1

¹ Апостол Павел, кудӥз калыкен но адямиос пыртӥ быръемын ӧвӧл, нош монэ быръйиз Иисус Христос но Сое кулэмысь улӟытӥсь Атай Инмар, ² но ваньмыз монэным ӵошен луись вынъёс, - галатияысь черкъёслы: ³ благодать тӥледлы но тупаса улон Атай Инмарлэсь но асьмелэн Иисус Христос Кузёмылэсь.

⁴ Кудӥз сётӥз Асьсэ Ачиз асьмелэн сьӧлыкъёсмы понна, мозмытыны асьмеосты та лек дуннелэсь Инмарлэн но асьмелэн Атаймылэн воляезъя, - ⁵ Солы дан пумтэм-быронтэм дауръёс ӵоже. Аминь.

⁶ Паймисько, тӥ сокем ӝог выжиськоды Христослэн благодатезъя Ӧтӥсь дорысь, мукетаз Ӟеч Ивор ивортонние ⁷ кудӥз, шонер ке верано, мукет ӧвӧл, нош вань тӥледыз сурась адямиос, кудъёсыз Христослэсь Ӟеч Иварзэ воштыны тыршо.

⁸ Нош ми но ке, яке инмысь ангел благовествовать кароз мукетсэ, мае ми благовествовать ӧм карылэ, мед луоз анафема.

⁹ Мае ми азьло ивортылӥмы, озьы ик али но выльысь верасько: кин тӥледлы Ӟеч Ивор ивортэ мукетсэ, воштыса милесьтым вераммес, мед луоз анафема.

¹⁰ Адямиослэсь – а мон утчасько благоволенизэс, яке Инмарлэсь? Калыклы шат тыршисько кельшыны? Мон та дырозь тыршысал ке кельшыны калыкъёслы, соку ӧй луысал Христослэн рабез.

¹¹ Вынъёсы, тодэлэ, Евангелие, кудзэ мон благовествовать карылӥ, адямиослэн ӧвӧл,

¹² уго мон ӧй басьты сое но ӧй дышетскы калыкъёслэсь, нош Иисус Христослэн усьтӥськеменыз.

¹³ Тӥ кылылӥды мынысьтым азьло иудаизмын улэмме, куке мон туж зол улляльяй Инмарлэсь Черксэ но быдтылӥ сое, ¹⁴ иудаизмын тыршыкум аслам юлтошъёсылэсь тужгес но трослы азинскылӥ но атайёсмылэсь преданниоссэс вожаса быдэсъяй.

¹⁵ Инмар монэ анаелэн кӧт пушкысеныз ик быръйиз но Аслаз благодатезъя тыршыны ӧтӥз,

¹⁶ усьтыны мон пушкын Аслысьтыз Пизэ, мон мед Со сярысь Ӟеч Ивор верало язычникъёслы, соку мон ӧй кенешы калыкъёсы, ¹⁷ ӧй мыны Иерусалиме азьлогес луэм апостоллъёс доры, нош мынӥ Аравияе но нош ик бертӥ Дамаске.

¹⁸ Собере, куинь ар орчем бере, мон Иерусалиме ветлӥ, Пётырен адскыны, но улӥ со дорын дас вить нунал.

¹⁹ Апостолъёс пӧлысь мон нокинэ но ӧй адӟы, Иисус Христослэсь Иаков вынзэ сяна.

²⁰ Тӥледлы тае Инмар азьын шонер гожтӥсько.

²¹ Собере мон мынӥ Сирия но Киликия шаеръёсы.

²² Иудея черкъёсысь Христослы оскисьёслэн монэ адӟемзы ӧй вал, ²³ нош кылылэмзы гинэ вал, мон пе, куке но соосты уллясь адями, табере благовествовать карисько Иисуслы осконэз, кудзэ азьло быдтылӥ, - ²⁴ но данъязы Инмарез мон понна.