¹ Musa wa shiyuk ta Israel kan wodi talimat le ahaab wa gali, “hafizu takum kulu wasaya al ana gi wodi le intum alela. ² Fi yom al kan bi abiru urdum le beled al yahwa Rabuna takum bi wodi le intum, intum bikutu hujar kubar wa lesegu humon ma lasga. ³ Intum bikatibu fogo kulu kelimat ta ganun iza kan intum bi abiru nahar urdun, ashan intum bi ruwa le beled al yahwa Rabuna takum bi wodi le intum, beled al maliyan ma leben wa asel, ze yahwa, Rabuna ta judud takum kan kelimu waad le intum. ⁴ Laman intum bi abiru nahar urdun, keli intum kutu hujar al ana gi amiru intum amulu alela, fok jebel Ebal, wa lesegu umon ma lasga. ⁵ Hinak intum bi abinu mazbah le yahwa Rabuna takum, mazbah min hujar, lakin intum ma bihuku hujar del be hajat min hadid. ⁶ Intum bi abinu mazbah ta yahwa Rabuna takum be hujar al ma ishtakalu beu. Intum bi gedim moharigat fok mazbah de le yahwa Rabuna takum. ⁷ Hinak intum bi wodi zebihat ta salam wa bi akulu hinak, intum bi afrah gidam yahwa Rabuna takum. ⁸ Intum bi katibu fok hujar de kulu kelimat ta sharia ganun, katibu takum wadeh. ⁹ Musa wa abuhat, lawiin, kan wonusu le Israel kulu gali, “keli intum askot wa asma, Israel. Alela intum biga shaab ta yahwa Rabuna takum. ¹⁰ Intum baad kida keli ehterim sout ta yahwa Rabuna takum wa ehterim wasaya wa gawanin al ana gi wodi le intum alela.” ¹¹ Musa kan wodi awamir le shaab fi nefsa yom gali, ¹² Del yau gabael al bi wogif fok jebel Gerizim ashan bi barik nas baad umon bi abiru nahar urdun; shamaun, lawi, yahuza, yaskar, yusif, wa Benjamin. ¹³ Del yau gabael al bi wogif fok jebel Ebal ashan bi alinu laanat; Rauben, wa Gad, wa Ashir, Zebulun, Dan, wa Naftali. ¹⁴ Lawin bi juwabu wa kelim le kulu rijal min Israel be sout aali. ¹⁵ Laana bikun le rajil al bi amulu timsal au sanam al salau ma insan wa bikutu ashan biabidu fi sir wa de kan najasa gidam yahwa! Wa nas kulu birudu gali, Amin. ¹⁶ Laana bikun le rajil al ma bi ehterim abu bitowo wa uma bitowo! Nas kulu birudu gali, Amin. ¹⁷ Laana bikun le rajil al bi shilu alama ta hudud ta watan ta jeiran towo! Nas kulu birudu gali, Amin ¹⁸ v18Laana bikun le rajil al bikabasu zol amiyan fi sika! Nas kulu birudu gali, Amen. ¹⁹ Laana bikun le rajil al bishilu beguwa hak ta zol ashan huwo aajnebi, atim au armala! Nas kulu birudu gali, Amen. ²⁰ Laana bikun le rajil al binum ma mara ta abu bitowo, ashan huwo hak ta abu bitowo! Nas kulu birudu gali, Amen. ²¹ Laana bikun le rajil al bi num ma ayi nou ta haywan! Nas kulu birudu gali, Amen. ²² Laana bikun le rajil al binum ma okot towo, binia ta abu bitowo, au binia ta uma towo! Nas kulu birudu gali, Amen. ²³ Laana bikun le rajil al binum ma uma ta mara towo! Nas kulu birudu gali, Amen. ²⁴ Laana bikun le rajil al bikatulu jeiran towo be das sir! Nas kulu birudu gali, Amen. ²⁵ Laana bikun le rajil al rashowa ashan bikatulu zol al berii! Nas kulu birudu gali, Amen. ²⁶ Laana bikun le rajil al ma bi .amulu kalamat ta sharia de, wa ma bi ehterim umon! Nas kulu birudu gali, Amen