1
1
Отамиз Худо ва Раббимиз Исо Масиҳдаги Салоника шаҳрининг Жамоатига Повул, Силван ва Тимўтийдан: сизларга Отамиз Худодан ва Раббий Исо Масиҳдан иноят ҳамда тинчлик бўлсин.
2
Ибодатларимизда сизларни эслаб, ҳаммаларингиз учун Худога доимо миннатдорчилик билдиряпмиз.
3
Отамиз Худо ҳузурида бўлган сизларнинг имонингизнинг фаолиятини, севгингизнинг меҳнати ва Раббимиз Исо Масиҳга боғланган умидингизнинг сабр-тоқатини тинимсиз эслаб турибмиз.
4
Эй, Худо севган биродарларимиз, биз сизларнинг танланганлигингизни биламиз.
5
Чунки сизларга Хушхабар воизлигимиз фақатгина сўзда эмас, балки куч-қудратда, Муқаддас Руҳда, кўп далилларда етиб борди. Биз орангизда бўлганимизда, сизлар ҳақи қандай бўлганимизни ўзларингиз биласизлар.
6
Сизлар кўп қайғулар орасида Муқаддас Руҳнинг қувончи билан Сўзни қабул қилиб, бизга ва Раббийга тақлидчи бўлдингизлар.
7
Шундай қилиб, сизлар Македония ва Ахаядаги ҳамма имонлилар учун ўрнак бўлдингизлар.
8
Раббийнинг Сўзи сизлардан нафақат Македония ва Ахая бўйлаб овоза бўлди, балки сизларнинг Худога бўлган имонингиз барча жойга тарқалди. Шунинг учун бизнинг бирор нарса дейишимизга ҳожат йўқ.
9
Чунки эшитганларнинг ўзлари булар ҳақида айтиб бермоқдаларки, сизлар бизни яхши қабул қилдингизлар ва бутлардан Худога ўгирилдингизлар. Энди сизлар барҳаёт ва ҳақиқий Худога хизмат қилаётиб,
10
Худонинг ўликлардан тирилтирган Ўз Ўғли – Исо Масиҳни осмондан кутяпсизлар. У эса бизни келаётган ғазабдан халос қилади.