1

¹ Мон, Павел, Инмарлэн воляезъя Иисус Христослэн апостолэз, ӟечкыласько святойъёсты но Иисус Христослы оскисьёсты, кудъёсыз Ефесын уло: ² благодать тӥлед но Инмар Атайлэсь но Иисус Христос Кузёлэсь мир.

³ Данлыко Инмар но асьмелэн Кузёмылэн Иисус Христослэн Атаез, Кудӥз благословить кариз асьмеды инмын Христос пушкын пӧртэм духлэн благословенниосыныз. ⁴ Инмар быръйиз асьмеды Иисус пушкын дунне кылдэмлэсь азьло ик, ми мед луомы шуыса святоесь но дунэсь Со азьын яратонэн.

⁵ Инмар азьласянь Аслаз ӟеч мылпотэмезъя, малпаз милемды усыновить карыны Иисус Христос пыртӥ . ⁶ Со лэсьтӥз озьы, ми мед данъялом шуыса Солэсь благодатьсэ, кудӥныз Со узырмытӥз милемды Аслаз Яратоно Пиеныз.

⁷ Иисус Христос пушкын ми искупление басьтӥм но сьӧлыкъёсмы простить каремын вал Солэн вирыныз. ⁸ Ваньмыз та сётэмын асьмелы Солэн благодатезлэн узыреныз, ⁹ кудзэ Со тырмыт сётӥз асьмелы Аслаз визьлыкеныз но мур валанэныз. Инмар усьтӥз асьмелы Аслысьтыз ӟеч малкыдызлэсь лушкем волязэ, ¹⁰ кудзэ Со азьласянь ик Иисус пушкын возе вал, дыр вуэм бере, ваньзэ инлэсьсэ но музъемлэсьсэ огазеяны но Христослы кивалтыны сётыны.

¹¹ Иисус Христос пушкын ми наследникъёс луимы, уго озьы вал малпанэз Солэн, Кин лэсьтэ ваньзэ дунне вылын Аслаз воляеныз, ¹² ми мед данъяломы шуыса Солэсь данзэ, уго асьмелэн азьласянь ик вал Христослы оскиськонмы.

¹³ Тӥлесьтыд утӥськондылэсь Шумпотон Иворезлэсь зэмлыко Кылзэ кылэмды бере, оскиды Христослы, но Со пушкын тӥ но пусъемын вал Святой Духлэн печатеныз, Кудӥз сярысь тӥледлы азьласянь кыл сётэмын вал, ¹⁴ Кудӥз залог луэ асьмелы кыл сётэм наследствомылы но искупить каронлы соосты, кинъёс Солэн луозы, данъяны Солэсь данзэ.

¹⁵ Соин ик, куке мон кылӥ тӥлесьтыд Иисус Христослы оскемды но ваньзэсты Солы оскисьёсты яратэмды сярысь, ¹⁶ дугдылытэк тау карисько тӥ понна Инмарез но вӧсяськисько тӥ понна. ¹⁷ Вӧсяськисько, асьмелэн Кузёмылэн Иисус Христослэн Инмарез, данлэн Атаез, мед сётоз визьлыклэсь Духсэ ¹⁸ но мед усьтоз Сое тодон-валан сюлэмдылэсь синъёссэ но мед усьтоз, тӥ мед тододы, мар бордын сылэ Солэн ӧтем оскиськонэз но Солэн святойъёс понна дано наследствоезлэн узырлыкез ¹⁹ но кыӵе мертаны быгатонтэм быдӟым Солэн кужымез асьмеос пушкын. Мон верасько соос сярысь, кинъёс оско Солэн ваньзэбыгатӥсь кужымез пыртӥ, ²⁰ кудӥныз Со Христос пушкын тыршиз, куке Сое кулэмысь улӟытыса ӝутӥз но инмын пуктӥз Ас бордаз бур палаз вылӥынгес ²¹ котькыӵе кивалтэтлэсь но властьлэсь, кузёяськисьёслэсь но кужымъёслэсь, котькыӵе нимъёслэсь, кудъёсыз таяз дуннеын гинэ ӧвӧл, нош вуонояз но.

²² Но ваньзэ Солэн пыд улаз зӥбиз, но пуктӥз Сое ваньмызлэсь вылӥе гес, Черклэн кивалтӥсеныз, ²³ кудӥз Солэн Мугорыз луэ, кудӥз тырмытэмын ваньзэ ваньмыныз Тырмытӥсен.