¹ Paulo, kaili wa Kilishitu Yesu, ne muloongo Timoti, kwi Filemonyi, mutemwe mukweetu kabiji mukweetu mu mwiingilo, ² kabiji ne kwi Afya nyeenga yeetu, ne kwi Akipusa mushilika mukweetu, ne ku kipwiilo kisaambakena mu nzuubo yeenu. ³ Buupe bwiikale neenu kabiji ne muteende kufuma kwi Lesa Taata weetu ne Nkaambo Yesu Kilishitu. ⁴ Amiiwa na musaanchila Lesa waami bimye byoonse byo ne muteela mu miloombelo yaami, ⁵ maambo n'uumvwa pa lwiitabilo alo lo muji naalo kwi Nkaambo Yesu ne butemwe lo muji naalo pa baantu baanji bazhila. ⁶ Ndoomba naamba kushilaan'ana kwa lwiitabilo lweenu ku koonshe kwiikala kwaluumbuluka, byonkabyo mwiikale na kuyuukisha kwa biintu byoonse bya waama byotuji naabyo mwi Kilishitu. ⁷ Pakuuba amiiwa nji biingi na lusekeelo ne kukosa muchima maambo a butemwe bweenu, maambo michima ya baantu bazhika ba Lesa beikizha kwi anweeba, muloongo. ⁸ Onkao maambo, naangwa nji na luusa mwi Kilishitu lwa kwi mukaambizha anweeba kuuba byo mwafwainwa kuuba, ⁹ ke na maambo a butemwe, amiiwa pano mbeena kusaanshijila kwi anweeba-Amiiwa, Paulo, muuntu mukote, kabiji pano ne kaili wa Kilishitu Yesu. ¹⁰ Amiiwa mbeena kusaanshijila kwi anweeba na maambo a mwaanami Onesimusa, awa ye na semejile mu mfuungwa. ¹¹ Pakuuba kala wajiinga wa tuutu mkwi anweeba, mino luna uji na mwiingilo kwi anweeba ne kwi amiiwa pamo. ¹² Amiiwa na mubweezha kwi anweeba, aye ye muchima waami amiiwa mwiine. ¹³ Amiiwa nasakile kwiikala naanji byonkabyo obe noobe anweeba mubeena ku n'iingijila amiiwa sa nkiji mu mfuungwa na maambo a maambo a waama. ¹⁴ Mino amiiwa keechi nasakile kuuba biji byoonse pa kubula luusa lweenu ne. Amiiwa keechi nasakile byuubilo byeenu bya waama kwiikala byafuma mukukaanjikizha ne mino moonka mwaila kuswa kweenu kwa waama. ¹⁵ Kaampe na ano maambo aye bamufumishile kwi anweeba kimye kimo, byonkabyo amba anweeba mukoonshe kwiikala naanji jibiji myaaka. ¹⁶ Aye keechi ukeekalapo muzha ne, mino wa waama kukila muzha, muloongo mutemwe. Ye mutemwe kikatakata kwi amiiwa, kabiji ne kukilamo byonkabyo ne kwi anweeba, mu byoonse ku mubiji ne mwi Nkaambo pamo. ¹⁷ Byonkabyo inge muji ne amiiwa mu mwiingilo umo, mutaambwilai noobe amiiwa. ¹⁸ Inge wimuleenga maambo anweeba naangwa wi mukoongwele biji byoonse, bibiikai mwi amiiwa. ¹⁹ Amiiwa, Paulo, na neemba bino na kubooko kwaami amiiwa mwiine. Amiiwa mwiine nkafweeta- keechi kyaluumbulula amba mwa nkoongweshe anweeba beene ne! ²⁰ E e, muloongo waami, lekai mweene mwi anweeba mwi Nkaambo; ne kutuushisha muchima waami mwi Kilishitu. ²¹ Na luketekelo lwa lukookelo lweenu, mbeena kwi muneembela anweeba. Nayuuka amba mukoobe ne byakila pa byo na loomba. ²² Pa kimye kimootu, neengezhezhai amiiwa nzuubo ya bweenyi, pakuuba na ketekela kuuba amba kupichila mu miloombelo yeenu ba kaambwezha kwi anweeba. ²³ Epafalasa, kaili mukweetu mwi Kilishitu Yesu, wi mwiimuna anweeba. ²⁴ Byonkabyo ne Mako, ne Alistakusa, ne Demasa, kabiji ne Luka, ba miingilo bakweetu. ²⁵ Buupe bwa Nkaambo Yesu bwiikale na mupashi weenu. Amena.