¹ Tangwa diamweni Yesu athu mwena wana lawu wanini ha mundonda. Kiela wa shikama alonguki jiendji aya kudi mweni. ² Mweni wa yandjikidi ku wa longa ni kwakula etshi ³ Kieshi kudi atshukami mu ki pevi kikuma kifumu kia ku wulu kidi kiowowu. ⁴ Kieshi kudi awa edi kudilanga kikuma eni a kanona ngolu. ⁵ Kieshi kudi awa enda kudikulumusa kikuma eni a ka yala kifutshi. ⁶ Kieshi kudi awa edi ni nzala ni pwisa ya kuhanga mambu mamboti kikuma eni a ka khala akuta. ⁷ Kieshi kudi enu akwa khenda kikuma eni a ka wevila khenda. ⁸ Kieshi kudi awa edi mitshima mia shipula kikuma eni a ka mona Nzambi. ⁹ Kieshi kudi awa enda kwingisa kwivangana kikuma eni a ka wa tambika ana jia Nzambi. ¹⁰ Kieshi kudi awa enda ku mwesa pashi kikuma kia mambu ma pimbu kifumu kia ku wulu kidi kiowowu. ¹¹ Kieshi kikhadi ni enu yivwa athu enda a nu tukana ni kumwesa pashi ni ku nu hunina mambu mabola kikuma kia memi. ¹² Sangukenu khalenu ni kieshi kingi kikuma matapishi menu medi mengi ku wulu. Kikuma kienokioki athu a mwenishini a mbikudi athethikididi pashi. ¹³ Enu nudi mungwa a hashi kashi yivwa mungwa wa sululuka kiehi walunga kuwaha epi e. Wushiku epi ni fhunu kaka ku wu konga handji athu a wu diati kowu. Enu nudi Mwania wa kifutshi. ¹⁴ Vidi dia tunga ha wulu di mundonda di ku swamananga oku. ¹⁵ Yidi mudi athu kienda kulemisa mwinda kaku wu windanga oku kinda. Kashi eni enda ku wushia hathendji mu ku bejimina kudi athu oshu mu katshi ka nzu. ¹⁶ Kienikioki enu nu feti kubejiminanga ku mesu ma athu mu kikuma eni amoni yisalu yenu ya pimbu ahu Tatenu wudi ku wulu. ¹⁷ Nu banza oku etshi ami niejidi mu kujiya tshiku to malongi ma ambikudi. Ami niejidiku mu ku jijiya kashi mu ku ji lungisa. ¹⁸ Kiedika ami nia nu leza etshi tangwa dioshu wulu ni mavu ma ka khalanga ata ka kisona kamoshi ka tshiku ka katuka oku ku tshiku tii kwa ka hangimina mambu moshu. ¹⁹ Kienikioki oyu wa jiya tshiku ata yitshiotu ni kulonga akwawu mu kuhanga mudi mweni wa kakhala wa tshuka mu kifumu kia Nzambi. Kashi oyu wa ka yijitisa ni ku yi longa kudi athu ekha mu kuhanga kienekina wa kakhala wathethi mu kifumu kia ku wulu. ²⁰ Ami nienda nia nu leza eki yivwa mambu menu ma pimbu mahitidiku ma malongi ma jitshiku ni afadishi enu nwa kengila oku mu kifumu kia ku wulu. ²¹ Enu nwevidi etshi alejidi athu a tangwa dikulu etshi Ayi wu jiya oku koshu wajiya mukowu wa ka wudika mu mbaji kudi a zuji mu kusamba. ²² Kashi ami nienda nia nu leza etshi koshu wevila mukowu kabu afeti ku mu wudisa mu mbaji ya a zuji mu ku samba Oyu watukana mukowu etshi Wudi kitsukutsuku a ka wudisa mu mbaji jia ya amambuta. Koshu wakula etshi Wijiku kima wa kenda ku jiku dia thuya twenda kuleka kujima. ²⁴ Mutsindu wumoshi yivwa wenda wa hana makabu ku mesa ma Fumu wibuka etshi kudi ni muthu wu ku lekanga ²³ kwivwangana nendji zeza khadi makabu penapena ni mesa vutuka nwivwangani thethi ni