1

¹ Павел, Силуан но Тимофей - Иисус Христос Кузёлэн но Атай Инмарлэн Фессалоникияысь черкезлы: Иисус Христос Кузёмылэсь но Атай Инмарлэсь тӥлед благодать но мир.

² Котьку тау кариськом Инмарез ваньды понна, тодамы вайыса тӥ сярысь милям вӧсяськонамы,

³ ум дугдылӥське тодамы ваемысь тӥляд оскондылэсь ужзэ, яратыса тыршемдэс но чидандэс, озьы ик юн оскиськон милям Иисус Христос Кузёмылы Инмар азьын но асьмелэн Атаймы азьын,

⁴ тодыса тӥлесьтыд быръемдэс, Инмарен яратэм братъёс,

⁵ уго милям Ӟеч Ивор тӥ дорын ивортэммы кыл вылын гинэ ӧй вал, нош кужымен но, Святой Духын но, но трос валэктонъёсын но, кызьы тӥ асьтэос адӟиды вал, кыӵеесь ми вал тӥ понна тӥ пӧлын.

⁶ Тӥ шуг-секытъёс пӧлын ке но вал, милесьтым вераммес басьтыса, Святой Духлэн шумпотонэныз тырмиды, адӟем карыны кутскиды Кузё-Инмарлы но милемлы но,

⁷ соин ик тӥ адӟем карымонэсь луиды Македониысь но Ахаиысь ваньмызлы Инмарлы оскисьёслы.

⁸ Уго тӥледын Кузё-Инмарлэн кылыз Македониын но Ахайеаын гинэ ивортэмын ӧвӧл, нош котькыӵе интыын кылӥськиз тӥляд Инмарлы оскемды сярысь, озьыен милемлы номыр сярысь но вераны кулэ ӧй ни вал,

⁹ малыке шуоно соос асьсэос верало, кызьы ми лыктылӥмы тӥ доры, но кызьы тӥ Инмар доры идолъёслэсь палэнскиды , улэп но зэмлык Инмарлы служить карыны

¹⁰ но инмысь витьыны Солэсь Пизэ, Кудзэ Со кулэмысь улӟытӥз - Иисусэз, азьласянь вожпотонлэсь милемды Утисез.