¹ Babengi banambata chipangi cha kwaka hamo bukaleho bwa byuma bije bya lingiwile hakati ketu. ² Ngwe muje batuthethzelelebyo kuli baje bakaleho ba mwene na baje bangamba ba lijwi. ³ Ngechi bene,chinasholoka cha chibwa kuli yange nawa,mwafwa njinayongola byoshe kuputupa ku maputukilo,njanapande kukusonekelabyo yobe,shukulu Teofile, ⁴ Mangana uthzibuke buthunga bwa kushula bwa byuma bije biba kulongethele. ⁵ Mu matangwa a Helonde mwene wa ba Yunda kwakele mukakulombelela wa lithzina lya Zakaliya wa kuchikota cha Abiya; munakathzi wendi Elizabeta naikeye wapwile muka nanga ya alone. ⁶ Boshe bapwile ba buthunga ku mesho a Njambi, cho bendekele mwa mubwa mwakwononokela mashiko oshe na majwi a kuyula a Shukulu. ⁷ Oloni kubakele na mwana mwafwa Elizabeta wapwile mumba,cho boshe bapwile tukulukathzi ha thimbu ije. ⁸ Cho cha sholokele omwo Zakaliya wakele ku mesho a Njambi,wakele na kupanga chipangi chendi cha kulombelela. ⁹ Mwaya chithemwa cha kwangula mukaku lombelela muka napande ku kupanga,bamwangwile ku babengi linga a kakobele mu tembe;le ya Shukulu na kwenyeka bya bunikithi bwa bubwa. ¹⁰ Mbunga yoshe ya banu bakele na kulombelela haja hathimbu ya kwenyeka kwa bunikithi bwa bubwa. ¹¹ Cho kwasholokele kangelo ka Shukulu kuli ikeye na kwija na kwimana kuliboko kya chilyo cha mutula wa kwenyeka bya bunikithi bwa bubwa. ¹² Omwo Zakaliya wa mumwene,walijujukwilile,cho wathzibile lyoba. ¹³ Oloni kangelo wendekele kuli ikeye ngwendi, "Kethi uthzibe lyoba, Zakaliya,mwafwa kulomba chobe bana chithzibe. Munakathzi wobe Elizabeta akakita mwana wa munalume. cho uka muluka lithzina lyendi Yowano. ¹⁴ Cho ukakala na kumwahelela na kujolela, na babengi baka lithamba hakutrhemuka kwendi. ¹⁵ Akapwa wakama ha mesho a Shukulu. Kethi akanweko binyu nambe kunwa lya kushasha, cho aka shula mundthzindthzime wa kuthzila kutunda nawo mwimo lya baina. ¹⁶ Babengi namga ya Isilaele bakabelwitha kuli Shukulu Njambi yabo. ¹⁷ Akaya halutwe lya Shukulu mu mundthzindthzime na mubithzili bya Elija, kwilwitha bimbunge bya baishabo kubana babo na kujeneka kwononoka kuli baka mana a buthunga - kupwitha banau bakuli bwaithela mu kubandamena Shukulu." ¹⁸ Zakaliya wendekele kuli kangelo ngwendi, "Njikatanekeya batijo echi chuma? mwafwa yange njinapu kakulukathzi ka munalume cho munakathzi wange naikeye na kulubala mu matangwa endi." ¹⁹ Cho kangelo wamukumbulwile ngwendi, "Yange, Ngambiliyele,uje nemana muchela cha Njambi. Bananjitumu kwija na kwendeka kuli yobe,kuku helela bing'anda bya bibwa. ²⁰ "Tala! ukapwa ukabebbe,kuukatha kwendeka,nakweta halitangwa ebi byuma bikasholoka. Oloni yobe kuwa kulahelele majwi ange,chije baka thulithila hathimbu ya kutamo." ²¹ Cho banu bakele na kubandamena Zakaliya.Balikomokelele mwafwa weshwalele mu tembele. ²² Omwo watundilemo,kathele kwendeka kuli bakebo. Cho bathzibukile ngwabo namono chimona mu tembele. Cho wakele na kulinga bimwetho kuli bakebo na maboko endi cho wapwile kabebebe. ²³ Omwo matangwa endi akupanga ahwile,cho welukile ku njibo yendi. ²⁴ Hanima ya matangwa awa,munakathzi