¹ " Hapwila ai ye yiyulo yize mukasa ku meso jo : ² ' Nyi kachi mulambu ndungo ka Hepeleu , akakilikite myaka isambano , ha mwaka wa mu chishimbyali akatusuke chawana . ³ Nyi kejile uka wenyi , akatusuke ukawenyi ; kachi ha mbata , pwo lyenyi akatusuke nenyi . ⁴ Nyi kachi kako ma mwaha pwo mba ma musemena ana amalunga nyi amapwo , pwo nyi e ana mapwa a kako , mba lunga akatusuke uka wenyi . ⁵ Alyoze nyi ndungo mamba pundu ngwenyi , " Nazanga mwene wami , nyi mukwetu pwo , nyi ana jami ; chichi kutusuka , ⁶ " Henaho kako aka muhetese kuli Zambi . Kako akamunehe ko chikolo chipwe ku yipamba ya chikolo , mwe kako aka mutuwe twitwi lyenyi nyi katwalo . i ye aka muzachile ndo ku myaka ya mutolo . ⁷ Nyi kachi lunga malanjisa mwanenyi wapwo akapwe ndungo , kanda akatuhuka ngwe ndungo ama lunga akulinga . ⁸ Nyi mapihisa kako , yoze wa mu mutendele kupwa hi wenyi , aka mutaize kumulanda cheka . Keshi nyi shimbi ja kumulanjisa kuli tundaka . Shimbu jacho keshi najo , mumu halinga nenyi mafwefwe . ⁹ Nyi kako ma muhangisa kuli mwanenyi wa lunga , akalinge kuli iye ngwe mwanenyi wa pwo . ¹⁰ Nyi mambata pwo mukwo , kanda akakehesa kulya chenyi , mazalo , chipwe ndako ya ulo wenyi . ¹¹ Mba nyi kechi ku mulingila yino yuma itatu , aho iye akatusuke chawana kechi kufweta mbongo ka . ¹² Mweswawo malamba mutu nyi ku mushiha , neye nawa aka mushihe lume . ¹³ Nyi mutu te kajikinyinyine mukwo , mba alyoze ha mulonga wa kuhona ku nyingika , yami mungu kamusela chihela cha ku chinyinako . ¹⁴ Nyi mutu mevwila kole mwenyembo wenyi nyi kumushiha nyi kalimbalimba , uka mumbate , chipwe kali kuchilumbilo cha Zambi hanga akafwe . ¹⁵ Mweswe malamba tato hanji naye aka mushahelume . ¹⁶ Mweswe Yoze meya mutu - chipwe mwiji ma mulanjisa , chipwe mutu ma muwana mu moko jenyi auze mwiji aka mushahe . ¹⁷ Mweswe yoze mashinga tato hanji naye akamushahe lume . ¹⁸ Nyi malunga mazwela nyi umwe ma lamba mukwo liwe chipwe kome , mba auze mutu kafwile , mba mapomba ha muhela ; ¹⁹ nyi kachi iye mahinduka nawa mahasa kwenda kujikijila ku mulumbu wenyi , lunga yoze unakamulamba aka mufete ha ku mwenyekela shimbu ; akafwete nawa ku ku muuka chenyi cheswe . Alyoze auze mutu keshi nyi mulonga wa kushiha . ²⁰ Nyi kachi mutu malamba nyi mbwechi ndungo yenyi wa lunga hanji ndungo yenyi wapwo , mba ndungo mafwa ha mulonga wa ku mulamba , mba auze lunga aka mu mwese ihulyo . ²¹ Alyoze , nyi ndungo matwama nyi mwono tangwa chipwe ali , kanda aka mu mwesa yihulyo , mumu iye hatokesa kulu ndungo yenyi . ²² Nyi kachi atu amwe mazwela mba malemeka pwo kafumba chocho maselumuna , alyoze ku kushi chilonda chikwo kuli iye , akamufwetese nyi kulita nyi chize mukwo lunga mamusela , akafwete nawa ngwe chize ngaji ma musela . ²³ Alyoze nyi kuli chilonda chinene , kachi aka hane mwono ha mwono , ²⁴ liso ha liso , lizo ha lizo , kwoko ha kwoko , kulu ha kulu , ²⁵ kuwema ha kuwema , chilonda ha chilonda , chipwe mujiji ha mujiji . ²⁶ Nyi mutu malamba liso lya ndungo yenyi wa lunga chipwe ndungo yenyi wa pwo mamushiha lyo , aka mutusule mumu ha liso lyenyi . ²⁷ Nyi kachi mapukula lizo lya ndungo yenyi wa lunga chipwe ndungo yenyi wa pwo , akamutusule mumu ha lizo lyenyi . ²⁸ Mba nyi kachi ngombe ma pupa lunga chipwe pwo mba mafwa , akase mawe mwe ngombe , kanda akalya ifwo yenyi ; kako ya mwe ngombe kanda aka musuma mulonga . ²⁹ Mba nyi mwe ngombe yako ya kupupa pupa ku matangwa akunyima , mba ya chishindakenya kuli kako mba ka mwajilile , mba ngombe ma shaha lunga chipwe pwo , auze ngombe aka mwase mawe , nyi kako aka mushihe . ³⁰ Nyi mamusela ndando ya ha mwono wenyi akafwete chize anatela kufweta . ³¹ Nyi ngombe ha pupa mwana wa lunga chipwe wa pwo , mwenya ngombe akalinge nyi kulita nyi chiyulo . ³² Nyi ngombe mapupa ndungo wa lunga chipwe ndungo wa pwo , kako ya ngombe akafwete makumi atatu a shekele ja palata , nyi ngombe aka mwase mawe . ³³ Nyi kachi mutu mashikulula wina , chipwe nyi mutu mafula wina mba kechi ku ufuka , mba ngombe hanji chimbulu maholokelamo , ³⁴ mwene wa wina afwete . Akahane mbongo kuli mwene wa kashitu yoze hafwa , nyi kashitu yoze hafwa apwe hi wenyi . ³⁵ Nyi ngombe wa mutu umwe malemeka ngombe wa mutu mu kwo mba mafwa , akalanjise ngombe wa mwono aka lipangile ye ndando , akalipangile nawa yoze wafwa . ³⁶ Mba nyi hanyingika ngwo mwe ngombe wa pwile nyi kupupa matangwa akunyima , kako kamukuchikileko , a kafwete ngombe ha ngombe , kashitu yoze wafwa akapwe hi wenyi .