¹ Amiiwa ne mupa nyeenga yeetu, ye wa mwiingilo wa kipwiilo akya kiji mu Kenkelea, ² mu kuuba amba anweeba mukoonshe ku mutaambula aye mwi Nkambo. Mukoobe bino mu jishiinda ja fwainwa baantu bazhila ba Lesa, ne ku mukwaasha mu byoonse bya kukajilwa byo a fwainwa kusaka kwi anweeba, pakuuba wajiinga nkwaasho mukataampe ku bavula ne kwi amiiwa mwiine. ³ Be munai ba Pilisila ne Akwila, ba miingilo bakweetu mwi Kilishitu Yesu, ⁴ abo basakile kwela myeo yaabo na maambo ami. Amiiwa napaana lusaanchilo kwi abo, kabiiji keechi amiiwa yeenka ne, mino ne bipwiilo byoonse bya ba Ngentila. ⁵ Imunai kipwiilo kiji mu mazuubo abo. Imunai Epaenetusa muteemwe waami, aye ye kipaangwa kitaanshi kya ku Asha kwi Kilishitu. ⁶ Imunai Maliya, ao wi mwiingijila anweeba na ngovu. ⁷ Imunai Andelonikusa ne Yuniya, baloongo baami ba balume kabiiji batuili bakweetu. Abo bayuukanyikwa buloongo mukachi ka batuumwa, kabiiji bajiinga bataanshi mwi Kilishitu amiiwa sa nkyaangye. ⁸ Imunai Ampiliatusa, muteemwe waami mwi Nkambo. ⁹ Imunai Ubanusa, mukweentu wa mwiingilo mwi Kilishitu, ne Satakisa, muteemwe waami. ¹⁰ Imunai Apelesa, waitabilwa mwi Kilishitu. Imunai aba ba mu nzuubo yakwa Alisatobulusa. ¹¹ Imunai Helodiona, muloongo waami wa muluume. Imunai aba ba mu nzuubo yakwa Nakisusa aba baji mwi Nkambo. ¹² Imunai Tilifaena ne Tilifosa, ba mwiingilo mwi Nkambo. Imunai Pesisa muteemwe, ao waingila na ngovu mwi Nkambo. ¹³ Imunai Lufusa, wasalwa mwi Nkambo, ne ba inaanji kabiiji baami. ¹⁴ Imunai Asinkilitusa, Fulegona, Hemesa, Patilobasa, Hemasa, ne baloongo bo baji naabo. ¹⁵ Imunai Filologusa ne Yuliya, Neleusa ne ba nyeenga yaanji, ne Olimpasa, kabiiji ne baantu bazhila boonse ba Lesa bo baji naabo. ¹⁶ Mwi imune umo ne mukwaabo na kwifyoompa kwa zhila. Bipwiilo byoonse bya Kilishitu bi mwimuna. ¹⁷ Pano amiiwa ne musaanshijila anweeba, baloongo, kujimuka na booba baleengesha maabano ne kwi tuuntula ku mafuunjisho ao o mwabujile kufuunda. Mukaabane naabo. ¹⁸ Pakuuba baantu noobe babibye keechi beengijila Nkambo yeetu Kilishitu ne, mino beengijila muunda mwaabo beene. Na kunekena kwaabo ne byaambo byaabo bya mulambisha ba beepa michima ya ba kaele. ¹⁹ Pakuuba kya kumweenako kyeenu kya lukookelo kyafika ku boobse. Amiiwa na sekela, byonkabyo, kukiila anweeba, mino amiiwa nasaka anweeba kwiikala ba maana ku byooba byawaama, kabiiji bakaele ku byo bya byabiipa. ²⁰ Lesa wa muteende katataka akanyaante Sataana muunshi ya maulu enu. Buupe bwa Nkambo yeetu Yesu Kilishitu bwiikale ne anweeba. ²¹ Timoti, wa mwiingilo mukweetu, wi mwiimuna anweeba, ne Lukiusa, Yasona, ne Sosipata, baloongo baami. ²² Amiiwa, Tatiusa, ba neemba ino nkalata, twi mwiimuna anweeba mwi Nkambo. ²³ Gaiusa, wa ntaambwijile amiiwa ne na kipwiilo kyoonse, twi mwiimuna. Elasitusa, kalama wa muzhi, wi mimuna, na Kotusa muloongo. ²⁴ Ne buupe bwa Nkambo yeetu Yesu Kilishitu bwiikale ne anweeba boonse. Amena. ²⁵ Pano kwi aye ubeena kukoonsha kwi mukosesha anweeba mwaila maambo ami awaama ne kusapwiila kwa aye Yesu Kilishitu, moonka mwaila lumweekesho lwa bya fyamika abyo byo ba fiile pa myaaka yakala ²⁶ mino luno be bisolola kabiiji ne kuyuukanyikwa kupichila mu kuneemba kwa bu ngauzhi ku byaalo byoonse, na mukaambizho wa Lesa wa myaaka, mu kuleeta lukookelo lwa lwiitabilo- ²⁷ kwi Lesa yeenkatu wa maana, kupichila mwi Yesu Kilishitu, kwiikale lukuumo kikuupu. Amena.