SPATJIBAL OT'ANIL. ¹ Jo'on Santiagoon, yabaton te Diose sok uuk te Kajwaltik Jesucristoe, ya jpatbeyex awot'anik ja'ex te lajchey tul te sts'umbalex Israel te pujk'emex bael ta spamal te balumilale. TE SBIJIL OT'ANIL TE YA XTAL TA STOJOL TE DIOSE. ² Jkermanotak ayuk me sbujts' awot'anik te k'alal ya xtal bayal awokolike, ³ melel ja na'ojik te k'alal ya xtal ilbeyel te xch'uunjel awot'anike, ja me ya ataik xan yip te awot'anik a. ⁴ Jich yu'un aka me yich' yip te awot'anik ta sk'asesel te awokolike, jich me ya ats'aktesik te awat'elike, swenta yu'un ya xch'iex ta k'axem to xan ta stojol te Diose, ma me ayuk beluk ya spas falta awu'unik. ⁵ Jauk me to teme ay mach'a mayuk sbijil yot'ane, aka me sk'anbey te Dios te ja ya yak' stukele, k'anbeyaik me, jich me ya yak'beyex, ma bisbiluk nax ya yak' stukel sok ma ba amen ya yaiy teme la yich' k'anbeyele. ⁶ Jauk me to, ayuk me xch'uunjel awot'anik te k'alal ya ak'anike, manchuk me xchebetuk awot'anik, melel te mach'a xchebet yot'ane jich me pajal k'oem te bit'il ya xtal-xbajt' nax yu'un te ik' te sbul te mare. ⁷ Te mach'a jich ay te yot'ane, ma me akuyik te ay beluk ya x-ak'botik yu'un te Kajwaltike; ⁸ Te ants-winik te mach'a xchebet yot'ane, janix me jich ma jun yot'an ta xkuxlejal. ⁹ Te kermanotik te mayuk beluk ay yu'une binuk nax me yot'an, melel te Diose ya xtoyesbot sk'oplal yu'un, ¹⁰ yan te mach'a k'uleje aka me pek'eluk ya yak' sba, melel jich ya xlaj bael te bit'il te'eltik nichime te ajk'nax ya xlaje. ¹¹ Te k'alal ya xlok' tel te k'aale ya xtulanaj tel, ja yu'un te wamaletike ya xkajik ta takejel sok nix uuk te nichime ya xtakej koel, jich ya xlaj te yutsilale. Janix jich uuk te mach'atik k'ulejik, ja ya xmilotik bael yu'un spisil te yat'elike. ¹² Binax me yutsil te winik te mach'a ya sts'ijk' yu'un spisil te wokolile, melel teme ju' yu'un sts'ikele ya me x-ak'botik te korona yu'un te kuxinel ta sbajt'el k'inal, ja te albilix te ya yich'ik te mach'atik sk'anojik te Diose. ¹³ Te k'alal ya xtal te yiljibal awot'anik yu'un te mulile, ma me awalik: "Jai yiljibal jkot'an to, ja la yak'bon tel te Kajwaltike," melel te Diose ma xch'uun sujel ta mulil sok ma ba ya sujwan ta spasel te beluk amene. ¹⁴ Te beluk ya snopik ta yot'anik ta tulutul te ants-winiketike, janix me ya yich' ilbeyel yot'anik yu'un sok ya xnitot bael ta spasel te beluk amene, sok janix me ya x-ik'ot bael ta ch'ayel yu'un. ¹⁵ Ja yu'un ta patil, te beluk ma lekuk ta pasele, neel me ya xtal ta yot'anik, ta patil ya me xchiknaj ta yat'elik, sok teme muk'ubix a, ja me ya yak'ex bael ta lajel sbajt'el k'inal. ¹⁶ Ma me apas abaik ta lot, jkermanotak te k'uxex ta jkot'ane. ¹⁷ Spisil te beluk lek jkich'ojtike sok te majt'aniletik te jelawen yutsile koem tel ta ch'ulchan, ja yak'oj tel te Jtatik Dios te ja spasoj spisil te beluk ya xojobtes te balumilale. Te Diose ma ba ya xjelon stukel, stalel ay, sok ma ba ya xyanaj jich te bit'il snojk'teal te beluk pasbil yu'une. ¹⁸ Te Diose ja la stsa te la yak'botik kuxinel ta swenta te smelelil k'ope, yu'un me jich ya xk'ootik te bit'il sbabial yal-snich'nabe. ¹⁹ Ja na'ojik me stojol spisil in to, jkermanotak te k'uxex ta jkot'ane. Spisil te ants-winiketike, yakuk me sna'ik xch'amel yaiyel stojol spisil te ayeje, yakuk me stsajtey sbaik te k'alal ya xk'opojike, sok manchuk me ya x-ilinik ta ora nax, ²⁰ melel te yilimba te ants-winike ma ba ya stak' x-at'ej ta ba ay te toj yat'el te Diose. ²¹ Jich yu'un, ijk'teyaik me spisil mulil sok te beluk ma lekuk ta pasel te ayik ta sba te balumilale, sok pek'el me ya awak' abaik te k'alal ya awich'ik albeyel te sk'op te Diose, te janax ya xju' yu'un te ya yak' te ya xkol te ach'ulelike. ²² Ch'uunaik me ta spasel te sk'op te Diose, ma me jauk nax te ya awaiyik stojole, ma me apas abaik ta lot ta ja'ex naxe. ²³ Melel te mach'a janax ya yaiy stojol te sk'op te Diose, jauk me to, ma ba ya xch'uun spasel, jich k'oem te bit'il tul winik te ya yil sba ta bay espejo. ²⁴ Ya yil te sit yelawe, jauk me to te k'alal ya xlok' baele, ora nax ya xch'ay ta yot'an te bin yilele. ²⁵ Yan te ants-winik te mach'a ya snop ta lek te sk'op te Diose, te ja mantalil te ya yak' kolele, sok nix teme ma jauk nax te ya yaiy stojole; jai winik to ch'ultesbil me ya xk'ot ta spisil te beluk ya spase. ²⁶ Te mach'a skuyoj sba ta ch'uunjele, jauk me to ma ba ya sna' skomel te sk'opjele, yak me ta spasbel sba ta lot stukel, sok jontol te ch'uunjele. ²⁷ Te bit'il ay ta xch'uunel ta lek te Diose sok te ma ba kapbil ta mulil te yiloj te Jtatik Diose, ja in to: Ja te ya jk'uxtaytik te mach'a me'ba aletike sok te mach'atik me'ba antsetik te k'alal ay swokolike, sok te ma yak' sbaik ta tsalel yu'un te beluk ma lekuk ta pasel le' ta sba te balumilale.