¹ Cho omo mubthzile ku Yelusalema, betele muyehi na bimbaka by a Mbetefange na Mbetani ha Munkinda wa Oliveta, na Yesu watumine bandongethi bendi babali, ² cho wabalekele ngweni, "'Yeni mulimbo lije lya talathana netu. Omu mu mukakobele muje, mukawana muna chimbulu auje kanda bendeleho. Mumu thzitule na kumu munena kuli yange. ³ Cho nga mumu woshe owo endeke ngwendi, 'Bika mulingila ngechi?' cho mwendeka ngweni, 'Shukulu ali na kumutonda cho lalo aka mwilwitha kuno.'" ⁴ Ngocho baile cho baka mu wanene uje chimbulu bamu kutilila ku chikolo cha njubo ku mukulo wa tapalo, cho baile na kumuthzitula. ⁵ Bamo banu bemanene kuje babehwile ngwabo, "Bika mulinga muli na kuthzitula owo chimbula?" ⁶ Bakebo ba kumbulwile mwaba lekele Yesu, Cho nabaje banu ba bechele kuya mungila yabo. ⁷ Banenele ujemuna chimbulu kuli Yesu na kujala mikanjo yabo hamwongo wendi cho watumameneho. ⁸ Banu babengi bajalele mikanjo yabo mukwakwa, beka nawa ba jalele minango iba tetele mu mahya. ⁹ Boshe baje balibangele kulutwe na baje bamukabele munima bashangumukila kutambeka "Hosanna! Wabethzika woshe ou akaija muli thzina lwa Shukulu. ¹⁰ Bwakukwithulila bumwene obu bwija bwa tate yetu Daviti! Hosanna mu melu!" ¹¹ Cho Yesu wakobelele mu Yelusalema na kuya mutembele cho watalele talele byoshe. Mwafwa wakuhwa kwa thimbu, mukemo ayile ku Mbetani na bandongethi bendi likumi babali. ¹² Lya mukwabo mubakele natunda ku Mbetani, wathzibile njala. ¹³ Mwamwene muti wa mukuyu uli na maputa ha lyala, wayile muyehi na kumona ngwe kuli bushuka ku muti, oloni omo weteleko waka waneneko maputa lika, mwafwa ku yakele thimbu yao ya kwima bushuka. ¹⁴ Yesu wendekele kuli uje ngwendi, "Nambe umo akalya bushuka kutunda kuliyobe lalo wahi." Naba ndongethi bendi bathzibileko. ¹⁵ Omo betele mu Yelusalema, wakobelele mu Tembele cho washungumukile kusheka boshe baje bakele nakulanda na kulandulula mu Tembele. Wafulumikile bimesa bya baka kulandakana bimbongo na bitwamo bya baje boshe baka kulandetha mayembe. ¹⁶ Katabethele nawa munu nambe umo ambate bibala biba natha kulandulula mukati ka Tembele. ¹⁷ Athinoni wabalongethele ngwendi, "Kumani ku chathonekewa, 'Njubo yange bakayithana kupwa Njubo yama lombelelo ya mafuti oshe'? Oloni yeni munaipwitha mbulu ya bethzi." ¹⁸ Tupilithitu ba bakulunu na baka kutoneka majwi a mashiko bathzile byendekele, ngechi ba shakele ngila ya kumuthsiyilamo. Oloni bakele na lyoba mwafwa mbunga yoshe yalikomokelele ha bilongetho byendi. ¹⁹ Muchetele chingwethzi, batundile munganda ije. ²⁰ Mubakele na Kwenda mutondo, bamwene uje muti wa mukuyu woshe unomu chau na kumithzi yawo. ²¹ Petulu wanukile byalingikile cho wendekele ngwendi, "Mulongethi, Kenga! uje muit uwathingile unomu." ²² Yesu wabakumbulwile ngwendi, "Kaleni na lukulahelo muli Njambi. ²³ Mwa buthunga njimileka ngwange woshe uje endeka ku Munkinda ou ngwendi, 'katuka na kulyumbila mulishali,' cho kakanangana mu mbunge yendi oloni akulahela ngwendi ebi byanendeka bilingika, obyo bikebyo Njambi akulinga." ²⁴ Choni njimileka ngwange: Byoshe obyo bimulomba mu malombelo eni, kulaheleni ngwendi muna tambula, cho byoshe bikala byeni. ²⁵ Omo mu mwimana na kulomba, munapande kukonekela bakañolebeni boshe, ngechi Isheni alimwilu amikonekela lalo neni milonga yeni." ²⁶ Oloni nga yeni kumukonekela ku milonga yeni. ²⁷ Bethzile ku Yelusalema lalo. Omo Yesu wakele na kwenda mu Tembele, tupilithitu ba bakulunu, balongethi ba maju a mashiko na ba kulunu bethzile kuli ikeye. ²⁸ Cho bendekele ngwabo, "Na ndzili yeyajo ulinakulinga byuma ebi, nambe iya nakwana ndzili ya kubilinga?" ²⁹ Yesu wabakumbulwile ngwendi, "Nange njimihula chihula chimo. Njilekeni nange lalo njimileka na ndzili muka njili na kulinga byuma ebi. ³⁰ Kumbwitika kwa Yowano, Kwatundile kwilu indi kuli banu? Nji kumbululeni." ³¹ Ngechi bathimutwilile mukati kabo na kuli byanangana ngwabo, "Nga tukumbulula ngwetu, 'Chatundile kwilu,' cho ikeye endeka ngwendi, 'Bikajo ku mwamukulahelele Yowano?' ³² Oloni nga twendeka ngwetu, 'Yatundile kuli banu,' ... ." Bakele na lyoba lya banu, mwafwa banu boshe bakulahelele ngwabo Yowano wapwile Kapolofita. Ngechi ba mukumbulwile ngwabo, "Kututhzibuka." ³³ Ngechi bene Yesu wendekele ngwendi, "Nange cho kunjimileke na ndzili muka njili na kulinga byuma ebi."