¹ Yehoba wa ambile kwi Mosesa amba, ² "Ambila beena Isalela batwaale milaabu yaami kufuma ku muuntu yeense watuundaikwa na muchima wakizaku. Obeewa ukantaambwine abino bya buupe byaami. ³ Aino yo milaambo yo wafwainwa kutaambula kwi abo: Golide, siliva, ne lubeemba; ⁴ wafiituluka, wachiluluka, ne bisapi bya lineenyi; ne booya bwa ba mbuzhi; ⁵ ne mwai wa mwaana mukooko ye basoombela na musoombelo uchila ne myai ya banyaama bakataampe; ne bichi bya mwiiba wakaselesele; ⁶ Maanyi a mu laampi ya mu kipwiilo; ne binuunka buloongo bya maanyi a kushiinga ne maanyi a bya kufutumuna biji na bweema bwa waama; ⁷ Jiibwe ja onika ne maabwe a buneeme kubiika pa nsalu kabiji ubiike pa kyaaji. ⁸ Bakaandengele teente pakuuba amba ngikale naabo. ⁹ Mwafwainwa kuleenga kyaesakana byonka byo nkemumweesha mumilaangwe yaami kya kwiikalamo ne biingijisho byakyo byoonse. ¹⁰ Kabiji bakaleenge jikwaachi ja kichi kya akasha. Jaleepa makyuubichi abiji ne afu mubula; mubwiipi mwiikale kyuubichi umo ne afu; kabiji ne kimo naamo mwiikale kyuubichi umo ne afu. ¹¹ Mwafwainwa kwiikivweeta kyoonse mukachi ne paangye na golide waluumbuluka, kabiji mwafwainwa kuleenga mupaka wa golide kuzhookoloka peulu. ¹² Mwafwainwa kusuungulula nsaambo ina ya golide, ne kubiika pa ma koonka onse ana a jikwaachi, bikwaabo bibiji kulubaji lukwaabo, ne bikwaabo bibiji kulubaji lukwaabo. ¹³ Mwafwainwa kuleenga myaamba ya kichi kya mwiiba wa kaselesele kabiji ne kwi ivweeta na golide. ¹⁴ Mwafwainwa kubiika myaamba pa nsaambo iji mumbavu ya jikwaachi joonse, yakuseendelako. ¹⁵ Mwaamba wafwainwa kushaala mukachi ka nsaambo ya jikwaachi; Keechi kwi ifumyamo ne. ¹⁶ Mwafwainwa kubiika mkachi mu jikwaachi ja lulayaang'ano mafuunde o nkemupa. ¹⁷ Wafwainwa kuleenga kyakufuuchilako kizhiko kya golide wa waama. Mubula mwafwainwa kwiikala makyuubichi abiji ne afu, kabiji mubula mwafwainwa kwiikala kyuubichi umo ne afu. ¹⁸ Mwafwainwa kuleenga ba kelubi babiji ba kubuunda na golide wa kuunsa kuunsa kwa kizhiko kya kufuuchilako. ¹⁹ Muleenge kelubi umo wa kuunsa kumo kwa kizhiko kya kufuuchilako, kabiji ne mukwaabo kelubi wakulubaji lukwaabo. Byafwainwa kuleengwa mukipiimvwa kimo kya kizhiko kya kufuuchilako. ²⁰ Ba kelubi bafwainwa kutanyika byaapi byaabo peulu ne kuzhikapo biimvule pa kizhiko kya kufuuchilako. Ba kelubi bafwainwa kutazhaang'ana ne kutala pakachi ka kizhiko kya kufuuchilako. ²¹ Wafwainwa kutuula kizhiko kya kufuuchilako peulu ya jikwaachi, kabiji mwafwainwa kubiika mu jikwaachi mabwe a lulayaang'ano onsa kukupa obeewa. ²² Po pa jikwaachi po nkemusaambakena anweeba. Amiiwa nkaamba ne anweeba pa kifulo kyaami peulu ya kizhiko kya kufuuchilako. Pa keekala pakachi ka ba kelubi babiji pa jikwaachi ja lulayaang'ano a mafuunde o nkaamba neenu pa yoonse mikaambizho yo