¹ Kilumbu kia lumingu kikia hitidi Madiya wa Magdala Madiya mama ya Jaki ni ya Salome asumbidi mananashi mu kuwasa mwila wa Yesu. ² Mu suka suka dia kilumbu kia thethi kia posa endidi ku majamu kia wudikidi tangwa. ³ Akwangananga nani uku tukokila yala didi ku twala ya majamu. ⁴ Kia thuthidi mesu a mweni etshi muthu wa thuthula yala kikuma dia khedi dijima dijima. ⁵ Engididi mu majamu amweni mwana yala wa vwata lopu ditoka wa shikama ku khokhu dia kitata eni a yitukidi. ⁶ Wa waleza nwivwoku woma. Nwenda henga Yesu wa Nazaleti wa khokhidi ha kilundji wa tokimini mu lufwa. Keshiku haha talenu homa ha mushidi. ⁷ Kashi ndenu lezenu alonguki jenji ni Petulu endingi ku Galilea. Kwenokuna nwa kamumona kioki anu lejidi. ⁸ Awudikidi fishi mu majamu. Ayitukanga ni kutekita alejidiku ata muthu kikuma akhedi ni woma wingi. ⁹ Mu suka suka kilumbu kia thethi kia posa kunima dia kutokama wa mwekinini thethi kudi Madiya madeleni kwa kayidi pevi tsambwadi. ¹⁰ Wendidi wa lombulula kudi awa akhedi nenji kiakhedi kuyangangana ni kudila. ¹¹ Kievidi makhedi kwakula etshi Yesu wudi ni moyi mweni wa mu mweni kamu kwikididiku. ¹² Mu kulaba wa mwekhinini kudi athu ekha mbadi mu pila yekha kia khedi kwenda mu mwangu. ¹³ Endidi kuleza alonguki akowu ekha kashi kawa kwikididiku. ¹⁴ Ku tshuka Yesu wa mwekhana kudi kumi ni mu moshi ki adianga ha mesa wa walongidi mu kukonda kwa lukwikilu ni kukhala ni mutshima wa kola mu kuleka kukumbula awa angu mona etshi nia tokama mu lufwa. ¹⁵ Wa waleza ndenu muma mwosu longenu tsangu kudi athu osu. ¹⁶ Owu wa kwikula ni wa botama wa ka huluka owu wa leka kukwikila wa kafwa. ¹⁷ Talenu yipa ya ka mwekhana kudi akwikidi akakaya ji pevi mu jina diemu akakulanga ndaka jekha. ¹⁸ Akakwata aniokha ku mokhu ivwa anwa ndenga ya kawa hangoku kima akasha mokhu kudi akhashi aka kola. ¹⁹ Kunima dia ku wakusa waya ku wulu wa shikama ku khoku dia kitata dia Nzambi. ²⁰ Alonguki endidi muma mwosu kulombulula tsangu ya mboti. Fumu wa wasadisanga mu kisalu kiowu malongi ma makhedi ma pimbu kikuma yipa ya hangamanga.