¹ Yehoba waambijile Mosesa ne Alona mu kyalo kya Ijipita. Waambile, ² ''Kwi anweba, uno n'oondo usa kwiikala wa kutatula kwa ba n'oondo, n'oondo mutaanshi wa mwaaka kwi anweeba. ³ Bulai jibumba jonse ja Isalela, 'Pa juba jikumi ja ng'ondo mwakonsha kusenda mwaana mukoko naangwa mbuzhi mu cheche pa muntu pa muntu, kisemi kyonse kyube bino, mwaana mukoko kuma zubo onse. ⁴ Inge pa nzubo bakepaya pa mwaana mukoko, wamulume ne ye elondela nanji basendetu mwaana mukoko nangwa nyaama ya mwaana mbuzhi ayo esakwese kana nambala ya baantu. Yafwainwa kuvula pakuba bonse bakaje, pafwainwa kwikala nyaama yavuula yakwibajisha bonse. ⁵ Mwaana mukoko obe naangwa mwaana mbuzhi wafwainwa kwikala wabula bulema, uij na mwaaka umo mulume. Mwafwainwa kusenda mukoko naangwa ba mbuzhi. ⁶ Mwafwainwa kuji sunga bulongo kufikatu ne pa juba ja butaanu na buna ja yewa ng'ondo. Kabiji jibumba jonse ja Isalela jilapaye bano banyama pa kimye kya ma banga. ⁷ Mukashikulepo mashi amo ne kwishinga pa mashiki onse abiji aku kibelo ne pa jipulanga ja peulu ya kibelo kya nzubo yenu apa mino ne kuja ino nyama. ⁸ Mwafwainwa kuja nyama abwa bufuku, pa nyuma ya kwi isoka pa mujilo. Muje na shinkwa ya kubula mbizho, ne na bishu byalula. ⁹ Kuja ibishi nangwa ya kuteka mu meema ne, mino mukasoke ku mujilo na mutwe, mukupa, ne bibese bya mukachi byonse. ¹⁰ Kabiji kechi musheko nangwa imo kufika lukelo ne. Mukasoke byonse bikashalapo lukelo. ¹¹ Bino byobyo mwakonsha kuja: samwanyinga mishipi yenu, ne makwabilo enu kumaulu, ne mikooko yenu mumaboko. Mukaje lubilo. Kyo kijilo kya Yehoba. ¹² Yehoba waambile bino: Nsakuya mukachi ka kyalo kya Ijipita bufuku na kupuma babeji ba bantu ne ba nyama mu kyalo kya Ijipita. Kabiji nkapingula bakishi boonse ba beena Ijipita. Ne Yehoba. ¹³ Mashi akekala ke kayukili ka pa mazubo enu pa kyiya kwaami kwi anweba. Inge namona mashi, nsakwimipitaila inge ndukukenga kyalo kya Ijipita.Kino kipumo kechi kisa kwiya komuji na kwi myonauna anweba ne. ¹⁴ Jino juba jikekala ke ja luvuluko kwi anweba, lwa mukejilama ke ja kijilo kya luvuluko lwa Yehoba; kya bisemi__kyo mukalama myaka yonse. ¹⁵ Mukaje shinkwa wakubula mbizho pa mooba atanu na abiji. Pa juba jitanshi mukafumya mbizho mu ma zubo enu. Awa yense ukaja shinkwa wakubula mbizho kufuma pa juba jitanshi kufikatu ne ku juba ja butanu na bubiji, awa muntu wafwainwa kuchibwa ko kubeena Isalela. ¹⁶ Pa juuba jitanshi pakekala kupwila joja nengezhiwa pe amiwa, kabiji pa juba ja butanu na bubiji pakekala kupwila jikwabo ja bubiji. Kafwako mwingilo wa kwingila pa ano mooba ne, kufumyakotu kutekela boonse amba baje. Ayo yoyonka mingilo yo mwafwainwa kuba. ¹⁷ Mukaje kino kijilo kya shinkwa wabula mbizho maambo kiji pa juuba jo nafumishe jibumba jenu mu kyalo kya Ijipita. Onkao maambo mukalamanga jino juba ku bantu beenu ne bisemi byeenu myaaka ne myaaka. ¹⁸ Mukaje shinkwa wa kubula mbizho kufuma mabaanga a pa juuba ja bu jikumi na buna mu ng'ondo mutanshi wa mwaaka kufikatu ne mabanga a mooba alenga makumi abiji na jimo a ng'ondo. ¹⁹ Mu ano mooba atanu na abiji, kafwako mbizho yafwainwa kwikala muma zubo enu.Awa yense ukaja shinkwa wapangwa na mbizho wafwainwa kumufuminamu kijiji kya beena Isalela, naangwa awa mweenyi wa kukyalo kingi naangwa waasemukile mu kyalo kyeenu. ²⁰ Kechi mukajepo biji byoonse bya pangwa na mbizho ne. Konse ko mwikala, mwafwainwa kuja shinkwa wapangwa kwa kubula mbizho. ²¹ Kabiji Mosesa waichile bakulumpe boonse ba /Isalela ne kwaamba kwi abo amba, ''Yinga mukasale mikooko naangwa baana abo bafwainwa kuvula bakujisha bisemi byeenu kabiji mwipaye mwaana mukooko wa kijiilo kya lupitailo. ²² Kabiji mukashikule ka kisampulo ka isopi ne kwi katumpa mumashi ao esakwikala pa nsaanyi. Mushinge mashi aji pa nsaanyi peulu ya mashiki ne pa kibelo pabiji. Kafwako naangwa umo wamwi anweba uka lupuka paangye ya kibelo kyanzubo yaanji ne kufika ne lukelo ²³ Pakuba Yehoba usa kupita mukachi na kutelelela beena Ijipita. Inge wamona