¹ Yehova ya sanyika Mose nyi kuhanjika kuli iye mu mbalaka ya chiwanyino , ngwenyi , ² " Hanjika kuli atu ja Yizalele nyi kwalweza ngwo , ' Muze umwe mutu hakachi kenu maneha mulambu kuli Yehova , aka nehe mulambu wenyi wa yimuna , chipwe ha ngombe hanji ha panga . ³ Nyi mulambu wenyi mulambu wa kwocha wa ngombe , akalambule kuji keshi chipa . Aka mulambula ha chikolo cha chikungulwila , hanga mba akamutambule ku meso ja Yehova . ⁴ Akase moko jenyi ha mutwe wa mulambu wa kwocha , mba aka musalakane ha kufuka shili yenyi . ⁵ Mba akashihe mwe kuji ngombe ku meso ja Yehova . Ana amalunga a Alone , asasendote , akambate manyinga nyi ku asapwila ha chilumbilo chize chili ha chikolo cha mbalaka ya chiwanyino . ⁶ Akazuwe mulambu wa kwocha nyi kuteta mu ihanda . ⁷ Mba ana ja Alone amalunga , Asasendote , akase kahya ha chilumbilo kusa kanawa kunyi ku kahya . ⁸ Mba ana ja Alone amalunga , Asasendote , akase yihanda , nyi we mutwe nyi maji , ha kunyi jize jili ha kahya kaze kali ha chilumbilo . ⁹ Alyoze yihanda ya mujimo nyi molu jenyi aka ikose nyi meya . Mba sasendote akoche yeswe ha chilumbilo ngwe mulambu wa kwocha . Muukaneha vumba lipema lya yami ; muukapwa mulambu wa kwocha kuli yami . ¹⁰ Nyi mulambu wenyi muupwa wa kwocha umwe wapanga , hanji umwe wa pembe , akalambule kuji keshi chipa . ¹¹ Aka mushihileku uto ya chilumbilo ku meso ja Yehova . Ana ja Alone amalunga asasendote , akasapwile manyinga jenyi muma sali eswe a chilumbilo . ¹² Aka mutete mwihanda nyi mutwe wenyi hamuwika nyi maji , sasendote nawa akase ye yihanda ha kunyi jize jili ha chilumbilo , ¹³ alyoze yihanda ya mukachi nyi molu aka yikose nyi meya . Mba sasendote mayilambula ye yeswe , nyi ku ilumba ha chilumbilo . Uli mulambu wa kwocha , mu ukatuhwisa vumba lipema lya Yehova ; ukapwe mulambu wa iye wa kwocha nyi kahya . ¹⁴ Nyi mulambu wenyi kuli Yehova mu u pwa wa tujila a kulumba , akalambule mu lambu wenyi watutela hanji ana a membe . ¹⁵ Sasendote akanehe ku chilumbilo , aka honde mutwe wenyi , nyi ku mwocha ha chilumbilo . Mba manyinga jenyi aka hichishile kulumbu lya chilumbilo . ¹⁶ Akatukule chisakwilya nyi yize ilimo , akaimbile kulumbu lya chilumbilo lyatala ku chivumbiko , ku chihela cha uto . ¹⁷ Aka mupule kumapulwa jenyi , alyoze kanda akamuhandununa mwihanda yali . Mba sasendote aka mulumbe ha chilumbilo ha kunyi jize jili ha kahya . Ukapwe mulambu wa kulumba , nawa mu ukatuhwisa vumba lipema lya Yehova ; mu ukapwa mulambu wa iye wa kwocha ha kahya .