¹ Kabiji Yehoba wa mwiichile Mosesa ne kumwaambila kufuma mu teente wa lusaambakeno amba, ² "Amba ku baantu ba mu Isalela ne kwi babuula amba, inge muuntu kufuma mweenu waleeta mulaambu kwi Yehoba, leeta noobe mulaambu obe wa nyaama naangwa kufuma mu jitaanga ja ba n'oombe naangwa ja mikooko. ³ Inge mulaambu waanji mulaambu wa kusooka kufuma mu ba n'oombe, wafwainwa kupaana wa mulume wabula bulema. Aka mupaane pakibelo kya teente wa lusaambakeno, pakuuba amba akataambulwe ku meeso a Yehoba. ⁴ Akateenteke kubooko kwaanji pa mutwe wa mulaambu wakusooka, kabiji ukataambulwa kupichila mwi aye amba a mufuuchile maambo anji aye mwiine. ⁵ Akepaye n'oombe mulume ku meeso a Yehoba. Baana bakwa Alona ba balume, ba n'aanga, bakaleete mashi ne kwi a saansa pa kyakusookelapo milaambu akyo kiji pa kibelo kya teente wa lusaambakeno. ⁶ Kabiji wafwainwa kusuba mulaambu wa kusooka ne kumuchibaula mu bipiimvwa bipiimvwa. ⁷ Poonkapo baana ba balume bakwa Alona n'aanga bakabaanze mujilo pa kyakusookelapo milaambu ne kuneengezha nkunyi ayo iji pa mujilo. ⁸ Poonkapo baana ba balume bakwa Alona, ba n'aanga, batuule bipiimvwa, kubiikapo ne mutwe ne mafuta, pa nkunyi iji pa mujilo uji pa kya kusookelapo. ⁹ Pakuuba bya muunda byaanji ne bijooma wafwainwa kwi byoovwa na meema. Poonkapo ba n'aanga bakasooke byoonse pa kya kusookelapo noobe mulaambu wakusooka. Kikafumya bweema bwa waama kwi amiiwa; ukeekala ke mulaambu wapaanwa kwi amiiwa na mujilo. ¹⁰ Inge mulaambu waanji wakusooka wafuma ku mikooko, umo mu mikooko naangwa umo mu ba mbuzhi, wafwainwa kupaana wa mulume wabula bulema. ¹¹ Wafwainwa ku mwiipaila ku kabeta ka kubuyeke ka ku kya kusookelapo ku meeso a Yehoba. Baana baakwa Alona, ba n'aanga, baka saanse mashi anji moonse moonse muumbaji ya kya kusookelapo. ¹² Aye wafwainwa ku muchibaula mu bipiimvwa bipiimvwa ne mutwe waanji ne mafuta anji, ne n'aanga akebituule pa nkunyi aya iji pa mujilo awa uji pa kya kusookelapo, ¹³ pakuuba bya muunda ne maulu wafwainwa kwi byoovwa na meema. Kabiji aye n'aanga aka mulaambule yeense, ne ku musooka pa kya kusookelapo. Ye mulaambu wakusooka, kabiji ukapaana bweema bwa waama kwi Yehoba; ukeekala ke mulaambu ukapaanwa kwi aye na mujilo. ¹⁴ Inge mulaambu waanji kwi Yehoba ukeekala mulaambu wa kusooka wa tun'onyi, byonkabyo wafwainwa kuleeta noobe mulaambu waanji naangwa wa nkuunda naangwa ngalamwe. ¹⁵ Kabiji aye n'aanga wafwainwa kuleeta ku kya kusookelapo, wafwainwa kuchibaako mutwe, ku musooka pa kya kusookelapo. Kabiji mashi ako ba keazuunzululemo ku lubaji lwa kya kusookelapo. ¹⁶ Aye wafwainwa kwaangata kibovu kyaako ne byoonse biikalamo, ne kwibitaaya kuunsa ya kya kusookelapo kulubaji lwa ku musela, mu mpuunzha ya buto. ¹⁷ Wafwainwa kwiikapabika ku byaapi byaako, mino kwiikabanyapo pabiji ne. Kabiji ne n'aanga ake kasooke pa kya kusookelapo, pa nkunyi iji pa mujilo. Ukeekala ke mulaambu wakusooka , kabiji kakafumya bweema ke mulaambu waleengwa kwi aye na mujilo.