¹ Yesu wa katukidi hena hana waya ku kifutshi kia Zude mu sambwa dia Yordani athu amu wongiminini wa yamjika kuwa longa. ² A Farize ejidi ku muhula muku mu meka amuhula tshiku yetu yenda hana njila kwa muthu mu kuleka mukaji enji. ³ Yesu wa vutudidi mu kivwa eki khia tshiku Moyize anu hwedi. ⁴ Akudidi etshi Moyize wa hanini njila kudi yala mu kuhana mukanda wa ku kayila mukaji eyi. ⁵ Ya khedi kikuma kia mitshima yenu ya bola anu sonikinini tshiku yeneyi. ⁶ Kashi mu luyandjiku mwa khediku kienekina Nzambi wa wahangidi yala ni mukhetu. ⁷ Kieni kioki yala waka katuka kunzu yowu waya kukangama ni mukaji enji. ⁸ Owu mbadi akekhina muthu mu moshi eshiku epi athu mbadi akekhina muthu mu moshi. ⁹ Kieni kioki Nzambi ivwa wakwedisa athu muthu kalendidiku kuwa kapula. ¹⁰ Kiakhedi munzu alomguki amuhudidi namu. ¹¹ Mweni wa waleza etshi mwosu oyuna waleka mukhetu wenji waya kukwela mukhetu mwekha wata mbongi ni mukhetu mweno owuna. ¹² Pila yimoshi mukhetu walekangana ni mulumi wenji wakwela yala mwekha wata mbongi. ¹³ He amu nehina ana abibi kikuma awashi moku awa sakumuni kashi alonguki awa kayidi. ¹⁴ Kashi Yesu kiamweni kienekina khenda jia mukwata wa waleza etshi lekenu ana abibi eza kudi ami nu wakasa oku njila kikuma kifumu kia ku wulu kidi kudi awa edi mudi eni. ¹⁵ Ejikenu etshi mu masonga owu waka leka kunona kifumu kia ku wulu mudi mwana mubibi kakengiloku. ¹⁶ He wanona ana abibi a mokhu menji wa washia mokhu ni kuwa sakumuna. ¹⁷ Kiela wa yandjika kukiba yala mu moshi wejidi fishi kudi mweni wafukimini mweni etshi longi wa mboti ekhi ni kuhanga mu kunona moyi wa mvula ni mvula. ¹⁸ Yesu etshi kikuma kiakhi watambikila muthu wa mbotti kushiku ni muthu wa mboti kaka Nzambi. ¹⁹ Wejiya tshiku eji kujiya muhtu loni kuta mbongi loni kukaba loni zitisa tatunu ni mama utoku kitemu kia luvumu. ²⁰ Yala mweni wakula longi nienda kulemvuka mu yima mweneyina yosu yandjika kilengi kiemi. ²¹ Yesu wa mutala wamu zola wa muleza etshi ayi muthu wakonda kima kimoshi sumbisa yima yosu yi udi nayi wuhani mbongu kudi atsukami wakana kimvwama kidi ku wulu. he iza wundabi. ²² Kashi wekhina khenda khenda kikuma kia menama waya kieshi loni kikuma wakhedi ni yima yingi. ²³ Yesu watala mu khulu yenji wakula kwa alonguki jenji kikudi pashi kudi awa edi amvwama mu kwingila mu kifumu kia Nzambi. ²⁴ Alonguki ayitukidi mu mambu menama kashi Yesu wa waleza epi ana talu ekhi idi pashi mu kwingila mu kifumu kia Nzambi. ²⁵ Kwa zeya kudi punda mu kuhita mu buku dia shindani kwa mvwama mu kwingila mu kifumu kia Nzambi. ²⁶ Ekhinini kuyituka kwa ngolu ni kwakula kwenji eni etshi nani wa kahuluka ivwa mambu medi kienekina. ²⁷ Yesu wa watadidi wakula yidi pashi kudi enu athu kashi kudi Nzambi yishiku ata pashi fioti. ²⁸ Petulu wayanjika ku muleza etshi etu twasisa mosu ni isalu yetu tweza kulaba ayi. ²⁹ Yesu wakula ni kiedika