¹ Mba Yehova yamba kuli Mose , ngwenyi , ² " Ha tangwa litangu lya kakweji mutangu mumwaka waha ukamika ye tabernakulu , ya mbalaka ya chikungulwila . ³ Ukajisemo we mushete wa shindakenyo , ukafuke mushete nyi hina lya chikalakala . ⁴ Ukanehe mese yize yuma yize yinaatela kupwaho . Mba anehe chikwachilo cha ndeya nyi ukawike je ndeya ja cho . ⁵ Ukalumbike chilumbilo cha oru cha kwochela insensu kulutwe lya mushete wa shindakenyo , ukazezeleke hina lya kufuka kuujililo cha ku tabernakulu . ⁶ Ukatumbike chilumbilo cha milambu ya kulumba kulutwe lya kuujililo cha ku tabernakulu , mbalaka ya chikungulwila . ⁷ Ukutumbike longa linene lya kusanyina hakachi ka mbalaka ya chikungulwila nyi chilumbilo nawa ukasemo meya . ⁸ Ukajike yize ya kujingilika kweswe , nawa ukazezeleke hina kuujililo lya yize . ⁹ Ukande maji a kuwayisa ye tabernakulu nyi yize yeswe yilimo , ukayise hatenga nyi yikashi yayo yeswe kuli yami ; mba muyipwa usandu . ¹⁰ Ukawayise nyi maji chilumbilo cha milambu ya kulumba hamwe nyi yikashi yacho yeswe . Ukasele ku usandu che chilumbilo chikapwe chisandu cha hiana kuli yami . ¹¹ Ukawahise longa lya kusanyina lya mbolozi nyi nganda yacho nawa ukayise kutenga kuli yami . ¹² Ukanehe Alone nyi anenyi a malunga kuujilo cha kumbalaka ya chikungulwila nawa ukasanyise nyi meya . ¹³ Ukajike Alone nyi mazalo asandu , ukamuwahise nyi maji nyi kumusa hatenga hanga akazate ngwe sasendote wami . ¹⁴ Ukanehe ananyi a malunga nyi ku wajika yikuto . ¹⁵ Ukawawayise chizechene ngwe wawayishile atato hanga o akakuzachile usasendote . Ha kuawayisa nyi maji chikapwe kuli ayo ha usasendote wa mutolo ndusu yisemuko ya atu jo ." ¹⁶ Chocho Mose walingile ; wakawile yeswe yize Yehova ambile . Iye walingile yuma yino yeswe . ¹⁷ Ha kakweji mutangu wa mwaka wamuchali ha tangwa litangu lya mwe kakweji ya jika ye tabernakulu . ¹⁸ Mose ya jika ya tabernakulu , yala yimanyino yayo , yamika chivuvu jayo , yajisamo yayo , yamika manguji jayo . ¹⁹ Yazazulula mbalaka helu lya tabernakulu nawa yasa chifuko cha ye mbalaka helu lyayo kwilu , chizechene ngwe Yehova ambile kuli Mose . ²⁰ Yanda shindakenyo yasa mu mushete . Yasa milumbu ha mushete yanangika ha chifuko cha kujilo helu ha we mushete . ²¹ Iye wanehene mushete mu tabernakulu . Yazezeleka chikalakala cha hina yasweka we mushete wa shindakenyo , chizechene ngwe Yehova ambile kuli iye . ²² Iye wanehene mesa mu mbalaka ya chikungulwila , ku lumbu lya kusulo lya ku tabernakulu , haze lya chikalakala cha hina . ²³ Iye wasele mbolo hamesa kumeso ja Yehova , chizechene ngwe Yehova ambile kuli iye . ²⁴ Iye yasa chikwachilo cha ndeya mu mbalaka ya chikungulwila , hatalanganyi nyi ye mesa , ku lumbu lya ku zango lya tabernakulu . ²⁵ Yawika je ndeya kumeso ja yehova , chizechene ngwe Yehova ambile kuli iye . ²⁶ Iye wasele chilumbilo cha oru mu mbalaka ya chikungulwila kulutwe lya chikalakala cha hina . ²⁷ Yochelaho insensu ya lupembo mupema , chizechene ngwe Yehova ambile kuli iye . ²⁸ Yazezeleka chikalakala cha hina ku chikungulwila waku tabernakulu . ²⁹ Yatumbikila chilumbilo cha milambu ya kulumba kuujililo cha ku tabernakulu , ya ku mbalaka ya chikungulwila . ³⁰ Yalambwilaho mulambu wa kulumba nyi mulambu wa wunga , chizechene ngwe Yehova ambile kuli iye . Yatumbika lumbashila lwa kusanyina hakachi ka mbalaka ya chikungulwila nyi chilumbilo , yasamo meya a kusana . ³¹ Mose , Alone , nyi anenyi amalunga apwile nyi ku sanyinaho ku moko jo nyi kumolu jo . ³² Apwile nyi kusana muze majila mu mbalaka ya chikungulwila nyi muze makundama ku chilumbilo , chizechene ngwe Yhova ambile kuli Mose . ³³ Yamika yize ya kujingilika tabernakulu nyi che chilumbilo . Chocho , Mose wamanunwene milimo yeswe . ³⁴ Mba lelwa yilifuka ye mbalaka ya chikungulwila , nyi ye tabernakulu yiyizala nyi uhenya wa Yehova . ³⁵ Mose te kahashile kujila mu mbalaka ya chikungulwila mumu te lye lelwa lya twamineho , nyi ye tabernakulu yazalile nyi uhenya wa Yehova . ³⁶ Muze lye lelwa mulizunduka ku tabernakulu , atu A - Yizalele masenya kulutwe ndusu muwungeji wo . ³⁷ Alyoze nyi kate lelwa kulya zundukile kufuma ku tabernakulu , nyi o atu kechi kuya . Katwamine ndo tangwa lize mulizunduka . ³⁸ Mumu te lye lelwa lya Yehova lyapwile ha tabernakulu ha mwalwa , nyi ufuku mwapwilemo kahia kenyi , kumeso ja atu ja A - Yizalele eswe ndusu muwungeji wo .