mashi abiji a kibelo, usa kupitaila pa kibelo kyenu kabiji kechi muswishe ba lono kwiya mu nzubo yenu na kwi milukuka ne. ²⁴ Mukoobenga kino kisela. Uno ekale ke muzhilo wenu ne bantu benu. ²⁵ Inge mukatwele mu ntaanda ayo Yehoba yo emupa, nobe byonka byo alaya kuba, mukobe kino kyubilo kya kulomba. ²⁶ Inge baana beenu be mwipuzha, 'nga kino kyubilo kya kulomba kyatala mweepi?' ²⁷ Mwafwainwa kwaamba amba, 'kino ke kitapisho kya Yehoba kyalupitailo, maambo Yehoba wa kupitaila ma zubo a bantu ba Isalela mu Ijipita byo akuluku kanga beena Ijipita. Waji kukasulula mazubo etu.''' Kabiji bantu bafukamine panshi ne kupopwela Yehoba. ²⁸ Baantu ba Isalela baile kabiji baubile moonka Yehoba mo akambizhe Mosesa ne Alona. ²⁹ Kya mwekele pakachi kabufuku amba Yehoba walukukile babeji mu kyalo kya Ijipita, kufumatu kumubeji wa Felo, wikala pa jitanda janji kufikatu ne kumubeji wa kaili kabiji ne babeji boonse babinyama. ³⁰ Kabiji Felo waimene bufuku, ne bakalume banji boonse, kabiji ne bena Ijipita boonse. Mwajinga jibingo jikatampe bingi. Kechi mwajingapo nzubo mwabujile kufwa muuntu ne. ³¹ Felo waichile Mosesa ne Alona bufuku ne kwibambila amba , ''imanai,fumai muno ku bantu baami, aneba ne baantu ba Isalela. Yainga, kapopwelai Yehoba, nobe byo mwaambile byo mukeba kuba. ³² Sendai mikooko yenu ne bang'oombe beenu, monkamo mwaambila, kabiji muyenga, kabiji mumpeshe amiwa. ³³ Beena Ijipita bapelawizhile bingikwiba panga mukyalo kyabo, pakuba baambile amba, ''boonse tusa kufwa.'' ³⁴ Kepo baantu basendele mishishi yabo kwakubula kubikako mbizho. Masanyi abo beakashijile jimo mu bivwalo byabo ne pa bipuzhi byabo. ³⁵ Kabiji baantu baku Isalela baubile monka Mosesa mo ebabujile. Kabiji balombele beena Ijipita bya kwikobaika bya siliva, kabiji ne bya kwikobaika bya golode, ne bivwalo. ³⁶ Kabiji Yehova wibobile beena Ijipita kutula bulongo kubeena Isalela. Pakuba beena Ijipita bapayine byoonse byo beba lombele. Byonkabyo beena Isalela beba pukwile beena Ijipita. ³⁷ Beena Isalela baimene Lweendo kufuma ku lamesa kufika ku Sukota. Baana balume baendelenga panshi ke nobe biumbi bitota bitanu na kimo, kunungapotu ne ku bacheche. ³⁸ Kabiji ne jibuumba ja pusaana pusana jaile naabo, pamotu na mikooko ne bang'oombe, ne nambala mukatampe wa banyama. ³⁹ Balengele shinkwa wakubula mbizho na mishinshi yo basendele kufuma ku Ijipita. Yajinga yakubula mbizho maambo ba endele kufuma ku Ijipita kabiji kechi bakapembelenga kutaya kimye kunengezha kajo ne. ⁴⁰ Beena Isalela bayikele mu Ijipita pa myaka bitota bina ne myaaka makumi asatu. ⁴¹ Pakupelako myaka bitota bina ne myaaka makumi po asatu, pa jonkaja juuba, jibumba jonse ja Yehoba jafumine mu kyalo kya Ijipita. ⁴² Abwa bwajinga bufuku bwa kwikala na kulaba, pakuba Yehoba ake bafumye mu kyalo kya Ijipita. Abwe bwajinga bufuku Yehoba bo amwenenga baantu ne bisemi kimye kyoonse. ⁴³ Yehoba waambile kwi Mosesa ne Alona, ''uno ye muzhilo wa kijilo kya lupitailo: Kafwako mweenyi kuja ko ne. ⁴⁴ Naangwa byonkabyo, muzha yense wa Isalela, wakupota na maali, ukajako panyuma ya kumutwezha mumukanda. ⁴⁵ Kafwko mweenyi nangwa ufweetwa ukajako kajo kanji konse ne. ⁴⁶ Kano kajo kafwainwa kujiwa mu nzubo jimotu. Kechi muka lupushepo nyama iji yonse pangye ya nzubo ne, kabiji kechi mukachimune po nangwa kikupa kiji kyonse ne. ⁴⁷ Jibumba jonse ja Isalela jikalonde kino kijiilo. ⁴⁸ Boonse beenyi bekala nenu kabiji basaka kujako kijilo kya lupitailo kwi Yehoba, boonse bakilongo beenu babalume bafwainwa kutwalwa kumukanda. Mino bakeye na kutanwako. Ukekala noobe muuntu wasemekejilwe mu kyalo kimo. Naangwa byonkabyo, kafwako muuntu wabula kutweela mumukanda kujako kano kajo ne. ⁴⁹ Uno yenka muzhilo umotu ukapewa ku boonse babiji ku mwina kyalo ne kumwenyi wikala mukachi kenu.'' ⁵⁰ Kabiji baantu boonse ba ku Isalela baubile monka Yehoba mo ebakambizhe ba Mosesa ne Alona. ⁵¹ Yashile noobe pa jonkaja juuba Yehoba po afumishe beena Isalela mukyalo kya Ijipita na mabumba abo.