4

¹ Озьыен, мынам яратоно но адӟем потоно братьёсы, тӥ мынам шумпотонэ, мынам данъяськонэ: Кузё Инмарлы юн оскыса сылэ, мынам муспотоноосы.

² Евдодиез сюлворыса курисько, Синтихиез сюлворыса курисько Кузё Инмар сярысь огмалпанэсь луэ шуыса. ³ Озьы ик тонэ но курисько, зэмзэ ужасе, юртты соослы, кудъёсыз Ӟеч Ивор вӧлмытыса ужало монэным артэ, но Климент бордын но мукет мынам ужасьёсын, кудъёсызлэн нимзы Улон книгаын.

⁴ Котьку но Кузё Инмар бордын шумпотэ, эшшо но шуисько: шумпотэ. ⁵ Вань калыкъёс мед адӟёзы тӥлесьтыд лякыт но востэм сямдэс. Кузё Инмар матын.

⁶ Номыр сярысь но эн сюлмаське, нош куронъёстэс котьку вӧсяськыса но тау карыса усьтэлэ Инмар азьын. ⁷ Но Инмарлэн тупаса улонэз, кудӥз визьмын валанлэсь бадӟымгес, утьыса возёз тӥлесьтыд сюлэмъёстэс но малпанъёстэс Иисус Христосэн одӥго луонын.

⁸ Берлоаз, мынам братъёсы, малпаське та сярысь гинэ: ма зэмлык, ма шонер, ма чылкыд, ма данъян луон, ма ушъяны ярамон. ⁹ Пумозяз быдэстэ маизлы тӥ дышетскиды, мае сюлмады кутӥды, мае кылӥды но адӟӥды мынэсьтым, - но соку тупаса улон ваись Инмар луоз тӥледын.

¹⁰ Кузе Инмар бордын мон туж шумпотыса улӥсько со понна, тӥ нош ик кутскиды сюлмаськыны мон сярысь шуыса. Тӥ бен азьло но сюлмаськиськоды вал но, нош тӥледлы люкетӥзы пӧртэм ¹¹ югдуръёс.Верасько со сярысь, ёрмиськон улонэ понна ӧвӧл, малы ке шуоно мон дыши улыны соизлы, маиз вань мынам. ¹² Быгатӥсько куанер но улыны, быгатӥсько узыр но улыны, дыши улыны кӧты тырса но, кӧты сюмаса но, ваньбур трос дырья но, ёрмись луыса но. ¹³ Ваньзэ быгатӥсько Иисус Христос юнматэмъя. ¹⁴ Нош тӥ умой лэсьтӥды, мынам куректон-кайгу улонам пыриськиды шуыса.

¹⁵ Тӥ тодӥськоды Филиппын улӥсьёс, Ӟеч Ивор вӧлмытыны кутскыкум, ку мон потӥ Македониысь, одӥг черк но ӧз пыриськы тӥ сяна мыным коньдонэн юрттонын, но луло юрттонын но. ¹⁶ Тӥ Фессалоникае но кык пол ыстӥды мыным юрттэт.

¹⁷ Тӥлесьтыд сётэмдэс витьыса тае уг вераськы, нош малпаськисько тӥ сярысь - емышты мед будоз, пайда тӥледлы вайыса. ¹⁸ Мон ваньзэ басьтӥ, мон улӥсько ваньбуро, мыным тырмыт. Епафродит тӥледлэсь ыстэмдэс вуттӥз, кудӥз Инмарлы ярамон ческыт зыно жертва луиз.

¹⁹ Ёрмисьтэм луонлы понна мынам Инмаре мед тырмыт сётоз тӥледлы Иисус Христос пушкысь дано узырлыкезъя. ²⁰ Асьме Атай Инмарлы дан даурлэсь даурлы! Аминь.

²¹ Ӟечкылалэ ваньзэсты братъёсты но сестраосты, кудъёсыз Иисус Христос пыртӥ святой луизы. Салам верало тӥледлы мон бордын улӥсь братъёс. ²² Салам верало вань святойёз, уката ик кесарьлэн коркасьтыз. ²³ Кузё Инмарлэн каньыллыкез ваньды пӧлын мед луоз. Аминь.