wendi Elizabeta wakele na chikute ha bingonde bitanu wa lishwekele. Cho wendekele ngwendi, ²⁵ "Ebi bikabyo Shukulu na njilingila omwo wanjitalele yange nakunjibethzikitha linga a njifumithe shwama yange ku mesho a banu." ²⁶ Mungonde ya butanu naimo,kangelo Ngambiliyele bamu tumine kuli Njambi kuya ku nganda ya Ngalileya ije batumbwile Nazaleta, ²⁷ Kuli mumbanda umo kanda alimoneho na munalume bahuhwile kuli munalume wa lithzina lya Yosefa,uje wapwile muka nanga ya Ndaviti,uje mumbanda kanda alimoneho na munalume lithzina lyendi wapwile Maliya. ²⁸ Wethzile kuli ikeye nakwendeka ngwendi, "Mitende,yobe wakubethzikitha manene! Shukulu ali nobe." ²⁹ Oloni walikomokelele ha kuthziba awa majwi cho lalo wakele na kulihula babenya kumeneka muka kuje kwapwile. ³⁰ Kangelo wendekele kuli ikeye ngwendi, "Kethi uthzibe lyoba,Maliya,omwo una wano kautetela kuli Njambi. ³¹ Kenga, ukemana muthzango cho ukakita mwana mwana wa munalume,mukamuluka lithzina lyendi Yesu; ³² cho ikeye akapwa wakama cho lalo baka muluka mwana wa munalume wa Njambi wa hakamwa.Shukulu Njambi akamwana litanda lyaba kukulwila yendi Ndaviti. ³³ Akayula baka njibo ya Yakobo myaka yoshe,cho obu bumwene byendi bukapwa bwa kujeneka kuhwa." ³⁴ Maliya wendekele kuli kangelo ngwendi, "Echi chikapwa bati,mwafwa kanda njilimonehe laja na munakume woshe?" ³⁵ Cho kangelo wamukumbulwile ngwendi, "Mundthzindthzime wa Kuthila ukeja haliyobe,na ndthzili ya Njambi ikakufwika.Uje wakuthila yiukamita bakamuthana muna Njambi. ³⁶ Kenga,kabushoko kobe Elizabeta naikeye nemana munthzango mubukulu kathzi bwendi.Ino ikeyo ngonde ya butanu naimo kuli ikeye,uje bathanene mumba. ³⁷ Omwo nachimo chahi chapwa cha kuhonwa kuli Njambi." ³⁸ Maliya wendekele ngwendi, "Tala,njinapu ngamba wa munakathzi ya Shukulu. Chilingiwe kuli yange ngwe muje muunendeka lijwi lyobe." Cho kangelo wamuthethzele. ³⁹ Cho Maliya wakatukile nakuya bwathibwathi kuli lifuti lya minkanda,munganda ya Yundeya. ⁴⁰ Waile munjibo ya Zakaliya cho wamenekele Elizabeta. ⁴¹ Cho chsholokelel ngwabo muje Elizabeta wathzibile kumeneka kwa Maliya,uje kakeke wa tumbukile mwimo lyendi,cho Elizabeta wa shulile mundthzindthzime wa Kuthzila. ⁴² Watambakanene na lijwi lya kukanguka na kwendeka ngwendi, "Uwa kukwithila hakati kabanakathzi,cho nabethzika uje iukakita. ⁴³ Omwo bikajo chinalingiwa kuli yange baina ya Shukulu yange baije kuli yange? ⁴⁴ Mwafwa tala,omwo lijwi lya kumeneka kwobe lyethzile mu matwi ange, kakeke mwimo lyange wa tumbukile na kujolela. ⁴⁵ Wakubethzika uje na kulahela ngwendi kukapwa kulithulithila kwa byuma bije babalekele kuli Shukulu. ⁴⁶ Maliya wendekele ngwendi, "Mbunge yange ishangathzala Shukulu, ⁴⁷ na mwonyo wange unabwahelela muli Njambi muyoyethi wange. ⁴⁸ Omwo watelele ndungo yendi wa munakathzi na kujeneka kumuthingimika. Cho taleni,kutunda lelo na kuya ku myaka ya kulutwe bakanjithana ngwabo muka kaubethzika. ⁴⁹ Mwafwa muka bithzili na njilingila byuma bya kama,na lithzina lyendi lya kuthzila. ⁵⁰ Kutetela kwendi kukwekuhwa kufuma ha chikota chimo lutwala ku chikota