SPATJIBAL OT'ANIL. ¹ Jo'on te ancianoone, ya jpatbat awot'an ja'at jkermano Gayo te k'uxat ta jkot'an ta smelelile. ² Jkermano te k'uxat ta jkot'ane, ya jk'opon Dios ta atojol swenta yu'un ya s-esmaj spisil te beluk ya apase sok te manchuk ya stsajk'at ta chamele, jich te bit'il lek ay te ach'ulele. ³ Melel binub nax jkot'an te k'alal la xcholbonik te jkermanotaktik te bit'il k'axel ay ta awot'an te smelelil k'ope, sok te junax awot'an yakat ta spasel te beluk smelelile. ⁴ Mayuk yan te beluk ya sbujts'naj jkot'an yu'une, janax te k'alal ya jkaiy stojol te jun yot'anik ta spasel te beluk ya yal te smelelil k'op te mach'atik jkal-jnich'nabe. ⁵ Jkermano te k'uxat ta jkot'ane, lek te bit'il jun awot'an yakat ta at'el ta stojol te jkermanotaktike sok te mach'atik ma ana'bey sbae, ⁶ ja yak'oj sbaik ta testigo k'op yu'un te xk'uxul awot'an ta stojol te ch'uunjeletike. Ja lek te bit'il ya akoltey yu'un te sbeibik te bit'il ay ta swentaik spasel te yat'el te Diose, ⁷ melel ja yakalik ta beel ta swenta te Jesucristoe, sok mayuk beluk la sk'anbeyik te mach'atik ma ba ch'uunjeletike. ⁸ Jich yu'un te jo'otike ja me ya sk'an te ya jkolteytike, jich me ya jkolteytik ta at'el ta xcholel te smelelil k'ope. ⁹ Te jo'one la jts'ibubatik jun ta atojolik ja'ex te ch'uunjelexe, jauk me to te Diótrefese te ja ya smulan te ya yich' ich'el ta muk'e, ma ba la yich'bon ta muk' te jkat'ele. ¹⁰ Jich yu'un te k'alal ya xba jkilexe, ya me xba jkalbey tulan te beluk amen yak ta spasele, melel yak ta sbol k'optebelotik. Sok ma tik'uk nax ya yaiy a, janix jich ma sk'an yik' te jkermanotaktike. Sok teme ay ch'uunjeletik te ya sk'an yik'ik ochel ta snaik te jkermanotaktike ya xkomotik ta ora yu'un te Diótrefese sok ya xtenotik lok'el ta xch'uunel te Diose. ¹¹ Jkermano te k'uxat ta jkot'ane, ma me ak'ain spasel te beluk ma lekuke.Te mach'a ya spas te beluk lek ta pasele ja me yu'un te Diose. Yan te mach'a ya spas te beluk ma lekuke ma ba yiloj te Diose. LEK SK'OPLAL TE DEMETRIOE. ¹² Yan te Demetrioe, lek sk'oplal yu'un spisil te ants-winiketike sok jich ya yal uuk te smelelil k'ope. Te jo'otike testigootik yu'un, sok ya ana'ik te smelelil te beluk ya jkale. ¹³ Te jo'one ay to bayal te beluk ya jk'an jts'ibubatike, jauk me to ma jk'an ya jts'ibubatik ta jun sok tinta. ¹⁴ Jauk me to ya jk'an xba jkilex sok ya jk'an jk'oponex. ¹⁵ Te lamal k'inal ayuk ta atojolik. Te jkermanotaktike ya me yak'beyex spatjibal awot'anik. Patbeya aba awot'anik ta tulutul.