¹ Mba umwe lunga wa kumunyachi wa Levi yambata pwo wa ka Levi . ² Mwe pwo yapwa nyi ufumba yasema mwana walunga . Muze amwene ngwo mwana wapema naye , wamuswekele tukweji atatu . ³ Muze te kahashile nawa kumusweka , yamutungila kamutonga kamanenga ya kashila kaso nyi usolosashi . Mba yasamo mwe mwana yakatumbika ku ngenge ya lwiji . ⁴ Ndumbwenyi yamanyina kusuku hanga amone yize muyilingiwa kuli mwe Kemba . ⁵ Mwana wa Falau ya palumuka ku lwiji nyi kusana mba tuvumbi twenyi te kanendangana kusesa lya lwiji . Yamona ka mutonga mukachi kamanenga yatuma kavumbi kenyi kuya nyi ku mwanjila ko . ⁶ Muze hakapakula , ya monamo mwana . Talenu , mwana kanalili yamuvwila keke yamba ngwenyi , " Au kali umwe mwana wa Ahepeleu . " ⁷ Mba ndumbu ya mwana yahula mwana Falau ngwenyi , " Nguye ngukufupile pwo waka hepeleu apwe ndenji a kulelele yono mwana nyi ? " ⁸ Mwana wa Falau yamba kuli iye ngwenyi , " Yako " . Mba ndumbu ya mwana yaya nyi kutambika naye ya mwana . ⁹ Mwana Falau yamba kuli naye ya mwana ngwenyi , "Tambula mwana yono uka ngulelele ye , mba mungu kakufweta . " Mwe mwana pwo yatambula mwana yamulele . ¹⁰ Muze mwana hakola , yamutwala kuli mwana wapwo wa Falau , neye yamupwisa mwanenyi . Yamuluka Mose ngwenyi , " Nguna ka mwanda mu meya . " ¹¹ Muze Mose hakola , yaya kuli atu jenyi yamona milimo yo kukola . Yamona nawa umwe mukwa Engitu kanashihi ka Hepeleu , umwe wa mu atu jenyi . ¹² Yatala sali nyi sali , muze amwene ngwo kushi mutu nyi mweumwe ya shiha ka Engitu nyi kumuvumbika mu masekeseke . ¹³ Tangwa lya kawileho yaya , nawa talenu tu Hepeleu aali kanazwele . Yamba kuli yoze waluwishile , " Yika unalambila usoko we ? " ¹⁴ Mwe lunga ngwenyi , "Unakakupwisa kupwa tetekeli nawa mukwa kuyula hakachi ketu ? Unazange kungu shiha ngwe chize washihile mukwa Engitu ? " Mose yevwa woma ngwenyi , " Kuma chuma nalingile hachinyingika akwetu . " ¹⁵ Mba muze Falau hevwa yino , yafupa kushiha Mose . Alyoze Mose yamuchina Falau kuya nyi kutwama kuchifuchi cha Mindyane . Kuze yatwama kusesa lya shima lya meya . ¹⁶ Alyoze hako wa ku mindyane kapwile nyi ana amapwo shimbyali . Yeza , yataha meye , nawa ya zalisa yingolongolo ya kunwisa mbunga ya yimuna ya tato . ¹⁷ Nyi tufunga yeza ngo ahanga , mba Mose yakatuka yeza nyi kwakwasa . Yanwisa ye mbunga ya yimuna . ¹⁸ Muze ana amapwo ahilukile kuli tato , yahula ngwenyi , " Mba yika nwahilukila washi musono ? " ¹⁹ Yakumbulula ngwo , " Mukwa Engitu katupululanga kuli tufunga . Yatutahila meya yanwisa nyi yimuna . " ²⁰ I ye wambile kuli anenyi amapwo ngwenyi , " Mba kuli ko ali ? Kuchi te nwamuhichika mwe lunga yoze ? Mutambikenu hanga alye kulya nyi yetu . " ²¹ Mose wataijile kutwama nyi lunga yoze , yoze wahanyine mwanenyi wa pwo Zipola mu ulo . ²² I ye wasemene mwana walunga , nyi Mose wa mulukile ngwo Ngeshome ; yamba ngwenyi , " Mumu kunapwa njize mu chifuchi cha mbala . " ²³ Hakupalika shimbu mwanangana wa Engitu yafwa . Mba Yizalele atwile mikuma mumu ha upinji wo . Alilile chikolo hanga akwasa , mba kulila cho chahetele kwilu kuli Zambi mu muha upinji wo . ²⁴ Muze Zambi hevwa mikuma yo , Zambi yewuluka usendo wenyi uze akolesele nyi Apalahama , nyi Izake , nyi Yakomba . ²⁵ Zambi wamwene lamba lya Izalele , yevwila keke .