¹ Basi kuna faida gani kuwa Muyuda? Na kutahiriwa kuna mafaa gani? ² Kuna faida kubwa sana kila upande. Kwanza, Mungu alifunua Neno lake kwa Wayuda kusudi walishike. ³ Tuseme nini basi? Ikiwa wamoja kati yao hawakukuwa waaminifu, jambo hilo litaweza kuonyesha kwamba Mungu ataacha kuwa mwaminifu? ⁴ Hapana hata kidogo! Sherti Mungu ajulikane kuwa mwenye ukweli, na kila mtu kuwa mwongo, kama inavyoandikwa katika Maandiko Matakatifu: «Ee Mungu, sherti ujulikane kuwa mwenye haki katika masemi yako. Nawe ushinde wakati unaposhitakiwa.» ⁵ Lakini ikiwa kwa njia ya ubaya tunaofanya, Mungu anaonekana kuwa mwenye haki, basi tutasema kama Mungu hana haki wakati anapotuazibu? (Ninasema kwa mafikiri ya kimtu.) ⁶ Hapana hata kidogo! Ingekuwa vile, namna gani basi Mungu angeweza kuhukumu dunia? ⁷ Lakini ikiwa kwa njia ya uongo wangu ukweli wa Mungu unaonekana naye anatukuzwa zaidi, basi kwa nini tena ninahukumiwa kama mwenye zambi? ⁸ Ikiwa ni vile, basi tuseme: «Tufanye mabaya kusudi kutokee mema?» Hakika kuna watu wamoja wanaonisingizia wakisema kwamba nimesema vile. Watu hawa wataazibiwa sawa inavyowapasa! Hakuna mwenye haki mbele ya Mungu ⁹ Basi tuseme nini? Sisi Wayuda tunawapita Wagriki nini? Hatuwapiti kitu hata kimoja! Kwa maana nimekwisha kuonyesha kwamba Wayuda na watu wa mataifa mengine wote wako chini ya utawala wa zambi. ¹⁰ Ni sawa ilivyoandikwa katika Maandiko Matakatifu: «Hakuna hata mtu mmoja mwenye haki! ¹¹ Hakuna mtu mwenye ufahamu, hakuna mwenye kushugulika na Mungu. ¹² Wote wamepotea, wote kwa jumla wamepotoka. Hakuna mwenye kufanya mema, hata mmoja. ¹³ Vinywa vyao ni kama kaburi wazi, ndimi zao ni za kudanganya, ndani ya midomo yao munatoka sumu kali sawa ya nyoka. ¹⁴ Vinywa vyao vinajaa laana na maneno ya uchungu. ¹⁵ Wao ni wepesi kwa kumwanga damu. ¹⁶ Wanaharibu na kuangamiza popote wanapopita, ¹⁷ hawawazi juu ya njia ya kuleta amani, ¹⁸ nao hawamwogopi Mungu hata kidogo.» ¹⁹ Basi tunajua kama maneno yote yanayosemwa na Sheria, yanawaelekea wale wanaolazimishwa kutii Sheria, kusudi mtu yeyote asikuwe na namna ya kujitetea, na dunia nzima ipaswe kuhukumiwa na Mungu. ²⁰ Kwa sababu hakuna mtu atakayehesabiwa haki mbele ya Mungu kwa kuwa anatii Sheria, maana Sheria inamusaidia mtu tu kwa kutambua kwamba amefanya zambi. ²¹ Lakini sasa Mungu ameonyesha njia ya kumuhesabia mtu haki mbele yake, na si kwa njia ya Sheria. Maandiko ya Sheria na manabii yanashuhudia kwamba ²² kuhesabiwa haki na Mungu kunapatikana kwa njia ya imani katika Yesu Kristo kwa wote wanaoamini, kwa maana hakuna tofauti yoyote kati yao, ²³ kwa maana wote wamefanya zambi na kukosa utukufu wa Mungu. ²⁴ Lakini kwa neema ya Mungu wanahesabiwa haki kwa bure kwa njia ya Kristo Yesu anayewakomboa. ²⁵ Kristo alitolewa na Mungu kuwa sadaka ya usamehe wa zambi kwa njia ya damu yake kwa ajili ya wenye kumwamini. Mungu alifanya hivi kwa kuonyesha haki yake. ²⁶ Zamani, katika uvumilivu wake, aliacha kuazibu zambi za watu. Lakini kwa wakati wa sasa anaonyesha haki yake kusudi akuwe mwenye haki na kumuhesabia haki kila mtu anayemwamini Yesu. ²⁷ Basi sasa mtu ataweza kujivuna? Hapana! Kwa sababu gani? Kwa sababu anatii Sheria? Hapana. Lakini kwa sababu anamwamini Yesu. ²⁸ Kwa maana tunaona kama mtu anahesabiwa haki mbele ya Mungu kwa njia ya imani wala si kwa njia ya kutii Sheria. ²⁹ Au Mungu ni Mungu wa Wayuda tu? Yeye si Mungu wa watu wa mataifa mengine vilevile? Ndiyo, yeye ni Mungu wa watu wa mataifa mengine vilevile, ³⁰ kwa sababu kuna Mungu mmoja tu. Na ni yeye atakayewahesabia waliotahiriwa na wasiotahiriwa haki mbele yake kwa njia ya imani ya kila wamoja. ³¹ Basi ni kusema kwa sababu ya imani ile tunaitupilia Sheria? Hapana hata kidogo! Lakini tunasimamisha Sheria.