¹ Bambale, tolanga sosoe toyene l'itina lika isei lika Wangi liisakoyenele ok'etetei le bikinda bi Makedonia. ² Bayambi batoke wale nta wuke la benyoko beki bo bayenele, nkia oko ngeno le benyoko, baliki la nyingha lenene pe bakapake bakapo wuke nkia bo nkika baliki nko mbolo ntoo-ntoo. ³ Metepela mi mie bakapake kuu nko bankuma bo nguya enkumela ekoliki la bo, nkia pe nsonde nguya le bo, nko la waango boobo nkika. ⁴ Batoyuboli la bonzenze boboe toapa mboka balameme la so oko bosungi bo bakapo baka Bakolami baka Wangi bal'oko Yuda. ⁵ Nteliki oko dweli loki so totangelake ye yaaka bakapake ntondo ok'ole nkolo la mbisa ok'ole so la waango boka Wangi. ⁶ Ngako so tobotitie Tito sosoe, ane osa nde abanda bo'osal'oko bo isei aoyiise kuu pe l'oko'ole nyo. ⁷ Kweli nkonga osonda nyo oko mbo binkumela, oko ilako li ndaka-laka, la boyeli, la bonzenze bonkuma pe la lolango lonyo l'itina li so, bopaaka bosonde wii la nkele dilo oni bosala bone bo iyangi. ⁸ Ntitepele ane nga boto loepaa lotomo lo nkambia ye, yaaka nkeka lolango lonyo nkeka-keka oko mboka le ntepela l'itina lika bonzenze boka bamo ba nyo. ⁹ Ibango nyo boyeba iyangi lika Nkolo leso Yesu Masiya, nde lokoliki bokwaki ayokatikaka mbolo l'itina li nyo, ibango nde nde nyo boyale bakwaki l'itina lika bombolo bo nde. ¹⁰ Lama la lobo'ene, melaka ilako limi li sonda dilo: Ele dilo ok'ole nyo la nzitie nkele biki nyo bokelake oko mpela lesoleka. Boliki bato ba ntondo ntenge nko la nkela-kela ye, yaaka boloki kosanu la nkela-kela. ¹¹ Akoboko boyitia nkela-kela, ngako boseye kio esali eko. Bokapaaka la mposa enkumela la nseye kio kweli nkonga oki nyo bokolimiake ikumelo li kio la biemba bilia nyo. ¹² Ibango laa mposa el'oko, ikapo liyambama oko Wangi kweli la eko esa boto aba, ntenge kweli la yemba empa boto ntambia ye. ¹³ Ntenge lobo lo mboke nyo dia oko bakamba la nzokie bankina nyingha ye; yaaka ebongo nko bokolami boyenele. ¹⁴ Oni ngeng'ene, bobalelo bonyo boyenele pe ngako boyakaka la bosungi ok'ole bakambi. La mbisa, losio lomo laa nyo bosoyotwa swe oko bokamba, laa bo balia bobalelo, bayosono la nsunge nyo. Oko dweli loko bosungi boyenele ntundu binkumela, ¹⁵ kweli nkonga otepela basono boe: ''Oko lokotongoloko wuke ntabaake wuke bo nsonda-sonda ye, Oko lokotongoloko nio ntakambake pe nkia yemba ye.'' ¹⁶ Bitelia ok'ole Wangi lokoyotia lolango lo nga lomi oko bobonda boka Toti l'itina li nyo. ¹⁷ Ibango Tito, ntenge nko wue ayambake lotomo loso ye, yaaka nde nkika ayaka la nyingha enkuma ok'ole nyo la waango bo nde nkika. ¹⁸ Ngako pe tosoetomia nde loselele ndia mbale le dia lumu lo dilo oni bikinda binkumela lama la dweli lotia nde l'itina lika Nsango dilo. ¹⁹ Lonkina, nde asolwake la bikinda boe atolameme oni esali le bakapo nkapa-kapa, ene le kela so la bonene boka nkolo nde nkika pe la ndiakie mposa le so le bosungi. ²⁰ Tolanga so-soe botaba boyale nkoyala oni boka ene le nkape bio biemba bine mpaa-paa. ²¹ Ibango tokapaa mbabali l'itina li nkele mbo bi kolama, ntenge nk'oko beso baka Nkolo ye, yaaka la oko beso baka bato. ²² Sangaa la lone, toetomia ndamema la bo, mbale leso emo lesotolakia mbala wuke bisaa so tookeka ndee alia nkaso wuke. Yaaka akoboko asosonda la nkaso nsonda-sonda ibango la mposa edia nde ok'ole nyo. ²³ L'itina lika Tito, nde alamema la mi pe atia ndiemo la mi l'itina li nyo, pe l'itina lika bambale bankina ba yaka la nde, bo basotomwa la bikinda pe batia l'itina lika bonene boka Nkolo. ²⁴ Bolakiaka bato'ako nyoe boalanga nta sosolo, ngako bikinda bayene pe bayebe boe nko solo so tolia itina li ntikele nyo bebonda.