1

¹ Павлел, Инмарлэн валяезъя ӧтем, Иисус Христослэн Апостолэз, но Сосфен вынмы-

² Инмарлэн Коринфысь черкезлы, Иисус Христос пыр освятить каремъёслы, святой луыны ӧтемъёслы, но ваньмызлы, кин вазьылэ асьмелэн Кузёмылы Иисус Христослы нимызъя котькыӵе интыын:

³ благодать тӥледлы но мир асьмелэн Инмар Атаймылэсь но Кузёмылэсь Иисус Христослэсь.

⁴ Уг дугдылӥськы тау каремысь мынысьтым Инмарме тӥ сярысь со понна, вань шуыса тӥляд Инмарлэн благодатез, кудзэ кузьмамын тӥледлы Иисус Христос пушкын,

⁵ Со пушкын уго тӥ узыр луиды котькыӵе кылын но котькыӵе валанэн,-

⁶ уго Христослэн иворез тӥ пушкы юнматскиз отчёзь,

⁷ тӥляд ӧвӧл тырмымтэды нокыӵе дарлы но, витьыса лыктэмзэ асьмелэн Кузёмылэсь Иисус Христослэсь.

⁸ Кудыз юнматоз тӥледыз пумозяз, тӥ медаз луэ шуыса янгышесь Иисус Христос Кузёмылэн лыктон нуналаз.

⁹ Инмар оскымон, Кудыз тӥдедыз ӧтиз кусып возьыны Солэн Пиеныз, Иисус Христосэн, асьмелэн Кузёенымы.

¹⁰ Вынъёсы сюлворыса курисько, асьмелэн Иисус Христос Кузёмылэн нимыныз, тӥ ваньды мед огкылысь луоды но медаз луэ тӥ пӧлын люкиськонъёс, тӥ одӥг духен но одӥг малпанъёсын герӟамын мед луоды.

¹¹ Хлояын улӥсьёслэсь мыным тодмо луиз тӥ сярысь, вынъёсы мынам, тӥ куспады керетӥськоды шуыса.

¹² Мон тодӥсько, тӥляд шуо пе:"мон Павеллэн", "мон Аполлослэн"," мон Кифлэн", "мон Христослэн".

¹³ Люкиськиз шат Христос? Павел шат кортӵогаз ассэ тӥ понна? Яке Павеллэн нимыз понна тӥ крестится кариськиды?

¹⁴ Тау карисько Инмарлы,тӥ пӧлысь нокинэ но, Криспез но Гаиез сяна, крестить ой кар шуыса,

¹⁵ нокин медаз вера, мон пе крестить кари аслам нимы понна.

¹⁶ Озьы ик мон крестить кари Стефанлэсь ӵыжы-выжызэ, нош кинэке крестить кари-а на меда, уг тодӥськы.

¹⁷ Малыке шуоно Христос монэ ӧз келя крестить карыны, нош благовествовать карыны келяз, визьлыкез уже кутытэк, Христослэн киросэзлэзь кужымзэ кулэтэм кароно медаз луы шуыса.

¹⁸ Малыке шуоно кирос сярысь вераськонъёс быронэ мынӥсьёслы визьтэмъяськонъёс луоу, нош ми понна, спасатся кариськисьёслы, Инмарлэн кужымез луэ.

¹⁹ гожтэмын уго:" Визьнодоослэсь визьлыксэс быдто, тодонзэс тодосчиослэсь палэнто".

²⁰ Кытын визьнодо? Кытын книга гожъясь? Кытын ваньзэ тодӥсь та дуннеысь? Ӧз-а берыкты Инмар та дуннелэсь визьлыксэ визьтэмъяськонлы?

²¹ Инмарлэн визьлыкез пушкын дунне аслаз визьлыкеныз ӧз тоды Инмарез, соку Инмарлэн спасать каремез потӥз "визьтэм" проповедьёсын Солы оскисьёсты.

²² Малыке шуоно иудейёс но куро чудоос, грекъёс но утчало визьлык;

²³ нош ми проповедовать кариськом кортчогам Христосэз, иудейёс понна - чемтон, грекъёс понна - визьтэммон,

²⁴ нош ӧтем иудейёс но грекъёс понна - Христосэз, Инмарлэсь кужымзэ но Инмарлэсь визьлыксэ,

²⁵ малыке шуоно Инмарлэн "визьтэмез" визьлыкогес калыкъёслэсь но Инмарлэн "лябез" кужмогес калыклэсь.

²⁶ Учкелэ, вынъёс, кинъёс тӥ, ӧтемъёс: трос ӧвӧл тӥ пӧлын визьлыкоос, трос ӧвӧл кужмоос, трос ӧвӧл йӧноос,

²⁷ нош Инмар ӧз быръйы визьлыкоосты та дуннеысь, возьытэ уськытон вылысь визьлыкоез, но лябъёсты та дунеысь быръйиз Инмар, золъёсты возьытэ уськытон вылысь,

²⁸ йоноосты ӧз быръйы та дуннеысь, ултӥямзэ, номырлы ярантэмзэ быръйиз Инмар, ултӥян вылысь сиё-данооссэ,

²⁹ нокыче но адями медаз ушъяськы шуыса Инмар азьын.

³⁰ Солэсь тӥ но Иисус Христос пушкын, кудыз луиз ми понна визьлыко Инмарлэсь, шонерлык, святой улон но искупить карем,

³¹ гожтэмын мед луоз:"Ушъяськись, ушъяськы Инмарен".