chikwabo kuli baje bakakumuthziba lyoba. ⁵¹ Ikeye na sholola binthzili na liboko lyendi; nashandola bakaku lyaletha kwa matumbe mubimbunge byabo. ⁵² Nafumithiho balithano halitanda lyabo cho na jundulu babandondo kubukama. ⁵³ Ikeye nakutitha bali na njala na byuma bya bibwa,oloni bampite nabasheke maboko-boko. ⁵⁴ Nana bukwathi kuli Isilaele ngamba yendi,linga anuke kumwetha kutetela. ⁵⁵ (ngwe muje wendekele kuli batatetu) kuli Abilahama na batekulwila bendi ku myaka yoshe. ⁵⁶ Maliya watumamene na Elizabeta bingonde bitatu cho welukile ku njibo. ⁵⁷ Cho thimbu ya Elizabeta ya thulumuna mwana cho wathulumwine mwana wa munalume. ⁵⁸ Bandambo na babushoko bendi bathzibile bije ngwabo Shukulu na mwetha kutetela kwa kama kuli ikeye,cho boshe babwahelelele hamo nendi. ⁵⁹ Cho chosholokele ha matangwa atanu na atatu,bethzile na kutuhula mwana. Bashakele kwa thana "Zakaliya" kumwindula lithzina lya baishe. ⁶⁰ Oloni baina bakumbulwile nakwendaka ngwabo, "Embwe.Tukamuthana Yowano." ⁶¹ Cho bendekele kuli ikeye ngwabo, "Kukethi kabushoko kobe ibaluka lithzina eli." ⁶² Cho banyateyeye baishe na kulinga bimyetho na maboko abo kumwihula lithzina lika ashaka mumuluka. ⁶³ Baishe balombele limanya lya kusonekaho cho wasonekeleho ngwendi, "Lithzina lyendi Yowano" cho boshe bailikomokelele hali echi. ⁶⁴ Hanjebene kanwa kendi kashokolokele na lilimi leyndi bali thzitwile.Wendekele na kulemetha Njambi. ⁶⁵ Lyoba leythzile muli boshe baje wayoyele nabo.Cho muthzimbu wa byuma ebi washondokelele mu lifuti lyoshe lya munkinda ya Yundeya. ⁶⁶ Boshe baje bawathzibile bawatulikile mu bimbunge byabo,ngwabo, "' Ou mwanike akafwa bati?'' mwafwa liboko lya Shukulu lya kele nendi. ⁶⁷ Baishe Zakaliya washulile na mundthzindthzime wa Kuthzila cho wapolofetele,ngwendi, ⁶⁸ "Kushangathzala Shukulu,Njambi ya Isilaele,mwafwa neja nakukwatha na kupatula banu bendi. ⁶⁹ Natujundwila mbinga ya kwoboka munjibo ya ngamba yendi Ndaviti. ⁷⁰ (ngwe muje wendekele mutunwa twa bapolofita bendi ktunda kuthang'ulu), ⁷¹ kwoboka kufuma kubitothzi betu na kutunda kuli baje boshe batuthzinda yetu. ⁷² Akalinga echi kusholola chikeketima kuli batatetu na kwanuka chikumiyo cha thzila. ⁷³ kulithinga kwendi kuje kwalithingile kuli Abilahama bakukulwila yetu. ⁷⁴ Walitabelele kutwana yetu linga,hakupwa baka kupatuka mu maboko abitothzi betu,cho tukamupangela kwa kujeneka kuthziba lyoba. ⁷⁵ mukuthzila na kwoloka ku mesho endi mu matangwa etu oshe. ⁷⁶ Eyo,nobe,mwanike,baka thana kalpolofita wa ha kamwa ya boshe. Cho ukaya kulutwe lwa Shukulu cho ukamubwahethela bingila byendi,nakubwahetha banu hakwija kwendi, ⁷⁷ kwana managana a kwoboka kubanu bendi mukwitila mukuthambetha ku bibi byabo. ⁷⁸ Echi chikalingiwa mwafwa kwa chikeketima cha Njambi,katuhwithila cheke ha mungungulu chijeja na kutukwatha, ⁷⁹ kwitila halibaje batumine mulithuthulungu na munthzindthzime wa buthsi.Akalinga echi kutwamena mendi etu mungila ya kwoloka." ⁸⁰ Cho mwana wakolele na kupwa wakukanyama mu mwonyo,cho wakele mu mambo kwetela halitangwa lyendi lya kulisholola kuli ba Isilaele.