nkemupa pa maambo a baantu beena Isalela. ²³ Mwafwainwa kuleenga tebulu wa kichi kya kasele. Mubula mukeekale ma kyuubichi abiji; mu bwiipi kyuubichi umo, kabiji mu mbavu kyuubichi wa afu. ²⁴ Mwafwainwa ku muvweeta na golide wa waamisha ne kubiika mupaka wa golide peulu. ²⁵ Mwafwainwa kwiikilengela fulemu wazhookoloka kuboko kumo, na myaamba ya mupaka wa golide wazhookoloka. ²⁶ Mwafwainwa kwiikilengela nsaambo ina na golide ne kubiika nsaambo mu makoonka ana, moonka mwaila mikupa ina. ²⁷ Nsaambo yafwainwa kukwaata kukyazhookoloka mukuneengezha mpuunzha ya mibaanda, muyakushikwiilako tebulu. ²⁸ Wafwainwa kuleenga bichi bya mwiiba wa kasele ne kwi bivweeta na golide pakuuba amba tebulu bakamuseende abo. ²⁹ Mwafwainwa kuleenga michiba, bijiisho, miloondo, ne tutomeno tobeengijisha kwiitulwiilako bya kutoma bya buupe. Byafwainwa kuleengwa na golide wa waamisha. ³⁰ Wafwainwa joonse joonse kuneengezha shiinkwa ku meeso ami ku tebulu paluutwe yami. ³¹ Wafwainwa kuleenga kituulwapo ma laampi a kupaanga na golide. Kituulwapo ma laampi kikaleengwe na kitako kyaakyo kyazhookoloka, makomeki akyo ne bitako byao, ne kitako kyakyo kya mabuula, ne maluba akyo aleengwa mukimootu. ³² Misaampi itanu ne umo yafwainwa kufuma muubaji yaayo-misaampi isatu yafwainwa kufuma ku lubaji lumo, ne misaampi isatu ya kituulwapo laampi yafwainwa kufuma ku lubaji lukwaabo. ³³ Musaampi mutaanshi wafwainwa kwiikala na tutomeno tusatu twa paangwa noobe mabuula a amonde, ne kitako kyajibuula ne jiluba, ne makomeki asatu a leengwa na amonde ku musaampi mukwaabo, na jibuula ne kitako kya jiluba kyafwainwa kwiikala kyaesakana na atanu ne jimo misaampi ya kunuungako pa kituulwapo laampi. ³⁴ Pa kituulwapo laampi kine, kyapakachi kya zhookoloka, pakwainwa kwiikala tutomeno tuna twaleengwa noobe amonde, na mabuula ao ne kitako kyajibuula ne jiluba. ³⁵ Pafwainwa kwiikala kitako kya jibuula muunshi ya kibese kya misaampi-yaleengwa na kyeela kimo. Kabiji kitako kyajibuula paanshi ya kibese kya bubiji kya misaampi-naakyo kyapaangilwe kukyeela kimo. Kyafwainwa kwiikalatu kimo na misaampi isatu, mujishiinda jimootu mwafwainwa kwiikala na kitako kyajibuula paanshi ya kibaaba kyabusatu kya misaampi, kyaleengwatu kimo. Kyafwainwa kwiikalatu kimo ³⁶ na bitako byaakyo bya mabuula ne misaampi yafwainwa kwiikalatu nakyeela kimootu, kipiimvwa kyapaangiwa na golide wa waamisha. ³⁷ Mwafwainwa kuleenga paluutwe malaampi atanu ne abiji, ne kwiatula peulu malaampi pakuuba amba apaneenga kyeeya. ³⁸ Tubimamo twaakyo twakutootomwenamo buto twaakyo twafwainwa kuleengwa na golide wa waama. ³⁹ Mwiingijishe jitaleenta jimo ja golide wa waamisha ne kupaanga pa kubiika ma laampi ne bya kwiingijisha. ⁴⁰ Utesheeko muchima kwibyuuba panyuuma ya kumana byo na kumweesha pa mutuumba.