¹ Taambwilai boonse banekena mu lwiitabilo, kwa kubula kuchiba maambo pa mapata. ² Muuntu umo uji na lwiitabilo lwa kuuja biintu byoonse, mukwaabo wa nekena ujatu bishu. ³ Lekai awa uja byoonse abule kuleengulula awa ubula kuja; kabiiji lekai awa ubula kuja byoonse keechi a chibile bakwaabo babula kuja byoonse ne. Pakuuba Lesa wamuuswa aye. ⁴ Obeewa wi ng'anyi, obeewa uchibila wa mwiingilo wa mukweenu? Ke kwi nkambo yaanji ko emana nangwa kupona. Mino ukaleengwa waimana, Pakuuba Nkambo aye wakoonsha ku muleengesha kwiimana. ⁵ Muuntu umo uneemeka juuba jimo kukila jikwaabo. Mukwaabo wapwiisha amba mooba oonse ajitu pamo. Lekai muuntu yeense ashininwe mu maana anji mwiine. ⁶ Awa ulama juuba , wijilamina Nkambo; kabiiji ne yeewa uja, ujiila Nkambo, Pakuuba aye upaana saante kwi Lesa. Awa ubula kuja, ubula kujiila Nkambo; aye naaye upaana saante kwi Lesa. ⁷ Pakuuba kafwaako nangwa umo mwi atweeba wiikala mwiine ne, kabiiji kafwaako ufwa mwiine ne. ⁸ Pakuuba inge twaikala, twiikela Nkambo, kabiiji inge twaafwa, tufwiila Nkambo, Kabiiji nangwa twaikala nangwa twaafwa, twi ba kwa Nkambo. ⁹ Pakuuba na ano maambo Kilishitu wafwiile kabiiji waikajile jibiji, amba aye akoonshe kwiikala Nkambo wa baafwa pamo ne booba boomi. ¹⁰ Mino anweeba, kiika kyo muchibila baloongo beenu? Kabiiji ne anweeba, kiika kyo muleengulwila baloongo beenu? Pakuuba atweeba boonse tukeemana ku meeso a kipoona kya bunchiba maambo bwa Lesa. ¹¹ Pakuuba kya neembwa amba, "Byoonji muumi," byo bya amba Nkambo amba, "Kwi amiiwa manuungo onse a kafukama, kabiiji lujiimi loonse lukashimuna kwi Lesa." ¹² Byonkabyo kabiiji, atweeba boonse tukeluumbulwila kwi Lesa. ¹³ Onkao maambo, tuleke kwiichibila maambo umo ne mukwaabo, mino kulaanguluka kino, amba kafwaako nangwa umo ukabiikila jiibwe ja kwi tuuntulako nangwa kiteewa muloongo waanji ne. ¹⁴ Amiiwa nayuuka kabiiji ne kushininwa mwi Nkambo Yesu amba kafwaamo kyabula kutooka akyo kiine ne. Kanaatu aye mwiine umona byoonse kwiikala byabula kutooka, byaanji keechi byatooka ne. ¹⁵ Inge muloongo oobe wituuntula maambo a nshima, keechi ubeena kweenda mu buteemwe ne. Keechi umonaune na kajo koobe aye ye a fwiijile Kilishitu ne. ¹⁶ Byonkabyo keechi muswiishe byo mumona kwiikala bya waama kwaamba noobe byatama ne. ¹⁷ Pakuuba bufumu bwa Lesa keechi bwa kajo nangwa bya kutooma ne, mino bwa pa bololoke, muteende ne lusekelo mu Mupashi Wazhila. ¹⁸ Pakuuba awa wiingijila Kilishitu mu jino jishiinda waitabilwa kwi Lesa ne kuswiishiwa na baantu. ¹⁹ Byonkabyo kabiiji, lekai tukabile biintu bya muteende kabiiji ne biintu bikosesha umo ne mukwaabo. ²⁰ Keechi moonaune mwiingilo wa Lesa na maambo a kajo ne. Biintu byoonse byatooka, mino kyaatama muuntu kuja biintu abya bileengela muuntu mukwaabo kwi tuuntula. ²¹ Kya waama kubula kuja nyama, nangwa kutooma binyu, nangwa kuuba biintu kukiila bituuntulako muloongo oobe. ²² Lwiitabilo lo muji naalo, lulamai pakachi keenu ne Lesa. Watookwa awa ubula kwizhachisha aye mwiine na byo a swiisha aye. ²³ Awa uzhinauka wazhaatwa inge waaja, maambo keechi kyafuuma ku lwiitabilo ne. Kabiiji ne byoonse byabula kufuuma ku lwiitabilo bo bu ndeenga maambo.