¹ Tangu dia wudikidi hena hana waya kwimbuj diowu kwa butukididi. Alonguki jenji amu laba. ² Kilumbu kia lumingu kia lunga walonga munja Nzambi Athu amwivwanga ayitukanga hengi. Akhedi kwakula etshi kwehi anona malongi ama ngangu jeneji jamu katuka kwehi bipa huya kuhanganga ni mokhu. ³ Keshiku mweni mu hangi mabaya mwana Madiya ni apangi a Jaki ni a pangi jenji Jose Juda ni Simoni. Apangi jenji akhetu kesuku ni etu menamana mosu mawa katulanga lukwikilu. ⁴ HeYesu wa waleza etshi mbikudi kendoku kumwivila kwimbu diowu etshi kudi apangi jenji a nzu imoshi. ⁵ Yesu ka lungidiku kuhanga ipa ya lawu washidi ndambu ya athu mokhu ahuluka. ⁶ Kujiza kwowu kwa mitshima kwa mu yitukisa. Kumanima waya kulonga mu membu ma belabela. ⁷ Wa tambika athu kumi ni mbadi wa watuma mbadi ni mbadi wa wahwa ngolu ha kuwulu dia pevi jia bola. ⁸ Wa wahwa milongi wa kukonda kunona etshi kakima kamoshi loni ka kwenda naku mu njila kaka kamuhangu dipa loni mu kakhombi nushoku fwalanga mu mabenga. ⁹ Wukatudi sapatu unoni miledi yadi. ¹⁰ Wa waleza etshi kosu tangwa nwakengila munzia muthu khalenu ti kilumbu kinwa kenda. ¹¹ Kidi etshi dimbu di moshi aleka kunu yamba ho ka nwivididiku katukenu kukumunenu mavu kumiendu kidi kimbangi mu diambu dieni. ¹² Hendidi kulonga athu mu kukatuka mu masumu. ¹³ Akayidi pevi jia bola lawu awashidi athu maji awa khedi kuyela amana kukola. ¹⁴ Fumu Herode wevwa etshi jina dia Yesu dienda diaya kulululuka athu engi ayanjika kwakula etshi wudi Yowani mubotiki wa tokama mu lufwa kieni kioki ngolu jia Nzambi jekhina kudilombulula mu ipa. ¹⁵ Athu ekha ni kwakula etshi wudi Elia ekhakama ni kubanza etshi wudi mbikudi wa tangwa dikulu. ¹⁶ Herode tangwa dievwa ekina wakula etshi kesuku Yowani wuna vukidi mutu wa tokama ¹⁷ Kikuma Herode wakwatishidi Yowani wa musha mu boloku sambu wa tambudidi Herodias mukhetu wa pangienji Filipo. ¹⁸ Mudiambu Yowani walejidi Herode etshi wa hangidiku pimbu muku tambula mukaji wa pangieyi. ¹⁹ Kieni kioki Herodias ashidi Yowani mu kimbeni ni kuzola ethsi amu jiyi kashi kalungidiku. ²⁰ Kikuma Herode wakhedi kwivwa Yowani woma wakhedi kwijika etshi wakhedi muthu wa mboti wa longu. Kieni kioki wakhedi kumukeba mboti mboti kwivwa kwa mwikinisanga mabanza kisakasaka kwa lawu. kumanima wa mwivwanga ni kieshi. ²¹ Tangwa khinji ya lubutuku lwa Herode ya lumgidi wa hangika vitation wa tambika athu afumu asuta ni akumanda ni atwadishi akowu a Galilea. ²² Mwana mukhetu wa Herodias wejidi ku makinu wa kina makinu menji mahwa Herode ni athu a tambikidi kudia ku khinji evwa kieshi. Fumu wehula mwana mukhetu ngu lombi yosu iwa zola ni kuhu. ²³ Wa zenga ndefu wakula yosu ikulomba ni kukuhwa nayi ataka kitshini ka mavu mu thotu yemi niku kuvukila. ²⁴ Mwana mukhetu wa wudika waya kuhula mamenji etshi ekhi ni kulomba kudi fumu mamenji wa vutula ethsi mutu wa Yowani mbotika. ²⁵ Wengila tswalu waya kumona Totila wa muleza etshi nguhu kikimweni ha dilonga edi mutu wa Yowani mbotika. ²⁶ Totila wekhina khenda khenda kikuma kia ndefi ya zengidi kumesu ma athu. epi kikuma kia athu a tambikidieyi. Pila ya kuleka loni kumuhwa. ²⁷ Totila wa tuma musuta wenda ku mukengidila mu kwenda ku munehina mutu wa Yowani musuta waya ku boloku wa vuka mutu. ²⁸ Wamu sendila mutu ha wulu dia dilonga