¹ Yishima ya Solomone ya mwana wa Ndawichi, mwanangana wa Izalele. Yino yishima yakulongesa mana nyi kufumba, ² nyi kulongesa maliji a yinyingi, ³ hanga ukatambule kufumba chayilinga ya ululi, upatwilo nyi kulita. ⁴ Yino yishima hanga yikahane mana kutwanuke, nyikuhana yinyingi nyi kuku fumba akweze. ⁵ Eche akwa mana apanjike nyi ku wezela ku yilongesa, nyi atu amalinjekela alisele ulangaji, ⁶ kwivwishisa yishima, yikuma, nyi maliji ja kwa mana nyi yijimbikilo yo. ⁷ Kwivwila woma wa Yehova we uputukilo wa yinyingi - yihepuke kakulelesa mana nyi kufumba. ⁸ Mwanami, panjika kufumba cha tatenu nyikuhona kulituma longeso lya noko; ⁹ muyikapwa chipangula cha vumbi cha hamutwe we nyi malenge akuzezeleka ha kota ye. ¹⁰ Mwanami, nyi yivulumunyi mazanga kukutwala mu uvulumunyi wo, kanda uya hamuwika no. ¹¹ Nyi mamba ngwo, "tweya nyi yetu, tweya tulyonge mukutwaminyina cha manyinga, tweya tulisweke tukajikinyine waze atu keshi mulonga nyiumwe; ¹² tweya tukamine amwono, ngwe chize shyole lyakumbata angunu, nyi kwapwisa ngwe waze akuya ku upinjilo; ¹³ mutukawana yikumba yandando yinene; mutukazalisa mazuwo jetu nyi upite; ¹⁴ mbila yuma ye nyi yetu, nyi mukukapwa nyingonga yimuwika"- ¹⁵ mwanami, kanda ukenda mu jila hamweno; kanda ukecha kulu lye likakwate muze makenda; ¹⁶ molu jo kakuzomboka ku upi nyi kupwa nyi washi wakumwanga manyiga. ¹⁷ Mumu chamokomoko kutela wanda ku meso ja umwe kajila. ¹⁸ Wano malunga kakulyonga mukutwaminyina manyinga jo ene - kakuyisela ene chihiso cha hanyono yo. ¹⁹ Kashika jila ja mweswawo yoze wakuwana upite mujila ja ndombo wakuzuka nyi kumbata mwono wayoze unakwata nyi kuchilinga. ²⁰ Mana kakukololoka chinji mutapalo, kakutambika nyi liji mu yihela ya washi; ²¹ helu lya mitwe lya zungo mu majila kakuteta, kujilila ha chikolo cha chihunda kakuhanjika maliji jenyi, ²² "Shimbu muka, enu twanuke jatwu, munukazanga kupwa twanuke? Shimbu muka, enu akwakulenya munukawahilila nyi kulenya chenu, nyi shimbu muka hali enu yihepuke, munukajinda yinyingi? ²³ Alumukenu kukufumba chami, mukamwangina shipilityu wami hali enu, mungukapwisa maliji kwanyingika kuli yenu. ²⁴ Na nutambikile, nyi yenu nwahamikine kungupanjika; nahetele nyi kwoko lyami. Alyoze nyi umwe wakuhi yoze wangupanjikile. ²⁵ Alyoze hinunalengulula shimbi jami nyi kuhona kupanjika ku kufumba chami. ²⁶ Nyi yami mukanuseha ha luyinda lwenu, nyi yami mungukanulenya muze woma muwiza - ²⁷ muze woma mu unulamba ngwe kangonga nyi muze luyinda wenu makeza ngwe chijimbi, nyi muze lamba nyi yihuli muyikeza hali yenu. ²⁸ Kashika makangutambika, nyi yami chichikambulula; o makangufupa kanawa yami, alyoze kechi kanguwana. ²⁹ Mumu o kajinda yinyingi nyi kuhona kusakula woma wa Yehova, ³⁰ o kakapwile shimbi jami, nyi kulelesa kufumba chami. ^{31 32 33} O kumakakalya mihuko yakwenda cho, nyi kumihuko ya yitanga yo kumakakuta. Mumu wanuke wakuhwa muze o malumuka, nyi kulihandununa cha yihepuke cha kwanongesa. Alyoze mweswawo mangupanjika maka twama kanawa nyi kuhwima nyi woma wakuhi waupi."