1

¹ Павеллэсь, Иисус Христослэн апостолэзлэсь,Инмарлэн воляезъя, келямын Иисус Христос пушкын улон сярысь кылсётэмэз ивортыны,

² Тимофейлы, яратоно пиелы: Инмар Атайлэсь но асьмелэн Иисус Христос Кузёмылэсь благодать, милость но каньыллык.

³ Инмарлы тау карисько, Кудӥзлы песьатайёсы кадь ик, мылысь- кыдысь служить карыны тыршисько, куке уй но нунал вӧсяськыкум, тонэ ялан тодам ваисько.

⁴ Тынад синвуосыд сярысь мон ӧй вунэты но туж шум пото, куке тонэныд пумисько.

⁵ Тодам вайыса оскондэ, кудзэ калыклы чеберъяськыса возьматыны уд тыршиськы, азьвыл кудӥз вал тынад песянаедлэн Лоидалэн но Евника анаедлэн, оскисько, со тон пушкын но шуыса.

⁶ Соин ик мон тонэ тодад вайытӥсько, пелля Инмарлэн кузьымезлэсь ӝуась тылзэ, кудзэ тон басьтӥд мон йыр вылад киме поныса вӧсяськеме бере.

⁷ Малы ке шуоно Инмар ӧз сёты асьмелы кышканлэсь духсэ, но кужымлэсь, яратонлэсь но астэ кияд возьыны быгатонлэсь духсэ сётӥз.

⁸ Озьыен, эн возьдаськы асьмелэн Иисус Христос Кузёмы сярысь ивортыны калыкъёслы, мынэсьтым но, Христос понна пытсэт улын пукисьлэсь, эн возьдаськы. Эн кышка курадӟыны Христос сярысь ивортэмед понна, уго Инмар Ачиз тыныд кужым сётоз,

⁹ милемес Со утиз милям ужъёс шоры учкытэк, святой ӧтёнэн Дораз ӧтиз, Аслаз воляеныз, асьмелы сётэм благодатен, кудзэ Со сётӥз Иисус Христос пушкын дунне кылдытэмлэсь азьло,

¹⁰ кудӥз усьтӥськиз, куке асьмелэн Утисьмы, Иисус Христос, лыктӥз кулонэз куашкатӥз но Ӟеч Ивор пыртӥ возьматӥз асьмелы улон, но быронтэм улон,

¹¹ со понна мон пуктэмын Инмарлэн проповедникен, апостоллэн но язычникъёсты дышетӥсен.

¹² Со сэрен ик мон курадӟисько, но уг возьдаськиськы, уго тодӥсько Кинлы оски, но юн оскисько, Со кужмо утьыны мынэсьтым оскеммэ шуыса, со нуналозь.

¹³ Шонер дышетонлэсь эн палэнскы, кудзэ тон осконэн но Иисус Христосэз яратонэн кылӥд мынэсьтым.

¹⁴ Возь ваньзэ ӟечсэ, мае тыныд сётэмын вал асьме пушкын улӥсь Святой Духен.

¹⁵ Тон тодӥськод асияысь ваньмыз братъёс монэ кельтӥзы шуыса, соос пӧлын Фигелл но Ермоген.

¹⁶ Кузё-Инмар мед помиловать кароз Онисифорлэсь семьязэ, уго со трос пол монэ пыртылӥз но пытсэт улын пукемелэсь ӧз возьдаськыл,

¹⁷ нош, ку со вал Римын, вань кужымзэ сётыса со утчаз монэ но шедьтӥз.

¹⁸ Кузё- Инмар мед сётоз солы шедьтыны Инмарлэсь милостьсэ со нуналэ. Нош кӧня со мыным юрттӥз Ефесын, тон ӟеч гес тодӥськод.