¹ Baloongo bami, muchima waami usakisha kabiiji ne ba saanshijila kwi Lesa, na maambo a lupulukilo lwaabo. ² Pakuuba amiiwa nshimuna pe abo amba baji na kizaku kya Lesa, mino keechi na mwaila maana. ³ Pakuuba, keechi bomvwiisha bololoke bufuuma kwi Lesa ne, kabiiji basaka kuleenga bololoke bwaabo abo beene, abo keechi bepaine ku bololoke bwa Lesa ne. ⁴ Pakuuba Kilishitu ko kufikizha kwa mizhilo ya bololoke bwa muuntu yeense wiitabila. ⁵ Pakuuba Mosesa waneemba pa bololoke abwa bufuuma ku mizhilo amba: "Muuntu uba bino biintu ukeekala na buumi ⁶ Mino bololoke abwa bufuuma ku lwiitabilo lwaamba bino amba: "Keechi waambe mu muchima obe amba, 'Ba ng'anyi bakaya mwiulu?' (abyo, ko kuleeta Kilishitu paanshi); ⁷ kabiiji keechi mwaambe amba, 'Ba ng'anyi bakaya mu kaluunga kabula kupela?"' (abyo, ko kuleeta Kilishitu kufuuma ku baafwa.) ⁸ Mino kya amba'mba ka? "Byaambo biji peepi ne anweeba, mukanwa keenu ne mu michima weenu." Abyo byo byaambo bya lwiitabilo, byo tusapwiila atweeba. ⁹ Pakuuba inge na kanwa keenu mwa amba'mba Yesu ye Nkambo, ne kwiitaba mu muchima weenu amba Lesa wa mubuushishe kufuuma mu baafwa, mukapuluka. ¹⁰ Pakuuba na muchima muuntu wiitabila ne kwiikala na bololoke, ne na kanwa muuntu waamba kabiiji upuluka. ¹¹ Pakuuba bineembelo bya amba'mba, "Boonse betabile pe aye keechi bakaleengeshiwa buumvu ne." ¹² Pakuuba keechi kuji lupusaano pakaachi ka ba Yudea ne ba Ngiliki ne. Pakuuba yeenka Nkambo umo ye Nkambo wa boonse, kabiiji aye upeesha boose beeta pe aye. ¹³ Pakuuba boonse beeta pa jizhiina ja Nkambo ba kapuluka. ¹⁴ Pano bakoonsha kwiita byeepi aye amo mo babula kwiitabila? Bakoonsha kwiitabila byeepi mwi aye ye babula kuumvwa? Bakoonsha kuumvwa byeepi kwa kubula musapwiishi? ¹⁵ Kabiiji bakoonsha kusapwiila byeepi, nangwa be batuuma?-Byomkabyo kyaneembwa amba, "Byo awaama maulu a booba basapwiila maambo a waama!" ¹⁶ Mino keechi boonse bakookejile maambo a waama ne. Pakuuba Isaya wa amba'mba, "Nkambo, ba ng'anyi baitabila kwaamba kweetu?" ¹⁷ Byonkabyo lwiitabilo lufuuma ku kuumvwa, ne kuumvwa na byaambo bya Kilishitu. ¹⁸ Mino amiiwa na amba naamba, "Keechi ba umvwiine ne nyi?" Ee, ibyo. "Nkuuwa yaabo yaya pa ntaanda poonse, kabiiji ne byaambo byaabo kuumpelo ya ntaanda." ¹⁹ Kukilapopo, amiiwa na amba naamba, Isalela keechi wayuukile ne nyi?" Pataanshi Mosesa wa amba'mba, "Amiiwa nkemuleengesha anweeba kichima na babula kyaalo. Na kyaalo kyabula maana, amiiwa nkemulengela anweeba kuzhiingila." ²⁰ Kabiiji Isaya wachiinchikile biingi byo amba'mba, "Amiiwa bantaine ku booba babujile ku nkeeba amiiwa. Amiiwa na mweekele ku booba babujile kwiipuzha pe amiiwa." ²¹ Mino kwi Isalela waamba amba, "Juuba joonse amiiwa nataambikile mabooko ami ku baantu babula lukookelo ne ku baantu betoota."