¹ Mufuate tabia ya Mungu kwa maana ninyi ni watoto wake wapendwa. ² Muishi katika upendo kama vile Kristo alivyotupenda na kutoa maisha yake kwa ajili yetu kama vile matoleo na sadaka ya kuteketezwa kwa moto yenye harufu nzuri inayomupendeza Mungu. ³ Kama vile inavyowapasa watu wa Mungu kuishi, tendo lolote la uasherati, la uchafu wala la tamaa ya mali lisisikilike kati yenu. ⁴ Vilevile kusisikilike maneno ya matusi ya ovyo ovyo wala machafu, kwa maana hayana mafaa. Kinachofaa ni kumushukuru Mungu ⁵ Mujue waziwazi kwamba mwasherati yeyote na mchafu na mwenye tamaa ya mali (mwenye tamaa ni kama mwenye kuabudu sanamu), hao wote hawatapewa sehemu ya urizi katika Ufalme wa Kristo na Mungu. ⁶ Mtu asiwadanganye na maneno yasiyokuwa na maana; kwa sababu ya makosa kama hayo, Mungu anawaazibu kwa kasirani yake wale wasiomutii. ⁷ Basi musishirikiane na watu kama wale. ⁸ Zamani muliishi katika giza, lakini sasa, kwa kuungana kwenu na Bwana, munaishi katika mwangaza. Muishi kama watoto wa mwangaza, ⁹ kwa maana matunda ya mwangaza ni wema wa kila namna, haki na ukweli. ¹⁰ Mujikaze kutambua mambo yanayomupendeza Bwana. ¹¹ Musishiriki katika matendo ya giza yasiyofaa, lakini muyafichue. ¹² (Kwa maana ni haya kusema juu ya mambo watu hao wanayofanya kwa siri.) ¹³ Lakini matendo yale yote yanapofunuliwa katika mwangaza, yanaonekana wazi. ¹⁴ Kwa maana yote yanayoonekana wazi yanageuka mwangaza. Ni kwa hiyo inasemwa hivi: «Amuka wewe unayelala! Ufufuke kutoka kati ya wafu, naye Kristo atakuangazia.» ¹⁵ Muangalie vizuri mwenendo wenu. Musiishi kama wajinga lakini muishi kama wenye hekima. ¹⁶ Mutumie vema wakati huu munaokuwa nao kwa maana siku hizi ni mbaya. ¹⁷ Kwa hiyo musikuwe wajinga, lakini mutambue mapenzi ya Bwana. ¹⁸ Musilewe divai kwa maana inaleta upotovu, lakini mujazwe na Roho. ¹⁹ Munapoongea, museme maneno ya zaburi, mumusifu Bwana na kumwabudu kwa nyimbo za kiroho. Mumwimbie na kumushangilia kwa moyo wenu wote. ²⁰ Mumushukuru Mungu Baba siku zote kwa kila jambo, kwa jina la Bwana wetu Yesu Kristo. ²¹ Mukuwe na utii ninyi kwa ninyi kwa kumuheshimu Kristo. ²² Wake wawatii waume wao kama vile wanavyomutii Bwana. ²³ Kwa maana mume ni kichwa cha muke wake, kama vile Kristo anavyokuwa kichwa cha kanisa. Naye mwenyewe ni Mwokozi wa kanisa ambalo ni mwili wake. ²⁴ Wake wanapaswa kutii waume wao katika kila jambo sawa vile kanisa linavyomutii Kristo. ²⁵ Nanyi waume muwapende wake wenu sawa vile Kristo alivyopenda kanisa na kutoa uzima wake kwa ajili yake. ²⁶ Alifanya hivi kusudi atakase kanisa kwa ajili ya Mungu, akilisafisha kwa maji na kwa neno. ²⁷ Alitaka hivi kujipatia yeye mwenyewe kanisa tukufu na takatifu, lisilokuwa na taka wala kikunjo wala kilema chochote. ²⁸ Hivi vilevile waume wanapaswa kupenda wake wao kama vile wanavyopenda miili yao wenyewe. Yule anayependa muke wake, anajipenda yeye mwenyewe. ²⁹ Kwa maana hakuna mtu anayeweza kuchukia mwili wake mwenyewe, lakini anaukulisha na kuuchunga kama Kristo anavyotendea kanisa, ³⁰ kwa sababu sisi ni viungo vya mwili wake. ³¹ Ni sawasawa inavyosemwa katika Maandiko Matakatifu: «Kwa sababu hii, mume ataacha baba yake na mama yake na kuungana na muke wake, nao wawili watakuwa mwili mmoja.» ³² Ni vigumu sana kuelewa siri hii, lakini ninasema mambo yanayoelekea Kristo na kanisa. ³³ Ingawa hivi, kwa ngambo yenu vilevile, kila mume anapaswa kumupenda muke wake kama vile anavyojipenda, na kila muke anapaswa kuheshimu mume wake.