¹ Bezalela waleengele ne jikwaachi ja lushimuno ja kichi kya mwiiba wa kaseelesele. Jaleepele ma kyuubichi abiji ne kichika,mu bwiipi bwaajo jaleepele kyuubichi umo ne kichika, ne mukuleepa kwaajo jajiinga kyuubichi umo ne kichika. ² Wavweetelepo ne golide yawaamisha mukachi ne paangye kuzhookoloshako kunsa ya muvumbo wa golide. ³ Waleengele nsaambo ina ya golide yaleepa ma kyuubichi ana, iji na nsaambo ibiji kulubaji lumo, kabiji ne nsaambo ibiji kulubaji lukwaabo ⁴ Aye waleengele ne myaamba ya bichi bya mwiiba wa kaselesele ne kuvweetapo golide. ⁵ Wabiikile myaamba iji muumbavu ya jikwaachi, mukuuba amba bakaseende jikwaachi. ⁶ Waleengele ne kizhiko kya kufuuchilako golide wawaamisha. Kyaleepele makyuubichi abiji ne kichika, ne kyuubichi umo ne kichika mubwiipi. ⁷ Bezalela waleengele ne bakelubi baibiji ba golide ya kubuunda, wibaleengele kuunsa ya kizhiko kyakufuuchilako. ⁸ Kelubi umo kuunsa ne kelubi mukwaabo kuunsa kulubaji lukwaabo, wibaleengele noobe kibese kimo kya kizhiko kya kufuuchilako. ⁹ Bakelubi batanyikile byaapi byabo peulu ne kuzhikapo kizhiko kya kuleekelwa maambo. Ba kelubi betajile umo ne mukwaabo kabiji batajile paluutwe ya pakachi ka kizhiko kya kufuuchilako maambo. ¹⁰ Bezalela waleengele tebulu wa kichi kya kaselesele. Mukuleepa kwaakyo kyaleepele makyuubichi abiji, mubwiipi bwaayo yajiinga kyuubichi umo, kabiji ne kuleepa kwaayo yajiinga kyuubichi umo ne kichika. ¹¹ Aye wi ivweetele na golide ya waamisha ne kubiika mupaka wa golide ya waamisha ne kuzhookolosha peulu. ¹² Waleengele fulemu wazhookoloka mu bwiipi noobe kuleepa kwa kubooko, mukuleepa ne kuzhookolosha mupaka wa golide wa fulemu. ¹³ Aye wasuungulwile nsaambo ina ya golide ne kwi ikwaachisha nsaambo ku makoonka ana, ako kwajiinga maulu ana. ¹⁴ Nsaambo beikwaachishe ku fulemu na maambo a kusha mpuunzha ya myaamba, mukuuba amba baseende tebulu. ¹⁵ Wapaangile myaamba kufuma ku kichi kya kaselesele kabiji wi ivweetele na golide, mukuuba amba baseende tebulu. ¹⁶ Wapaangile biintu byafwainwa kwiikala pa tebulu-byoowelo, bijiisho, michiba, ne miloondo ya kwiingijisha pa kupaana bya buupe. Aye waleengele kufuma ku golide ya wamisha. ¹⁷ Aye waleengele kya kutuulapo ma laampi kya golide wawaamisha wa kubuunda. Aye waleengele kitako kya kituulwapo laapi kyaakyo kabiji kya kubuunda. Ne makomeki akyo, ne kitako kya mabuula akyo, ne maluuba akyo aleengelwe na kibese kimo. ¹⁸ Misaampi itanu ne umo beibaishe kufuma mu lubaji lumo ne lukwaabo, kabiji ne ikwaabo isatu ya kyakutuulapo laampi beibaishe ku lubaji lukwaabo. ¹⁹ Musaampi mutaanshi wajiinga na ma nkomeki asatu aleengelwe noobe maluba a mu moonde asapuka, ne jibuula kuunsa ya jiluba, kabiji ma nkomeki onse asatu aleengele noobe maluba a mu moonde asapuka ku misaampi yaayo, ne jibuula ja kuunsa ne jiluba jajiinga pamootu na onse atanu ne jimo jajiinga pamo na onse atanu ne jimo misaampi ya kunuungapo kufumu ku kyakutuulapo laampi. ²⁰ Kabiji pa kya kutuulapo laampi kiine, ne pakachi yakyo kya kya zhookoloka, pajiinga ma nkomeki ana aleengelwe na maluba a amoonde, ne mabuula akyo kuunsa ya maluba. ²¹ Kabiji kwajiinga ne jibuula kuunsa ne akwaabo abiji ku mabuula aleengelwe noobe kibese kimo kiine, mujishiinda jikwaabo kwajiinga ne jibuula kuunsa ya kwajiinga ibiji misaampi ayo yapaangilwe nakimo kibese kine. Mujishiinda jimootu pajiinga jibuula jo ba biikile paanshi pakibese kya busatu kya misaampi, kyaleengelwe noobe kibese kimo. Kyajiingatu pamo na misaampi yoonse yo banuungileko ku misaampi itanu ne umo ku kya kutuulapo laampi. ²² Kunsa ya jibuula ne misaampi yakyo byoonse byajiingatu na kibese kimo kimo, kimo kibese kyaleengelwe buloongo kya golide ya waamisha. ²³ Bezalela waleengele ne malaampi atanu ne abiji ne kya kutuulapo malaampi, ne tumimano twaakyo ne twa kutootomwenapo buuto twa golide wa waamisha. ²⁴ Waleengele ne kya kutuulapo laampi ne bya kwiingijisha ne jitaleenta jimo ja golide wa waamisha. ²⁵ Bezalela waleengele ne byakufutumuna pa kya kusookelapo. Kya paangilwe na kichi kya mwiiba wa kaselesele. Kuleepa kwaakyo kwajiinga na makyuubichi umo, ne mubwiipi bwaakyo kyuubichi umo. Kyaesakenetu pamo, ne mukuleepa ma kyuubichi abiji. Ne nseengo yaakyo yaleengelwe na kibese kimo kyaakyo. ²⁶ Wavweetelepo ne bya kufutumuma pa kya kusookelapo bya golide wa waamisha-ne pa muvuumbo wakyo, ne muumbavu yaakyo, ne ku maseengo akyo. Waleengele kyazhookolokele mupaka na golide. ²⁷ Waleengele ne nsaambo ibji ya golide ikwaata ku kimo muunshi ya mupaka ibiji yapusana. Ne nsaambo yajiinga ya kukwaachilako myaamba pa kuseenda kya kusookelapo bitapisho. ²⁸ Waleengele myaamba ya kichi kya mwiiba wa kaselesele, kabiji wi ivweetele na golide. ²⁹ Waleengele ne maanyi azhila a kushiinga ne bya kufuutumuna bya wamisha, biji na bweema bwa wamisha, mwiingilo wa usaansa binuunka buloongo.