¹ Paulo, waichilwe kwi Yesu Kilishitu kwiikala mutumwa mu kusaka kwa Lesa, ne Sositenesa muloongo weetu, ² ku kipwiilo kya Lesa ku Kolinda, ku booba ba zhijikwa ba mwi Kilishitu Yesu, abo baitwa kwiikala baantu bazhila. Atweeba tubeena kuneemba kuboonse beeta pa jizhiina ja kwa Nkambo yeetu Yesu Kilishitu mu ma puunzha onse, Nkambo waabo kabiiji wetu. ³ Lekai buupe ne muteende biikale ne anweeba kufuuma kwi Lesa Sheetu ne Nkambo yeetu Yesu Kilishitu. ⁴ Amiiwa joonse mpaana kusaanta kwi Lesa waami na maambo a anweeba maambo a buupe bwa Lesa abo Yesu Kilishitu bo emipeele anweeba. ⁵ Aye wimuleenga anweeba kwiikala banoonshi mu jishiinda joonse, mukwaamba koonse kabiiji ne na maana onse. ⁶ Kabiiji noobe lushimuno pe Kilishitu byo lwa swiishiwa amba bwa kiine mwi anweeba. ⁷ Byonkabyo mwabula buupe bwa Mupashi sa musakisha kupeembelela lumweekesho lwa kwa Nkambo yeetu Yesu Kilishitu. ⁸ Ne aye ukemukosesha anweeba ne ku mpeelo, pakuuba mukabule maambo pa juuba ja Nkambo yeetu Yesu Kilishitu. ⁹ Lesa yewa kishiinka wimwiichile mu luumvwang'ano lwa mwaananji, Nkambo yeetu Yesu Kilishitu. ¹⁰ Pano amiiwa ne mwaambila, baloongo, kupichila mu jizhiina ja Nkambo yeetu Yesu Kilishitu, amba boonse muswe, kabiiji amba keechi mwiikale lwabano mwi anweeba ne. Amiiwa na amba naamba mwiikale bekwaata pamo na milaangwe imo ne miingilo imo. ¹¹ Pakuuba amiiwa bambuula pa maambo enu, baloongo baami, na baantu bakwa Kelowe amba muji malwaang'ano mukachi keenu. ¹² Amiiwa nekitwaala mukuuba amba: pa muuntu pa muuntu mwaamba amba, "Amiiwa nji na Paulo," nangwa amba "Amiiwa nji na Apolosa," nangwa amba, "Amiiwa nji na Kefasa," nangwa amba, "Amiiwa nji na Kilishitu." ¹³ Naanchi Kilishitu wa abana nyi? Bushe Paulo ba mupoopeple na maambo enu nyi? Nangwa mwa batishiwe mu jizhiina jakwa Paulo nyi? ¹⁴ Amiiwa nasaanta kwi Lesa byo nabujile kubatisha uji yense mwi anweeba, poso Kilishipusa ne Ngayusa. ¹⁵ Kino kyajiinga bino mukuuba amba kafwaako nangwa umo wakoonsha kwaamba amba mwabatishiwe mu jizhiina jaami. ¹⁶ (Ne amiiwa na batishile ba mu nzuubo yakwa Setefanusa. Kukiila poopo keechi nayuuka inge na batishilepo bakwaabo.) ¹⁷ Pakuuba Kilishitu keechi wantumine na kubatisha ne poso na kusapwiila maambo awaama. Aye keechi waantumine kusapwiila byaambo na maana a baantu ne, byonkabyo amba musalabu wa Kilishitu keechi akoonshe kubula bulume ne. ¹⁸ Pakuuba maambo apa musalaba abula maana kubooba babeena kwiakana. Mino mubooba Lesa abo bo abeena kupulusha, bo bulume bwa Lesa. ¹⁹ Pakuuba kyaneembwa amba, "Amiiwa nkonauna maana aba maana ne kuvulaang'anya kuumvwa kwa bajimuka." ²⁰ Wa maana uji pi? Wafuunda uji pi? Nga walupata wa pano pa ntaanda uji pi? Naanchi Lesa keechi wa alula ba maana ba pano pa ntaanda ke babula maana ne nyi? ²¹ Maambo ba pa ntaanda mu maana abo keechi bayuukile Lesa ne, abo bamutookesha Lesa kupichila mu kusapwiila kwakubula maana mu kupuluusha aba baitabila. ²² Pakuuba ba Yudea baloomba kayuukilo kabya kukumya ne ba Ngiliki bakeeba maana. ²³ Mino tusapwiila kuba amba Kilishitu wa poopelwe, kejiibwe ja kwi tuuntulako ba Yudea ne kubula maana kwa ba Ngiliki. ²⁴ Mino kubooba Lesa bo aita, boonse ba Yudea ne ba Ngiliki, tusapwiila Kilishitu amba bo bulume ne maana a Lesa. ²⁵ Pakuuba buumbulwa maana bwa Lesa buji na maana kukiila baantu, kabiiji ne kunekena kwa Lesa kwakosa kukiila baantu. ²⁶ Talai ku lwiito lweenu, baloongo. Keechi bavula mwi anweeba bajiinga na maana mwaila bu muuntu ne. Keechi bavula mwi anweeba bajiinga na buluume ne. Keechi bavula mwi anweeba bajiinga na maana a kisemwa ne. ²⁷ Mino Lesa usala biintu byabula maana bya pa ntaanda mukuubisha buumvu ba maana. Lesa usala bya nekena mukuubisha buumvu abya byakosa. ²⁸ Lesa usala bya paanshi ne bya suulwa pa ntaanda. Aye usala ne biintu byo bamoona amba kafwaako byobiji, mu kwi bibweezha paanshi abya byo ba neemeka. ²⁹ Aye waubile bino amba kafwaako nangwa umo wakoonsha kwiikala na mwa kwitootela kwi aye ne. ³⁰ Na maambo a bya ubile Lesa, pano muji mwi Yesu Kilishitu, waikele maana etu kufuuma kwi Lesa Aye waikele bololoke bweetu, buzhile bweetu, ne mupokolweshi weetu. ³¹ Na onkao maambo, moonka mo kya neembelwa amba, "Lekai awa witoota, etootele mwi Nkambo."