¹ Chapwile ha matangwa waze muze ngaji ayulile mwapwile kapunga muchifuchi, mba umwe lunga wa ku Mbeteleme - Yunda wayile ku chifuchi cha Moape hamuwika nyi mukwo pwo nyi ana jenyi aali amalunga. ² Jina lya mwe lunga Elimeleke, pwo lyenyi wapwile Noemi. Majina a ana jenyi amalunga apwile Malone nyi Chilione, apwile A-frata aku Mbeteleme - Yunda. Ahetele mu chifuchi cha Moape nyi kutwama kuzekwene. ³ Alyoze Elimeleke, lunga lya Naoemi, wafwile, yahachika pwo nyi ana aali. ⁴ Wano ana amalunga ambachile mapwo aku Moape; jina lya umwe wapwile Opa, jina lyamukwo wapwile Lute. Atwamineko ngwe kumi lya myaka. ⁵ Alyoze eswe aali Malone nyi Chilione afwile, chocho pwo yafwisa anenyi aali nyi lunga . ⁶ Mba Noemi yakatuka nyi atembwa anenyi nyi kuhiluka ku Yunda mumu wevwile ngwo muchifuchi cha Moape Yehova hanangisa atu jenyi , haaha kulya . ⁷ Chocho yakatuka kuze atwamine hamwe nyi atembwa - anenyi aali, yapwila mujila kuya kuchifuchi cha Yunda . ⁸ Naoemi yamba kuli atembwa -anenyi aali ngwo, " Yenu, hilukenu, enu eswe, kumazuwo ja anoko. Yehova anulinge vumbi, ngwe chizechene nwalingile nyi waze afu nyi kuli yami nawa. ⁹ Yehova anukwase nukawane malo, mweswe muzuwo lya lunga lyenyi. " Chocho yahana mbeju, mba ayo yalila nyi maliji jo helu. ¹⁰ Yamba kuli iye , " Hi chochoko! Mutuhiluka hamwe nyi yena kuli atu je. " ¹¹ Alyoze Naoemi wambile ngwo, " Hilukenu, ana jami amapwo! Kuchi te munuya nyi yami? Te ana malunga akwo nguli no mu jimo, anatela kupwa malunga jenu? ¹² Hilukenu, anami amapwo, yenu kwenu, mumu hinguli mukulwana kupwa nyi lunga nawa. Nyi ngwo nahanjikile ngwo ngupwe nyi lunga ufuku uno, 'mba mungusema ana amalunga, ¹³ te munwashimbwila ndo hakola? Kunuchi ku sakula kusomboka kuli lunga? Nyi chochoko, anami amapwo! mumu chinangusashila kuhyana hali yenu chize kwoko lya Yehova hilyalimika nyi yami. " ¹⁴ Mba atembwa anenyi aali alilile nawa chikolo. Opa wambejele nayeweno kusalisa, alyoze Lute yamukakaminya. ¹⁵ Naoemi yamba ngwo, " Ivwa, nyalye kanahiluka kuli atu jenyi nyi kuli mazambi jenyi. Hiluka hamwe nyi nyalye. " ¹⁶ Alyoze Lute yamba ngwenyi, " Kanda ungushinjila kukwehuka hanji kukuhichika nyi kuhiluka kunyima, mumu kuze muya, nyi yami munguya; kuze mutwama, nyi yami mungutwama kwenako; atu je kumapwa atu jami, nyi Zambi ye kumapwa Zambi yami. ¹⁷ Kweswako mufwila yena, nyi yami mungufwila, akangufunde kuze kwene. Yehova angulambe nyi natayiza chipwe kufwa kutuhandununa yena nyi yami. " ¹⁸ Muze Naoemi yamona ngwenyi Lute kanajikiza kuya nyi yiye, iye kahanjikile nawa. ¹⁹ Chocho ayili nyi eswe ali ndo ku chihunda cha Mbeteleme. Chasolokele ngwo muze ahetele mu Mbeteleme, chihunda cheswe chalishimwokenene mumu hali ayo. Mapwo ambile ngwenyi, " Au Noemi nyi? " ²⁰ Alyoze wambile kuli ayo, " Kanda nunguvuluka ngwe Naoemi. Nguvulukenu ngwo Mala, mumu mwe mukwa ndundo jeswe hangulinga yuma yisasu chikolo. ²¹ Nakatukile wa to, alyoze Yehova hananguhilwisa wa upolongo. Mba kuchi te nunanguvuluka ngwo Noemi, Yehova hanangu yindamisa, mwe mukwa ndundo jeswe hanangunehena kuji- nyi tomo? " ²² Chocho Noemi yahiluka nyi Lute mwanapwo waku Moape, tembwa - mwanenyi, yakatuka ku chifuchi cha Moape. Ejile ku Mbeteleme te machiputuka kucha sevanda.