pangieyi. Kumanima vutuka wu hani makabu meyi. ²⁵ Evwangana swalu ni muthu wa ku funda tangwa di nu kwendanga kusamba ku mbaji yivwa lo muthu wa ku funda wu ku kapa ku mokhu ma zuji he a zuji a ku kuhana ku mokhu ma misandji a ku kumba mu boloku. ²⁶ Kiedika nia kuleza wa ka wudika oku konda kufuta fhuka yoshu. ²⁷ Enu nwevidi a nu lejidi etshi nuta oku mbongi ni muakaji angani. ²⁸ Kashi ami nia nu leza etshi koshu wa tala mukhetu ni ku mulengulula wata nendji mbongi mu mutshima wendji. ²⁹ Yivwa etshi disu dieyi dia kitata dienda dia kusenda mu kuhanga kubola dizokudi wu di kongi kwalaha ni ayi kikuma yidi pimbu kudi ayi ndambu yimoshi ya mwila weyi yibebi mwila weyi woshu aleki ku wumba ku yilungi. ³⁰ Yivwa etshi kokhu dieyi dia kitata dia kusenda mu kuhanga kubola divuki wu dikongi kwalaha ni ayi kikuma yidi pimbu kudi ayi kitshini kia mwila weyi kimoshi kibebi mwila weyi woshu wu leki kwenda ku yilungi. ³¹ Akudidi epi etshi Koshu waleka mukaji endji a muhu mukanda wa jihila wala. ³² Kashi ami nia nu leza etshi koshu wajiya wala ni mukaji endji yivwa keshiku kikuma kia mbongi ni yala mwekha wa mwikhinisa mukhetu wa ndumba koshu wa ka mu kwela wata nendji mbongi. ³³ Nwevidi thunda kudi a khakha jietu etshi wu zenga oku ndefi ya luvunu kashi lungisa ma wa zengidi kudi Fumu. ³⁴ Kashi nu dioku ndefi mu jina dia wulu kikuma didi kitshi kia kifumu kia Nzambi ³⁵ to yikhadi mu jina dia mavu kikuma medi homa henda kushia Nzambi miendu. ³⁶ Wu zenga oku ndefi mu jina dia mutwa weyi kikuma wa lungidiku kwikhinisa suki jeihi jikhini jitoka to jibwiti. ³⁷ Tangwa di nu kwakulanga leka ndaka yenu yikhadi ya kiedika etshi makhadi kienekina to meshiku kienekina. ³⁸ Nwevidi akudidi etshi Moshu wa kutobula disu ayi epi mu tobudi disu akuvuka zewu mu vuku niayi zewu. ³⁹ kashi ami nia nuleza etshi nu kasa oku mutshima kudi oyu wabola koshu muthu wa kubula mu tafu dia kitata muhu epi tafu dia kimama. ⁴⁰ Yivwa muthu wa zola ku kufunda kudi leta kikuma atambudi kazaku keyi muleki kwendji anoni. ⁴¹ Yivwa muthu wa ku lomba wuhangi yitamina funda ayi hanga midi yadi ya mafunda ni mweni. ⁴² Kapa kudi muthu oyu wu ku kulombanga wimina oku muthu wazola kutefwa kudi ayi. ⁴³ Nwevidi akudidi etshi ayi wufeti kuzola pangieyi menga mbeni weyi. ⁴⁴ Kashi ami nia nu leza etshi Zolangenu a mbeni jienu sambilangenu Nzambi kikuma kia athu enda ku nuhwa pashi ⁴⁵ He kienekina nu nu kwikhina ana jia tata yenenu wudi ku wulu. Kikuma wenda kuhana mwania kudi athu a bola ni athu a pimbu wenda epi kunokisa mvula kudi athu a pimbu ni athu a bola. ⁴⁶ Kashi yivwa nwenda nwa zola kasu athu enda ku nu zola khia matapishi nwa ka nona. ⁴⁷ Tulaki epi enda kuhanga pila yi moshi. Yivwa nwenda kuhwa kasu a pangi jienu mboti ekhi ya mboti nu kuhanganga ya hita eni. ⁴⁸ A pani epi enda kuhanga kienekina. Khalenu athu nudi nwa lunga mudi tatunu wudi ku wulu.