¹ Le gɔme djedjea mea enyã li. Enyã gaku Mawu elí, enyã ye nyi Mawu. ² Eli ku Mawu le gɔmedjedjea me. ³ To edjia wowɔ enuwo kpata eye nuɖekpe yiwo wɔa wó me wɔ̃ɛ eya manɔ̃ɛ me o. ⁴ Le nyã mea agbe li, ye agbea nyi amewó be kekeli. ⁵ Kekelia klé le vivitiwome, ye vivitiwo me xɔɛ o. ⁶ Ameɖe va djɔ yi Mawu dɔ̃ : yiwoyɔ be Jã. ⁷ Eva be ya ɖi ɖasé kuɖé kékélia ŋuti, ale be amesiame ba xɔ edji se. ⁸ Me yeŋtɔe nyi kekelia o, vɔa eva be ya ɖiɖase kuɖe kekelia ŋuti. ⁹ Kekelia ye nyi nyãteƒe tɔ, ye ne va xixeamea la klé ne ameɖesiaɖe. ¹⁰ Ele xixeame ye wowɔ xixeame to edji eye xixeame me djesiwó. ¹¹ Eva yeŋtɔ tɔwo gbɔ ye ŋtɔ tɔwó me xɔe o. ¹² Vɔa ne ame yi wo kpata xɔe, ye woxɔ yibe nyikɔ dji sea, wó nãwó ŋuse be woa trɔzu Mawuviwó. ¹³ Ameyiwo wome dji to ʋu alo ŋtilã be lɔ̃lɔ̃nu me o, boŋ Mawu me wodji wo có ¹⁴ Fifia enyã trɔzu ŋutilã, va nɔ mia dome eye mikpɔ yi be ŋuti kɔkɔe sigbe evi yi wodji có Tɔtɔa gbɔ be ŋuti kɔkɔɛ ene, eye amenuveve gaku nyãteƒe ɖɔɛ zã. ¹⁵ Jã ɖi ɖase kuɖe eŋti eye be do aƒa gblɔ be : ameyi ŋti me gblɔ̃ le be ameyi le ŋgbodo nye me gbɔ̃nɔ̃a, va dó ŋkɔ nem ɖoa ŋtia éli cafi me va. ¹⁶ To yibe agbɔsusumea miwo kpata mi xɔ amenuveve ɖo amenuveve dji. ¹⁷ Ɖoa, wona esea tó Mosé dji, amenuveve gaku nyãteƒea va to Yesu Kristo dji. ¹⁸ Ameɖekpe me kpɔ Mawu gbeɖe kpɔ o. Evi ɖeka yile tɔtɔa bakɔmea ye ɖecɔ fiɔ̃ mi. ¹⁹ Eya ye nyi Jã be ɖasé ɖiɖi ke yuda tɔwo dɔ̃ nunɔlawó ku Lewitɔwó có yerusalem ɖoɖa egbɔbe woa biɔɛ se be ameka ye ne nyí ? ²⁰ Eɖe gblɔ̃ eye me klikɔ, eɖo nyã ŋti gblɔ̃ be me nyi eyè ye nyi Kristo o. ²¹ Wo biɔɛ be "fifia ameka ye ne nyi ? Eliya ye ne nyia ? Eɖoeŋti be ó. ²² Fifia wo biɔɛ be "ameka tútú ne nyi" ale be mia va yi na ɖoeŋti ameyi dɔ̃ mí, nuka gblɔ̃ ne le có ɖokuiwó ŋti ? ²³ Eɖoeŋti be énye nyi ameyi lé wlui do le zogbeadji be gbé be : mi dra aƒetɔa be mɔwo ɖó sigbe ɖeke nyãgblɔɖila Ezaya gblɔ̃e ene ²⁴ Amedɔ̃dɔ̃ wonyi farisitɔwó. Wo biɔe be : ²⁵ Nuka ŋti ne le amewo nyrɔ̃ ke me nyi Kristo, Eliya, alo nyagblɔɖíla ye le nyi o ? ²⁶ Jã ɖoeŋti nɔ̃ gblɔ̃ be : "nyeya eci me cɔ le amewo nyrɔ̃ voa le miadome ameɖeli ke mime djesí ó yi la va le ŋgbodonyeme. ²⁷ Ameyi nyemedje be macu ye be afɔkpakawó. ²⁸ Nuyawo le djɔdjɔ le betani le yordã ŋgbodome fimaye Jã le nyrɔ̃nyrɔ̃a wo le. ²⁹ Ke nukéa ekpɔ Yesu gbɔ̃nɔ̃ égbɔ, ye be gblɔ bena : mikpɔ Mawu be alevi, yike kɔkɔ xixea be nuvɔ le djódjó ma ɖa. ³⁰ Ye nyi ameyi ŋti me gblɔ le be : le ŋgbodonye mea ŋcua ɖe la va, yi va doŋkɔ ne, ɖoa ŋtia, eli keŋgbɔ meva. ³¹ Nye me djesí ó, be ne woɖé dogo acɔa fiɔ̃ Israelléa ye ŋtie meva le amewo nyrɔ̃ ku eci do ³² Jã ɖi aɖase ya be mekpɔ, gbɔgbɔa ɖiɖi co djiƒo sigbe ahɔ̃nɛ ene eye be nɔté le edji. ³³ Nye me djesi o voa ameyi dɔŋ be ma nyrɔ̃ amewó gaku cia, yi ke gblɔ̃ ne be ameyi djie nakpɔ gbɔ̃gbɔ̃a la ɖiɖoa ye ba nɔte le djia ye nyi ameyi la cɔ gbɔgbɔ kɔkɔɛ anyrɔ̃ amewó. ³⁴ Me kpɔe eye me ɖiaɖase be ye nyi Mawu via ³⁵ Le ŋke gbea, Jã nɔte ku yibe nusrɔ̃viwó dometɔ ameve ; ³⁶ Eye be kpɔ Yesu va le yiyimá Jã gblɔ be : mi kpɔ, Mawu be aleviá yè nyié ma ³⁷ Eye nusrɔvi veawó se gblɔ nyã mawo ye wó dje Yesu yóme. ³⁸ Yesu trɔ ye kpɔɛ be wokplɔyiɖó, ye be biɔwose be "nuka diŋ mi ́le" ? ye wo ɖoe ŋti be Rabi (eyi gɔ̃me nyi nufiɔ̃tɔ) fika nenɔ̃na. ³⁹ Egblɔnɔ̃wo be : mi va ne miakpɔɛ. Eyi wóva ye wokpɔ afiyi be nɔ̃na eye wo nɔ̃ egbɔ le gbemagbe, la nɔ̃ sigbe gaƒoƒo amewo gɔ̃a me mawo ene. ⁴⁰ Eye agbetɔ veawo dometɔ ɖeka, yi se Jã be nyã ye be dje Yesu yómea ye nyi André Simɔ Petro be nɔvi. ⁴¹ Ye nyi ameyi ne kpɔ Petro tutu gbɔa eye be gblɔnɛ be : mi kpɔ Mesia (ke gɔme nyi Kristoa). ⁴² Ekplɔeva Yesu gbɔ, Yesu kpɔɛ dũ ye gblɔnɛ be "Kefas" (ke gɔme nyi ekpe). ⁴³ Eyi ŋuga kea Yesu le djidjiŋ be gblɔnɛ be : dje yonyeme. ⁴⁴ Filiƒo có Bethesda, Adre gaku Petro be dume. ⁴⁵ Filiƒo dogo Nathanael, eye be gblɔ ne bena : mi kpɔ ame yiŋtié Mose ŋlɔnu le, le sea me, eye nyãgblɔɖilawó gblɔ nyã ku ɖoa, Yesu nazeretitɔ, Jozef be via. ⁴⁶ Natanael gblɔ nɛ be : ɖe ye enu nyui ɖe atéa aco Nazaretia ? "Filiƒo gblɔ nɛ be, va ye na kpɔ. ⁴⁷ Yesu kpɔ Natanael gbɔnɔ egbɔ, ye gblɔ coŋti be : kpɔɖa Israel tɔ ŋtɔŋtɔ, ameyi mé beblé ɖekpe mele o. ⁴⁸ Natanael gblɔ nɛ be : fika ne djesí le ? Yesu ɖoeŋti nɛ be : keŋgbɔɛ Filiƒo ne yɔwó gayime ne le gbotia gɔmea, me kpɔ xɔxɔ́. ⁴⁹ Natanael ɖoeŋti, gblɔ nɛ be : Rabí Mawu be vi ye ne nyi, Israel be fiɔ. ⁵⁰ Yesu ɖoeŋti nɛ be : ɖoa ŋtia me gblɔ nɔ be me kpɔwó le gbotia gɔmea, ne xɔɛse ; ne le nugã wó kpɔgbe wu eya wó. ⁵¹ Yesu gblɔ nɛ be : nyateƒe le nyateƒe mea, me le gblɔnɔ be la kpɔ djiƒonu lanɔ ʋuʋu eye Mawu dɔlawo, la nɔ edji liã anɔ̃ yiyi anɔ̃ gbɔgbɔ̃ to ame gbetɔ via dji.