wahwa mwana mukhetu he mwana muketu wahwa mamenji. ²⁹ Alonguki a Yowani kievidi etshi ajiya Yowani aya kunona mvumbi yenji aya ku yijika ku majamu. ³⁰ Alonguki jia Yesu kievidi kienekina aya ku waningina ni Yesu homa ha moshi amuleza yosu ya ahangidi ni yalongidi. ³¹ He wa waleza etshi ndanga nwendi ku thotu ya zelu ni zelu nuhwidi kandambu ka yilumbu kikuma athu lawu akhedi kwiza ni kwenda ka kediku ni tangwa dia kudia. ³² Kieni kioki aya kwingila mu watu hendi mu thotu ya zelu ni zelu. ³³ Awa mweni azanguluka mu kwenda athu lawu awejikidi kieni kioki anonini fishi athu osu ayanga kumiendu athu a membu lawu atudidi athu atheti. ³⁴ Tangwa dia wudika mu watu sambwedina. Wa mona athu lawu wevwa kenda jiowu kikuma akhedi mudi etshi mikoku ya hinda muthu wa ku yisungula. Kieni kioki ayanjikidi ku walonga mambu lawu. ³⁵ Kiela tangwa dia hita alonguki jenji eza kudi mweni ku muleza etshi homaha hedi mavu ma zelu ni zelu tangwa epi diaya. ³⁶ Watumi hendi mu membu ma bela bela asumbi yima ya kudia. ³⁷ Wa wahwa mvutu etshi henu mweni wahwenu yima ya kudia amuleza etshi twa lunga kwenda kusumba mapa ma fwalanga khama jiadi kikuma tu wahu adi. ³⁸ Wa wehula itshini ya mapa ingahi nudi nayi ndangenu nutadi kiela awaleza akula etshi mapa itshini itanu ashi mbadi. ³⁹ Waleza athu osu mu kushikama mu yibuka mu mwangu. ⁴⁰ Ashikimini mu yibuka ya hatu kama ni kibuka kia athu makumi matanu. ⁴¹ Kiela wanona itshini ya mapa itanu ni ashi mbadi wa tala kuwulu wa sakumuna wa vuka itshini wahwa alonguki jenji mu kukapila athu a lawu. awa kapishi osu ashi mbadi. ⁴² Adidi osu ti akutidi. ⁴³ Atongunini epi itshini ya mapa hinda kumi ni mbadi ni itshini ya ashi. ⁴⁴ Athu osu adidi mapa ni ashi akhedi mafunda matanu ma athu. ⁴⁵ Mu mbala imoshi wengisa alonguki jenji mu watu mu kwenda teti heni sambwa dia Bethsaida. Tangwa dia khedi kuvutula athu. ⁴⁶ Kiedidi waleza athu mu kuvutuka mweni wendidi ha wulu dia mundonda kikuma kia kusamba. ⁴⁷ Kingweja kiabwa watu wakhedi watula ha kathsi ka meya mweni wakhedi henji mweni hashi. ⁴⁸ Tangwa dia mona etshi akedi ni mutshindu watu wendi kikuma kia funji yakhedi ngolu. Mu tangwa dia makumi madi ni yimoshi dia pipa waya kudi heni ni kwendila ha wulu dia meya ma jima wakhedi kuzola etshi a hiti mu bela bela ni heni. ⁴⁹ Kashi tangwa diamu mweni wenda kiba ha wulu dia meya heni a banjidi etshi mami wata atatula kia ngolu. ⁵⁰ Kikuma amumweni osu ayanjika kutambika mudi pevi ya bola kikimweni wa wa wakusa wa waleza etshi khalenu ni ngolu kumwila owu ami nu khaloku ni woma. ⁵¹ Wengila mu watu ni heni he funji ya lembama osu ayanjika kubula mabuku ayituka. ⁵² Kikuma ka khediku kwiyika itshini ya mapa itanu heki ya zodidi kwakula mitshima yowu yakhedi yakola. ⁵³ Kiedidi azawuka ha sambwa mu mavu ma akwa genesareth akasa watu. ⁵⁴ Kiedidi a wudika mu watu awejikidi mu mbala imoshi. ⁵⁵ A yanjikidi kwenda mu membu mosu ma thotu mwena yina a yanjikidi muku munehina athu akhedi ni makhashi kumwila ha wulu dia muhela kuma kwosu athu hevwanga etshi wudi hokuna ayanga. ⁵⁶ Muma mwosu akhedi kwingila mu membu ni mu mavula muji thotu jieka akhedi kusha akhashi muma zandu akhedi kumu bondila etshi twalembwa kwetu twa buba kwetu ata miledi yeyi tu kwati kwetu athu lawu akhedi kumukwata akodidi.