1 ¹ Бошидан бор бўлган, биз эшитган, ўз кўзимиз билан кўрган, биз синчиклаб қараган ва ўз қўлларимиз билан ушлаб сезган Ҳаёт Сўзи ҳақида сизларга ёзмоқдамиз. ² Чунки Ҳаёт зоҳир бўлди ва биз уни кўрдик. Ота билан турган, бизга эса зоҳир бўлган ўша абадий Ҳаёт ҳақида сизларга гувоҳлик бериб хабар қилмоқдамиз. ³ Сизлар биз билан мулоқотда бўлишингиз учун ўзимиз кўрган ва эшитганларимиз ҳақида сизларга хабар бермоқдамиз. Бизнинг мулоқотимиз эса Ота ва Унинг Ўғли Исо Масиҳ биландир. ⁴ Қувончингиз мукаммал бўлиши учун буни сизларга ёзмоқдамиз. ⁵ Биз Ундан эшитган ва сизларга энди хабар қилаётган Хушхабар шуки: Худо – нур ва Унда ҳеч қандай қоронғилик йўқдир. ⁶ Агар биз: “У билан мулоқотдамиз”,- десак-да, ўзимиз қоронғиликда юрсак, унда ёлғон гапириб, ҳақиқат бўйича юрмаган бўламиз. ⁷ Агар У нурда бўлгани каби, биз ҳам Унга ўхшаб нурда юрсак, бир-биримиз билан мулоқотда бўламиз ва Унинг Ўғли Исо Масиҳнинг қони бизни ҳар қандай гуноҳдан поклайди. ⁸ Агар: “Гуноҳимиз йўқ”,- десак, ўз-ўзимизни алдаган бўламиз ва бизда ҳақиқат йўқдир. ⁹ Агар гуноҳларимизни эътироф этсак, У содиқ ва ҳақ бўлгани учун, бизнинг гуноҳларимизни кечириб, бизни ҳар қандай ноҳақликдан поклайди. ¹⁰ Агар: “Гуноҳ қилганимиз йўқ”,- десак, Худони ёлғончи қилиб кўрсатган бўламиз ва бизда Унинг Сўзи йўқдир.