¹ Iza kan fi zol ligo katulu fi beled al yahwa rabuna takum biwodi le intum, fi mahal zira, wa ,ma arufu zol al katulu, ² Shiyut wa gudaa takum biruwa hinak, umon bi aburu masafa min mahal ta zol al mutu, le mudun al fi daira ta meyit de, ³ Biga shiyut ta medina al gerib ma mahal al katulu fogo zoll de bijibu bagara al subiyan, al lisa ma istakalu ma huwo,wa lisa ma kutu halaga ta shokol fi ragabta towo. ⁴ Humon bishil bagara subiyan de le kor al moya towo gi jere. Fi kor al makuruju wala zarau fogo, hinak humon birasulu ragabta ta bagara de. ⁵ Gusu al min iyal ta kahana lawi biga gidem, ashan yahwa rabuna takum kan iktar umon ashan bi akdim huwo, wa biwodi Baraka bi isim ta yahwa, wa bishilu karar le kulu kilafat wa mashakil be kilimat tomon. ⁶ Kulu shiyuk fi medina al gerib ma mahal al kotulu fogo zol de bikasulu idenat tomon fok fi isim ta bagara al subiyan al kasulu ragabta towo fikor, ⁷ Wa umon bijuwabu le hadis de gali, “iden ta nina ma kubu dom de, wala uyun tanina ayinu mutu de. ⁸ Afi, ya yahweh, shaab taki Israel. nas al inta alagu wa mata kutu zalan wa doom le nas al ma endu sam fi nus taki ta Israel. ⁹ Be teriga de intum bishilu be kamul dom ta zol al berii min nas takum, laman intum biamulu haja al kwes fi ena ta yahweh. ¹⁰ Iza kan intum ruwa fi dusman ma nas adu takum wa yahwa rabuna takum wodi le intum najah wa intum kutu umon tehat mosoulia takum, wa intum gobudu umon ze masajin ta harib. ¹¹ Iza kan zol minakum ayinu fi nus ta masaji n ta harib de mara jemila, wa biga moksut ma hiya ashan bishilu hiya ze mara towo. ¹² Huwo bijibu mara de fi beit bitowo, mara de bihaligu shaar ta raas towo wa gata dufur al ta hiya bara. ¹³ Hiya bishilu gumasat al hiya kan gi lubisu zaman al kan gobudu hiya bara, wa bigeni kore le abu wa uma tahiya fi beit ta rajil jedid de le muda shahar kamil. Baad dak rajil bilimu ma hiya ashan bikun rajil hiya wa hiya bikun mara ta rajil de . ¹⁴ Lakin iza kan ma mortaa ma mara de keli huwo fiku mara de keli ruwa fi mahal al hiya deir, lakin rajil de ma bi jibu mara de ma gurus. Wa ma biamulu hiya ze kadama ashan rajil de geni ma hiya kalas. ¹⁵ Iza kan rajil indu itnein nusuwan al huwo gi hibu wahid wagi akrah tani, wa nusuwan del kulu weledu iyal, iza kan jena bikir min mara al rajil ma deiru , ¹⁶ Fi zaman wa yom al abu de fekir ashan bigesimu mawarid towo le awolad towo ze worisa, huwo ma bikutu weled ta mara al huwo gi hibu ashan bikun bikir towo gubal weled ta mara al huwo gi aba, weled al hagiga yawu bikir ta beit towo. ¹⁷ Lakin lazim huwo keli aruf gali weled ta mara al huwo ma gi hibu de yawu indu hak, huwo yawa bishil maratein min hahat al kan bigesimu le awolad bitowo. Le anu huwo yawo bidayata guwa ta rajil de,hak ta bikir bikun ta weled de. ¹⁸ Iza kan rajil indu weled al mostahbil wa motamerid al ma bi asma sout ta abu wa uma bitowo, hata kan abu wa uma wonusu le weled de huwo ma bi asma umon. ¹⁹ Biga abu wa uma bishilu weled tomon le shiyuk ta medina dak fi bab ta medina, ²⁰ Humon bikelim le shiyuk ta medina, weled tanina de mostahbal wa mutamerid, huwo ma gi asma le kalamat ta nina, huwo tama wa zol ta merisa. ²¹ Biga rujal kulu ta medina bi durubu weled de ma hujar lahadi huwo bimutu, ma intum bi shilu sher bara min nus takum. Kulu nas ta Israel bi asma wa kafu. ²² Iza kan zol amulu katia al bistehik mutu. Bikatulu huwo.intum bihaligu huwo fi kasab, ²³ Jisim ta zol de ma bifadulu fi hasab bilel kulu, keli dofunu huwo fi nefyom dak, ashan ayi zol al bihaligu fi kashab moloun intum ma binijisu beled al .yahwa gi ruwa wodi le intum ze worisa