¹ Paolo, ntomwa eka Masiya Yesu la waango boka Wangi, mbale Timotio, tososono bokanda bone ok'ole Ekinda eka Wangi l'el'oko Kolonto pe ok'ole Bakolami bankuma bal'oko Akaya enkumela. ² Iyangi la totolo biyale ok'ole nyo yima ok'ole Wangi Papa leso Nkolo Yesu Masiya. ³ Wangi pe Papa eka Nkolo leso Yesu Masiya, nde papa le isei, pe Wangi bototondo so bato ngengo binkumela. ⁴ Nde atobondo so ngengo binkumela bilia so mbabali. Ngako so pe toyosone mbonde bane bal'oko mbabali la ibondo likolama oko dweli lotobondili Wangi. ⁵ Ibango nkonga mbabali bika Masiya otokitela bio oni boyalelo boso, nko ngako pe so tobondwa l'itina lika Masiya. ⁶ Laa so tokwele mbabali, ele itina lika lobondwa la pe lobiko lo nyo. Laa so tobondwa, ele itina la lobondwa lo nyo, loyaa nyo bobaaka ngengo esaa nyo bokanda lomo oko mbabali, mbabali eko leele kweli la ene eyaa so tobaaka. ⁷ Pe elikia leso l'itina li nyo eyemi nta kwee, ibango nyoboyeba nyoe, nkonga osaka nyo bolamema oko mbabali biso, ngako bongolamema pe oko lobondwa los. ⁸ Bambale, ntatolange soe nyo boyale nkoyeba mbabali ekoliki la so oko Asia, ibango eliki la bolito bosonda ok'ole so kuu la ngengo eki so toyotangelaka soe lokeno ntalongoyitia nzala-yala ok'ole so lonkina ye. ⁹ Nko solo, oko bebonda beso toyebake nkonga wue basobeke boe towe, yaaka ekelwake ngako l'itina soetoyekasale la nzale nkotika elikia leso ok'ole so nkika, yaaka ok'ole Wangi lo kundola bawi. ¹⁰ Ele nde lokototungolake oko bakakasa ba iwa basonda nguya pe angototungola lonkina; nko solo tolia kio elikia eko ok'ole nde so-soe angotoyitia ntungola lonkina, ¹² One ele lobo lobongo so nzale la losaki: Boyeli bo batangeli baso botolakia boe tosokende oni bolongo, pe nsonda-sonda oni ole nyo, la bokamba bo bosangie bo bienge la pe bososolo, bi yima ok'ole Wangi, one ole bato bampatokende la boyeli boka bato yaaka la iyangi lika Wangi. ¹³ Ibango, oko bekanda besono so ok'ole nyo, ntatoesonele mbo binkina ye, nko biko bibongo nyo ntanga-tanga pe batina mbuta-wuta. Pe ntangela mimiebongoyosono mbute bine nta dilo, ¹⁴ akoboko boiwuta batina nko nta nio nio oko losio loka Nkolo leso Yesu, nyo bongokatelia l'itina liso nkonga onga so tokatelie l'itina li nyo. ¹⁵ Ibango ndiki la mposa wembu oni lone mimie, mebelele nyo ntondo l'itina mie nyo bobae bakapo ba dilo mbala bipele. ¹⁶ Nkolomiake mimie nzoeyene ngengo eya mi ndeke la nse oko Makedonia pe la nzitie mbele nyo oko bayitielo ngengo eyima mi Makedonia pe ngako bongonkembia la nsaka-saka oko lokendo lo leka mi Yuda. ¹⁷ Eko eliki elikia lemi. Ndekiake ngengo nko die. Ngengo ekolimia mi biango bemi, mekolimia nde oko mbaka le keboto? ok'ole mi ntitepele mbal'emo la Oo! oo! La pe ye! Ye! loselele. ¹⁸ Kweli nkonga ole Wangi bokolami, iyoyo liso ok'ole ntaliliki la Oo! la ye! mbal'emo ye . ¹⁹ Ibango Yesu Masiya, wana oka Wangi, oko loki so soa Siloano la Timotio totatolake ok'etetei le nyo, ntenge lobo lo Oo! la ye! mbal'emo ye, yaaka oko'ole nde ele nko lobo lo Oo! ²⁰ Ibango baleno bankuma baka Wangi ok'ole nde bale nko Oo!Kio kieko letepela so ''Nko ngako'' ok'ole nde, ngengo esangola so Wangi. ²¹ Pe Wangi asakotoyemia so kwee lama la lina lika Masiya, ndiemo la nyo pe asakotoswakola, ²² asakoyotia elimbetelo le nde ok'ole so asakopaa Elimo ok'etei le bebonda beso nkonga ndanga. ²³ Ntika Wangi temo le elimo lemi, laa mi nzengisa mie ntiyitie oko Kolinto ibango ntalange nzokie nyo mbabali ye. ²⁴ So ntatolange soe toeyikitie nyo bayambi bo nzikitia la wembu ye, ibango nyo bosakoyemala nta kwee oko boyambi bo nyo; yaaka so toloko lameme soa nyo esali l'itina lika nyingha le nyo.