SPATJIBAL OT'ANIL. ¹ Simón Pedro, te abat sok alwanej yu'un te Jesucristoe, te mach'atik ay xch'uunjel yot'anik te jelawen yutsilal jich te bit'il jch'uunejtike, melel jch'uunejtik te Diose sok te koltaywanej Jesucristo te ja toj stukele. ² Te Diose sok te Kajwaltik Jesucristoe aka me yak'beyex ta k'axem to xan te yutsil yot'an sok te lamal k'inale. ³ Spisil te beluk ay jku'untike sok te bit'il kuxulotike ja ya yak'botik te Dios ta swenta te yu'ele sok te sbijile, sok te ja la yik'otik ta swenta te yutsilale sok te lekil yat'ele. ⁴ Ta swenta in to, te Diose la yak'botik t'ujbilik nax sok muk'ik nax majt'aniletik, swenta yu'un te pajal awilelik ya xk'oex sok te Diose, sok lok'anik tel yu'un te beluk ya smulan spasel te balumilale, ja te mulile. ⁵ Jich yu'un, ak'aik me puersa te yakuk xmuk'ub te xch'uunjel awot'anike, ta swenta spasel te beluk lek ta pasele sok te ayuk sbijil awot'anike. ⁶ Ta swenta te sbijil awot'anike, mantaltes abaik atukelik, sok te k'alal ya apas abaik ta mantale, aka me ts'ijk'uk awu'unik, teme ts'ijk awu'unike, ak'ame abaik ta stojol te Diose. ⁷ Ta swenta te k'axel awak'oj abaik ta stojol te Diose, ak'aik me te xk'uxul awot'anik ta stojol te awermanotake, sok ta swenta te k'ux ya awaiy abaike, ak'aik me ilel te xk'uxul awot'anike. ⁸ Teme awich'ojikix spisil in to, sok teme ch'iemix ta awot'anike, ya me xtuunatikix abi sok ay me abijilik ta swenta te Kajwaltik Jesucristoe. ⁹ Jauk me to teme ay tuluk te ma yich'oje, jich me k'oem te bit'il mach'a mayuk yip te site sok te bit'il te ma'site. Ch'ayemix ta yot'an te bit'il ya spok te spokol smule. ¹⁰ Jich yu'un, jkermanotak, ak'beyaik me yipal ta swenta te la awich'ikix ik'el sok te tsabilatikix yu'un te Diose. Teme jich la apasike, ma me ya xch'ayatik koel ta mulil. ¹¹ Jich me ya sjambeyex ochel sbeelal te muk' ajwalil yu'un te kuxinel sbajt'el k'inal te ya yak' te Kajwaltik Jesucristoe te ja koltaywanej jku'untike. ¹² Jich yu'un, chapalon me ta spisil ora ta swenta te ya jna'ulebeyex te manchuk ya xch'ay ta awot'anik spisil in to, manchuk me ana'ojikix a sok teme ay xch'uunjel te awot'anik yu'un te beluk smelelile. ¹³ Te bit'il kuxulon toe, ya jnop te ja lek te ya jkak'batik yip awot'anik sok te ya jna'uleybatik spisil in to. ¹⁴ Melel ya jna' te nopolix ya xlajone, jich la yak'bonix jkil te Kajwaltik Jesucristoe. ¹⁵ Ya jpas xan te beluk lek ta atojolike swenta yu'un teme ma leukonix a to, jich me ma xch'ay ta awot'anik a. ¹⁶ Melel te jo'otike ma jauk ya jcholtik te jowil k'opetik te k'alal la jcholtik te bit'il ay te yu'el sok te bit'il ya xchiknaj tel te Kajwaltik Jesucristoe. Melel te jo'otike testigo k'ootik yu'un te smuk'ul yutsilale. ¹⁷ Melel te Jesuse ja la yich' tuyesbel sk'oplal sok ak'ot ich'el ta muk' yu'un te Diose, te k'alal jich la yich' albeyel yu'un te mach'a ay yutsilale: ''Jai to ja jnich'an, te k'ux ta jkot'ane, te ay bayal sbujts' jkot'an yu'une." ¹⁸ Te jo'otike la jkaiytik stojol te mach'a k'opoj tel ta ch'ulchan, te k'alal ayotik sok a, ta bay ch'ul wits. ¹⁹ Ja ya jna'tik te ja smelelil te beluk yalojik te alwanejetike. Lek te ja awich'ojik ta muk'e. Jich te bit'il tuchbil k'ajk' te yak ta tilel te banti ijk'al k'inale ja to teme sakub tel te k'inale sok te ek' te ya yak' xojobil ta buen sabe, te ya yak' sakubuk te awot'anike. ²⁰ Na'aik me stojol neeluk, mayuk me mach'a ya sna' xcholel ta stukel nax te beluk ts'ibubil jilele. ²¹ Melel mayuk tuluk alwanej te jich nax k'opoj ta swentanaxe. Jauk me to ja k'opojik ta swenta te Ch'ul Espíritu yu'un te Diose.