SPATJIBAL OT'ANIL ¹ Jo'on Pabloon, te chukulon ta swenta te Cristo Jesuse sok te jkermanotik Timoteo, ya jpatbat awot'an Filemón te ja jkermanoat te k'uxat ta jkot'ane sok te ja joybatik ta at'ele, ² sok te Apia te ja jkermanatike, sok te Arquipo te ja joytik ta at'ele, sok te ch'uunjeletik te ya stsob sbaik ta anae. ³ Te yutsil yot'an te Jtatik Diose sok te Jkajwaltik Jesucristoe ayuk ta atojolik. ⁴ Ta spisil ora ya jkalbey wokol te Diose. Ya jna'at te k'alal ya jk'opon te Diose. ⁵ Te jo'one jkaiyojbat stojol te xch'uunjel awot'ane sok te xk'uxul awot'an ta stojol te Jkajwatik Jesuse sok ta spisil te ch'uunjeletike. ⁶ Ya jk'oponbat Dios yu'un te ya acholbey sk'oplal te xch'uunjel jkot'antike, swenta yu'un te lekuk te snopjibal yu'unike te ay ta jtojoltik ta swenta te Cristoe. ⁷ Melel bayal sbujts' k'inal ya jkaiy sok staoj yip jkot'an ta swenta te xk'uxul awot'ane, melel awak'ojbey yip te yot'anik te ch'uunjeletike, ja'at jkermano. ⁸ Jauk me to, manchuk me jkich'oj tulan jkat'el ta swenta Cristo te ya jkalbat mantal te ya apas te beluk ya sk'an ya apase, ⁹ Jauk me to ya jkalbat wokol ta swenta te k'uxat ta jkot'ane, te jo'on Pabloone, te mamalonixe sok te chukulon ta swenta te Cristo Jesuse. ¹⁰ Ya jkalbat wokol yu'un te Onésimo te jnich'an ta stojol Dios, te ja la jna'bey sba te k'alal chukulonix a. ¹¹ Melel ta sneelal toa, ma ba ya xtuun awu'un a, jauk me to, ta ora to ya xtuun awu'un sok ya xtuun jku'un uuk. ¹² Ja yu'un te ya jtikunbatel sujt'ele, jich me k'oem te bit'il jo'one, ik'ame ta atojol jich me la awik'onix uuk abi. ¹³ Ja ya jk'an te yakuk xjilon soke, swenta yu'un ja ajelol ta abatinel ya xk'ot, te bit'il ayon ta chukel ta swenta te lek yach'il k'ope. ¹⁴ Jauk me to mayuk beluk la jk'an jpas ta swenta teme ma jichuk ya sk'an te awot'ane. Jich la jpas in to ta swenta te spasemal me awot'an ya akoltayon sok te ma sujeluk ya awaye. ¹⁵ Melel ja niwan swentail te k'ejel abajt' jun chebuk k'aal swenta yu'un jich me ya ajoin ta spisil ora. ¹⁶ Ma me jichukix te bit'il ja mosoe, tulan me sk'oplal k'otix, jich me k'otix te bit'il tul awermanoe, melel te jo'one bayal k'ux ta jkot'an, jich me ya sk'an te ja'ate k'ax k'ux xan me ya awaiy, melel ma jauk nax abat awu'un janix me jich awermano ta stojol te Jkajwaltike. ¹⁷ Teme jich ya akuyon te bit'il joybatike, ik'ame te Onésimo jich te bit'il ya awik'onoke. ¹⁸ Yan teme ay beluk amen spasojbate, sok teme ay sbet awu'une, jo'on me ya jtojbat. ¹⁹ Jo'on Pabloon, te ya jts'ibubate: Jo'on me ya jtojbey te sbete. Jauk me to ya me ana' te ay me abet uuk, ja te akuxinele. ²⁰ Jich yu'un jkermano, ak'bon te yakuk sbujts'naj jkot'an ta atojol ta swenta te Jkajwaltike; sok me awot'an ya awik' te Onésimoe ta stojol te Cristoe. ²¹ La me jts'ibubat tel, melel ya jna' te ya apas te beluk yakon sk'anbelate. Ya jna' te k'axem to jich ya apas te bit'il la jkalbate. ²² Janix jich, chajp'anbon junuk na te banti ya stak' xwayone, melel ay smuk'ul jk'otan yu'un te yakat ta sk'oponel Dios ta jtojol jich me ya stak' jkilbatik ta yan buelta. ²³ Te Epafras, te joy ta chukel ta swenta te Cristo Jesuse, ya spatbat awot'an; ²⁴ Janix jich uuk te Marcose, Aristarco, Demas, Lucas sok te jotak ta at'ele. ²⁵ Te yutsil yot'an te Jkajwaltik Jesucristoe ayuk ta stojol te a espíritue. Jichuk.