¹ Muka kweji wa shimbyali hatangwa ha makumi aali a tangwa nyi tangwa limuwika, liji lya Yehova yiliza mu moko ja ka pulofeta mwe Hangaya, yamba ngwenyi, ² " Amba kuli nguvulu wa Yunda, Zelumbambela mwana wa Shitile, nyi kuli mwe sasendote mukwa lutwe Yoshuwa mwana wa Jozandaki, nyi ku masalila eswe ja atu. Ngwo, ³ 'Angahi asala waze amwene zuwo lino nyi uhenya walyo wa kunyima? kuchi nwalimona halyapwila ? Kulyapwile mu meso jenu ngwe chuma chamokomoko? ⁴ Halyapwila, pwako wakujikiza, Zelumbambele ! Chocho anambe Yehova - nyi yena jikiza, sasendote mukwa lutwe Yoshuwa mwana wa Jehozandake; pwako wakujikiza, nyi yenu atu eswe a chifuchi! - Chocho anambe Yehova nyi kuzata, mumu nguli hamwe nyi yena! - Chocho anambe Yehova wa yuma yeswe. ⁵ Nyikulita nyi usendo chize nanuhele ha kukatuka ku Ingutu, nyi shipilitu yami mwikapwa hakachi kenu. Kanda nwivwa woma! ⁷ Mumu Yehova wa yuma yeswe kanambe ngwenyi: muka shimbu kakehe mungukanyika malilu nyi hashi, nyi kalunga lwiji nyi mavu imu! ⁶ Mungukanyika chifuchi cheswe, nyi chifuchi cheswe kumakaneha yuma ya ndando kuli yami, nyi ku zalisa zuwo lino nyi uhenya, chocho anambe Yehova wa yuma yeswe. ⁸ Palata nyi olu yeswe hiyami! - chocho anambe Yehova wa yuma yeswe. ⁹ Uhenya walino zuwo mulikatohwa kuyana ku uputukilo, anambe Yehova wa yuma yeswe, mukahana sambukila mu chihela chino! - chocho anambe Yehova wa yuma yeswe." ¹⁰ Ha tangwa makumi aali nyi - awana nyi nake lya kakweji, ha mwaka wamuchali wa Ndaliu, liji lya Yehova yiliza kuli ka pulofeta Hangaya, ngwenyi, ¹¹ "Yehova wa yuma kanambe ngwenyi : Hulenu asasendote hamulonga wa shimbi, nyi kwamba ngwo, ¹² 'Nyi mutu mambat5a yifwo yisandu ku meso ja mu hina lyenyi, nyi mbolo chipwe yuma ya kuteleka, vinyi hanji maji, nyi chakulya cheswacho, muchalumuka cha usandu nyi ?'" Asasendote yakumbulula ngwe, "Ka." ¹³ Mba Hangaya yamba ngwenyi, "Nyi umwe yoze waluchisa ha mulonga wa kupwa waluchisa? " Asasendote ya kumbulula ngwo, "Chenacho, muyalumuka ya luchisa." ¹⁴ Chocho Hangaya yamba ngwenyi, "Chocho chinapu nyi atu an nyi chifuchi ku meso jami! - chocho anambe Yehova- nyi chocho chapwa nyi milimo yeswe ya moko jo. Yize yeswe akungulambula yami yapwa ya luchisa! ¹⁶ Kuchi chapwile? Muze wejile ku mulumba wa makumi aali a sangu, kapwile kumi wika; nawa muze wejile ku vinyu akachize makumi atano a misenge, kapwile wika makumi. ¹⁷ Ngunakamipinjisa nyi milimo yenu nyi mbundu nyi chiwe, alyoze kunwahilukile kuli yami - chocho anambe Yehova. ¹⁸ Nyongenu kanawa tangwa lino ndo kulutwe, mumu ha tangwa lya makumi aali nyi - lyamuchiwa nyi kakweji wa nake, muze tangwa lize lya uputukilo ya tembele ya Yehova asele. Nyongenuho! ¹⁹ Kuli mbuto yinatwama mu zuwo lya kufungilamo ? vinyu, mitondo ya uva, nyi yamukuyi, nyi ulembe kuyemine! Mumu ku tangwa lino kumukamiwahisa!" ²⁰ Alyoze liji lya Yehova yiliza kamu chali kuli Hangaya ha tangwa makumi- aali nyi lyamuchiwana lya kakweji ngwenyi, ²¹ Hanjika kuli nguvulu wa Yunda, Zelumbambele, nyikwamba ngwo, 'Mungunyika, malilu nyi hashi. ²² Mumu mukanungununa ngunja ja nyanangana nyi kwonwona tachi ja myanangana ja chifuchi cheswe! Muka mingununguna matemba nyi naka kwendesa; yimbulu nyi akwa kwendesa maka limbukila hashi, ha mutu ha mutu mumu wa katana ka ndumbwenyi. ²³ Halize tangwa - chocho Yehova wa yuma yeswe - mukakutambula, Zelumbambele mwana wa Shetile, ngwe ndungo yami - chocho anambe Yehova. Mungukakupwisa ngwe kazeya kami ka chijilo, mumu hinakutongola! - chocho anambe Yehova wa yuma yeswe!'"