¹ De yau Kelimat al Mosa wunuso le kulu Israel Baat ma umon talla min Urdon fi sahara, safa ta nahar Urdon be gidam ta Sof, bain Faran, wa Tofal, wa Laban, Hadirud, wa zi Zahab. ² De mushwar ta hidashar yom min Horeb be sika ta Jebel Seir le Gadish Barnea. ³ Hasil fi sena nimra arbeiin, fi shahar hidashsr, fi awel yom ta shahar, Mosa wunuso le shaab ta Israel, bi weri le umon ayi haja al Yahwah weri le hou be kusus umon. ⁴ De baat ma Yahwah hajimu Sihon melik ta Ammoriin, fi Hashbon, wa Uj melik Bashan, al sakin fi Ashtaros fi Izrei. ⁵ Baat ma umon tala min Urdon, fi ard ta Mowab, Mosa bada alinu ganoon, wa wunuso, ⁶ ''Yahwah Allah ta nina wunuso le nina fi Horeb, kelim 'Itakum geni kifaya fi jebel de. ⁷ Kede itakum ithawal le safa ta jebel ta Amoriin wa mahalat al gerib hinak fi wata safa bahar Urdon, fi safa jebel, wa wata al wate, safa ta Junub, taraf bahar beled ta Kanaanin, wa fi Lobnan le nahar al kebir, nahar al Farat. ⁸ Ayinu Ana kutu wata de gidam takum; rowa imtelik wata al Yahwah waaido le abuhat taki takum Ibrahim wa Ishak wa Yagub inu Huo bi wedi le umon wa le iyal tumon baat umon.' ⁹ Ana wunuso le itakum fi wekit dak, Ana kelim, Ana ma bi agider arfa itakum ana baraw. ¹⁰ Yahwah Allah takum ziddu itakum, wa ayinu, itakum alela biga ze nukom ta sama min shukul ketir. ¹¹ Kede Yahwah Ilah ta abuhat takum, ziddu itakum alfi marat wa kede Huw bariku itakum ze ma Huw waaidu itakum! ¹² Lakin kef ana baru bi arufa tegilat takum, wa humum wa kisamat takum? ¹³ Azilu rujal al negitin, rujal al bi gfahim, rujal al indu suma kues min kulu gebila, wa bi kutu umon mugedimin takum.' ¹⁴ Itakum kelim le ana, 'Haja al itta kelim uwu kues le anina bi amulu.' ¹⁵ Yala ana shilu mugedimin ta gabail takum, rujal ta hikma, wa rujal al indu soma kues, wa kutu umon mugedimin le itakum, ruwasa ta alaaf, ruwasa ta miyat, ruwasa ta kamsinat, ruwasa ta asharat, wa musuoli, gebila le gebila. ¹⁶ Ana amiru kuda takum fi zaman dak, kelim le umon, 'Asuma takum mashakil bainu akuwana takum wa hakimu takum be asdala bainu ayi zol ma aku tuo, wa ajanib al fi nus takum. ¹⁷ Matakum amulu tefriga le ayi zol fi mushkila; itakum bi asum le al kebir wab al suker sawa. Matakum kafu min usa ta ayi zol, lanu hukum de min Allah. Mushkil al saab le itakum, itakum bi jibu le ana, wa ana bi asuma le mushkila de.' ¹⁸ Ana weri le itakum fi zaman dak an kulu hajat al itakum bi amulu. ¹⁹ Anina rahalo bara min Horeb wa mururu be Sahara al kebir wa mukif al itakum ayinu, fi sika ta nina le jebel beled ta Ammorein, ze ma Yahwah Ilah ta nina kelim le anina; wa anina ja le Gadish Berni. ²⁰ Ana kelim le itakum, 'Itakum ja le beled al jebel ta Ammorein, al Yahwah Ilah ta nina gi ruwa wedi le anina. ²¹ Ayinu takum, Yahwah Ilah takum kutu wata de gudam takum; ruwa takum, wa shilu, ze ma Yahwah, Ilah ta Abuhat takum kelim le itakum; matakum kafu, wa geliba takum kede ma karabu.' ²² Kulu zol min itakum ja le ana wa kelim, 'Kede anina rasulu nas gidam ta anina, ashan umon bi ayinu wata de le anina, wa bi jibu le anina kabara an kef anina bi ageder hajimu, wa mudun al anina bi ja