор беринглар, токи биз қилган меҳнатимизни йўқотмайлик, балки тўлиқ мукофотни олайлик. ⁹ Чегарадан ташқарига чиқаётган ва Масиҳнинг таълимотида турмайдиган ҳар бир одам Худога эга эмасдир. Масиҳнинг таълимотида турадиган эса Отага ҳам, Ўғилга ҳам эгадир. ¹⁰ Агар кимдир олдингизга келиб, ушбу таълимотни олиб келмаса, ўшани уйга қабул қилманглар ва у билан саломлашманглар, ¹¹ чунки у билан саломлашадиган унинг ёвуз ишларида иштирок этган бўлади. ¹² Сизлар учун кўп нарсага эгаман, лекин сиёҳ билан қоғозга ёзишни хоҳламайман, балки олдингизга бориб, юзма-юз суҳбатлашишга умид қиламан, токи қувончингиз баркамол бўлсин. ¹³ Танланган опангнинг болалари сенга салом йўлламоқдалар. Омин.