1 ¹ Умидимиз Раббий Исо Масиҳнинг ва Нажоткоримиз Худонинг буйруғи бўйича Исо Масиҳнинг ҳаворийси бўлган мен Повул – ² имондаги ҳақиқий ўғлим Тимўтийга Отамиз Худодан ва Раббимиз Исо Масиҳдан иноят, раҳм-шафқат ва тинчлик тилайман. ³ Мен Македонияга кетаётганимда, сен Эфесда қолиб, баъзиларга буюришингни сўраган эдим, токи улар бошқа нарсаларга ўргатмасинлар ⁴ ва афсоналар ҳамда тугамас насл-насабномалар билан машғул бўлмасинлар. Чунки бу нарсалар Худонинг имонни барпо қилишини эмас, балки баҳсларни келтириб чиқаради. ⁵ Насиҳатнинг мақсади эса – пок юракдан, яхши виждондан ва риёсиз имондан бўлган севгидир. ⁶ Баъзилар эса бундан юз ўгириб пуч гапларга оғиб кетдилар. ⁷ Улар қонун муаллимлари бўлишни истаб, нима ҳақида гапираётганларини ва нимани тасдиқлаётганларини ўзлари ҳам тушунмайдилар. ⁸ Биз эса биламизки, агар кимдир Қонундан қонуний фойдаланса, унда Қонун яхшидир. ⁹ Яна биламизки, Қонун ҳақ киши учун берилган эмас, балки қонунбузарлар, итоатсизлар, бетавфиқлар, гуноҳкорлар, муқаддас бўлмаганлар, ҳаромлар, ота-онасини ўлдирувчилар, қотиллар, ¹⁰ фоҳишабозлар, баччабозлар, одам ўғирлаб сотувчилар, ёлғончилар, қасамбузарлар учун берилган, ¹¹ яъни муборак Худонинг менга ишониб топширилган улуғвор Хушхабари бўйича соғлом таълимотга қарши бўлган ҳамма нарса учун Қонун берилган. ¹² Менга куч-қудрат берган Раббимиз Исо Масиҳдан миннатдорман, чунки У мени содиқ, деб ҳисоблаб, хизматга тайинлади. ¹³ Бундан олдин мен ҳақоратловчи ва қувғин қилувчи, жафокор эдим. Лекин мен раҳм-шафқат топдим, чунки буни жоҳилликдаги имонсизлигимда қилган эдим. ¹⁴ Бизнинг Раббимиз Исо Масиҳнинг инояти эса мен учун Исо Масиҳдаги имон ва севги билан мўл-кўл бўлди. ¹⁵ “Исо Масиҳ гуноҳкорларга нажот бериш учун дунёга келди”, деган сўз тўғри ва тўлиқ қабул қилинишга муносибдир. Гуноҳкорларнинг биринчиси эса менман! ¹⁶ Лекин шунинг учун ҳам мен раҳм-шафқат топдимки, Исо Масиҳ биринчи навбатда менда Ўзининг узоқ сабр-тоқатини кўрсата олсин. Бу эса абадий ҳаётга эришиш учун Унга кейинчалик имон келтирадиганларга намуна бўлсин. ¹⁷ Мангу Подшоҳ – ўлмас, кўринмас, яккаю-ягона доно Худога абадулабад ҳурмат ва шон-шуҳрат бўлсин! Омин. ¹⁸ Эй, ўғлим Тимўтий, сен ҳақингда бўлган пайғамбарчиликларга мувофиқ сенга шундай буюраманки, сен уларга биноан яхши уруш услуби билан жанг қилгин ¹⁹ ва имонни ҳамда яхши виждонни маҳкам тутгин. Баъзилар эса яхши виждонни инкор этиб, ўз имон соҳасида кема ҳалокатига учрадилар. ²⁰ Именей ва Искандар ўшалардандир. Улар куфрлик қилмасликни ўргансинлар, деб мен уларни шайтонга топширдим.