fugu.' ²³ Nesiha de kan farihu ana kues; Ana rasulu itnashar rujal min itakum, rajil wahid min kulu gebila. ²⁴ Umon rija wa ruwa le beled ta jebel, wa umon ja le wadi Ashkol, wa jasisu uwu. ²⁵ Umon shilu baad min simar ta beled de fi iden tumon wa jibu tihit le anina. Umon kaman jibu le anina kabara wa kelim, 'De beled al kues al Yahwah der wedi le Anina de.' ²⁶ Lakin itakum aba hajimu, lakin itakum itmarad did wesiya ta Yahwah Ilah takum. ²⁷ Itakum ningning fi kiyam takum wa wunuso, ''Ashan Yahwah karihu Anina yau Huwo jibu anina min Masir, ashan bi selimu anina fi iden ta Ammorein ashan bi demiru anina. ²⁸ Hasa de anina bi ruwa wen? Akuwana ta anina sibu gulub ta nina kubu, umon kelim, 'Nas delin kubarin wa tuwalin min anina; mudun tumon kubarin wa tuwalin fuk le sama, wa kaman anina ayinu iyal Anak hinak.'' ²⁹ Yal ana kelim le itakum, 'Kede ma kuwfu itakum, wele kede itakum kafu min umon. ³⁰ Yahwah Ilah takum, al bi ruwa gudam takum, Huwo bi shakila le itakum, ze ma huwo amulu le itakum ayi haja fi Masir gidam uyon takum, ³¹ wa bardu fi sahara, mahal al itakum ayinu kef Yahwah Ilah arfa itakum, ze zol bi arfa jena tuo, fi ayi mahal al itakum ruwa fugu lahadi ma itakum wusulu le mahal de.' ³² Lakin bes fi kilima de itakum ma agder kutu sikah takum fi Yahwah Ilah takum, ³³ al ruwa gidam takum ashan bi ligu le itakum mahal ashan itakum bi dugu kiyam takum, fi nar be bilel wa sihab be nahar. ³⁴ Yahwah asuma suot ta kelimat takum wa huwo talla zalan; Huwo halifu wa kelim, ³⁵ 'Hagiga wele wahid min nas de min jil al sherir de bi ayinu wata al kues al Ana halifu ashan bi wedi le abuhat takum, ³⁶ ele Kalib jena ta Yafnah. Huwo bi ayinu wa Ana bi wedi le huwo wa le iyal tuo wata al huwo dusu kura fugu, lannu huwo duwro wara tai be geliba kulu.' ³⁷ Wa Yahwah kaman kan zalan min ana be sabab takum kelim, 'Itta kaman ma bi wusulo hinak; ³⁸ Joshua jena ta Nun, al bi wegif gidam taki, huwo bi wusulo hinak; shaja huwo, ashan huwo yau bi gedima Israel ashan bi werisu mahal de. ³⁹ Ama iyal takum al itakumkelim bi kun dehiya, al aleela umon ma atrufu shunu kues wa batal - umon bi wusulo hinak. Ana bi wedi le umon, umon bi weriso. ⁴⁰ Lakin le itakum, rahalu takum safa ta sahara al bi ruwa be sika bahar Sof.' ⁴¹ Yala itakum juwabu le ana, 'Anina amulu katiya gidam ta Yahwah; anina bi ruwa wa shakila, wa anina bi amulu ayi haja al Yahwah kelim kede anina amulu.' Ayi rajil fi nus takum shilu silah tuo ta harib, wa itakum kan jahizin ashan bi hajimu beled de. ⁴² Yahwah kelim le ana, 'Kelim le umon, Matakum hajimu wa matakum shakila, ashan Ana ma bi kun ma itakum, wa bi gilibu itakum be addu takum.' ⁴³ Ana wunuso ma itakum be teriga de, lakin itakum ma asuma. Itakum itmarad did wesiya ta Yahwah; iatkum gufulu ras wa hajimu jebel de. ⁴⁴ Lakin Ammorein, al gi geni fi jebel dak, umon talla bara le itakum wa turuju itakum ze duban assel, wa drubu itakum tihit fi Sair, lahadi Hormah. ⁴⁵ Itakum rija wa kure gidam ta Yahwah; lakin Yahwah ma asuma le sout takum, wele Huwo kutu bala le .itakum. ⁴⁶ Yala itakum geni fi Gadish ayamat ketir, al itakum fi hinak