kiosu kushiku muthu waka shisa nzu yenji apangi jienji amala ni akhetu mama ni tata enji ana jienji thotu yenji kikuma kiamemi ni kikuma kia tsangu ya mboti. ³⁰ Akonda kunona matapishi mbala khama mu kifutshi manzu apangi amama mavu ni kuniokwama mu tangwa dia keza wakanona moyi wa mvula ni mvula. ³¹ Kashi engi awa athetikila aka sukinina awa asukinina akathetikila. ³² Akhedi mu njila mu kukanduka ku Yeluselemi Yesu kutwala yowu alonguki ayitukidi ni awa alabanga kumanima evidi woma he Yesu wa katuka epi ni akumi ni mbadi wa yandjika kwakula ama maka lunga ku mubwila thama loni. ³³ Unikinenu twakanduka ha Yeluselemi ni mwana muthu akumuhana kwa anganga Nzambi ni asoniki aka mujiya ni ku mu hana kudi apani. ³⁴ Aka mu seya aka lokudila mati ni kumu bulanga ni kumu jiya kashi kunima dia ilumbu isatu waka tokama. ³⁵ Jaki ni Yowani ana a Zebede ejidi kudi mweni mu kwakula longi twa zola uhangi kikuma kietu eyi yosu yitu ku kulomba. ³⁶ Wa waleza nwa zola ni hangi ekhi kikuma kienu. ³⁷ Akudidi tuhu njila tu shikami ni ayi mu kifumu kieyi mu moski ku kitata kieyi mukwowu ku kimama. ³⁸ Kashi Yesu wa vutudila nwijiku yi nwenda nwa lomba nwa kunga kukuka mu kunwa kopa di nakanwa to muku kumbula mbotika ina kanona. ³⁹ Amu lejidi twa lunga Yesu wa walwza kopa di na kanwa nwa kanwa aka nu botika mu mbotika eyi ami nia botama. ⁴⁰ Kashi mu ama ma tadila nani waka khala wa shikama ku khoku diemi dia kitata ivwa loni ku khoku diemi dia kimama keshiku kudi ami mu kuhana kashi idi kudi awa menama ma hangiminini. ⁴¹ Kiela alonguki ekha kumi amevwa ayandjika kwivila Jaki ni Yowani khabu. ⁴² Yesu wa watambikidi kudi mweni wakula nwenda nwejika etshi awa enda kunona afumu a apani enda kuwa hita amambuta mu katshi keni enda ku wa yala. ⁴³ Kashi malungidiku kukhala kienekina mu katshi kenu owu wa zola kwikina mbuta mu katshi kenu afeti kwikina muthu wenu wa kisalu. ⁴⁴ Owu ya zola kwikina wa thethi mu katshi kenu afeti kwikina muhika wa athu osu. ⁴⁵ Kikuma mwana muthu kejidiku mu kumuhangila kashi mu kuhangila ni kikuma kia kuhana moyi wenji mudi dikabu kikuma kia athu engi. ⁴⁶ Atudidi ha Yeriko kia katukidi ni alonguki jenji ni hunji di athu mwana wa Tewe Bartime mufwa mesu mu lombi wa mbongu wakhedi washikana mu khulu ya njila. ⁴⁷ Kievidi etshi wudi Yesu wa Nazaleti wa khedi kuhita wa yanjika ku ngania ni kulonda Yesu mwana Davidi ngwividi khenda. ⁴⁸ Athu engi amu beyidi ni ku muleza adibati kashi wa ngania epi mwana Davidi ngwividi khenda. ⁴⁹ Yesu wa makhana wa waleza amu tambiki atambikidi povu akula kikesa zanguluka wenda wa kutambika. ⁵⁰ Wa konga mvwela mu lukalu wa sotuka weza kudi Yesu. ⁵¹ Yesu wamu vutudididi wakula ekhi wa zola ni ku hangidi povu wakula fumu nia zola kumona epi. ⁵² Yesu wa muleza nda lukwikilu lweyi lwa kukodisa tangwa dienedina wa lungidi kunona epi wa mu labidi mu njila.