¹ Kiela Yesu wa manisa mu kwakula mambu menamana moshu walejidi alunguki jienji etsi ² Ejikenu etshi khinji ya lufwa lwemi yikukhala mu matshiku madi mwana wa muthu aka mukapa ni kumukhokha akulunji. ³ He Afumu jia Anganga-Nzambi ni amambuta Ayuda endidi kuwanina munzia Kayafwa fumu dia Anganga-Nzambi. ⁴ Evinginini etshi akwati Yesu mu kitsweki endi kumujiya. ⁵ Akhedi kwakula etshi tu mukwatoku mu khinji yivwa lo athu akwivwa khabu. ⁶ Yesu wakhedi ku Betania munzia Simoni mukwa bwashi. ⁷ Mukhetu mumoshi wejidi penapena ni mweni wakhedi ni mulangi wa madiashi ma thalu yingi wa ma mwangini mu mutwa wa Yesu kiakhedi a mesa ni kudia. ⁸ Kashi Alonguki jienji kia mweni kienekina abokutidi eni etshi kikuma kiakhi wazangila madiashi kienekina. ⁹ Twambidi ku masumbisa mu thalu yingi twakapila awayi fwalanga. ¹⁰ Yesu wejikidi mambu makhedi kwakula he wa waleza etsi Ekhi nu kuhwekanga mukhetu oyu pashi. Mambu mahanga kudi ami medi mawaha. ¹¹ Kikuma nudi ni awayi tangwa dioshu kashi ami nu kubuloku epi kukhala niami. ¹² Pila ya ngumwangina madiashi mu mwila wemi wahanga kienikina mu kuhangika mwila wemi kikuma ya sala fioti angujiki. ¹³ Nia nuleza mukiedika etsi kwoshu kwa kabula kulonga tsangu ya mboti mu kifutshi akabula kwakudila mambu mahanga mukhetu oyu ni ku mubanzanga. ¹⁴ Mu tangwa mwenedina mumoshi mukatshi ka kumi ni mbadi dia Alonguki jina dienji Yudashi Yiskadioti wendidi kumona Fumu wa Anganga-Nzambi ¹⁵ wa wehula etsi ekhi nu kunguhwa yivwa nia nu yekudila Yesu. Eni amuhwedi fwalanga makumi masatu. ¹⁶ Katuka tangwa mwenedina mweni wahenganga djila ya ku muyekula kudi eni. ¹⁷ Lutshiku lwa thethi lwa khinji ya mapa menda kuleka kunana Alonguki jienji ehudidi Yesu etshi kwehi wazola tu kuhangikidi madia ma khinji. ¹⁸ Mweni etshi ndangenu ku vidi mu nzu ya muthu mumoshi nu muleji etsi fumu wakula tangwa diemi dai lunga Ni kuhanga kinji ya Paki kunjeyi ni Alonguki jiemi. ¹⁹ Alonguki ahangidi mudi kia walejidi Yesu ahangikidi madia ma khinji. ²¹ Kingweji ki kia bwidi Yesu wakhedi a mesa ni alonguki jienji kumi ni mbadi. ²⁰ Kiakhedi kudia Yesu wa waleza etsi kiedika muthu mumoshi mu katshi kenu wungu yekula. ²² Alonguki ekhinini khenda khenda ayanjika ku muhula mu moshi mumoshi Keshiku ami Fumu. ²³ Yesu wavutudidi etsi Mwosu oyuna wukudianga ni ami longa dimoshi mweni wukungu yekula. ²⁴ Mwana wa muthu wakufwa mudi kiyidi ya sonama kashi khenda jingi kudi muthu waka yekula mwana muthu. Yambidi kukhala pimbu kudi muthu mwenoyuna aleki kutetuka. ²⁵ Yudashi Yiskadioti oyu wa mu yekudidi wehula Longi yidi Ami Yesu wa mu vutudila etshi Ayi mweni wa makula. ²⁶ Kiakhedi Yesu wa nona dipa wa vutula matondu kudi Nzambi wa di vuka wahwa alonguki jienji wa waleza etsi nonenu nudi owu wudi mwila mwemi. ²⁷ Wanonini dikopa wa vutula matondu kwa Nzambi wa wahwa mweni etshi nwangenu enu oshu. ²⁸ Kikuma ama medi mashi mamemi meni medi kimenga kiengisa kwivwangana kwenenu ni Nzambi kikuma kia kubola kwa athu. ²⁹ Kashi nienda nia nuleza etsi yanjika kieneki nia kanwa oku epi maluvu mmenama tii lutshiku lu nia kanwa nienu maluvu mekha mu kifumu kia Tata. ³⁰ Kumanima ma kuyimba mimbu mia khinji endidi ku mundonda wa Olive. ³¹ Tangwedi he Yesu wa waleza etshi pipa ya lelu eno oshu nu ngu leka kikuma masonama etshi nia kajiya ngungudi mamemi maka mwangana. ³² Kashi Yesu wayika epi etsi ki nia katokama nia kenda kunu makinina ku ngadidi. ³³ Kashi Petulu wanonini ndaka wakula etshi ata athu oshu aka kuleka ami nia ka kuleka oku lo. ³⁴ Yesu etshi kiedika mu pipa ya lelu nzolu kamba oku kadi kukokula ayi wamba kungusuwangana mbala jisatu. ³⁵ Petulu wa muleza etsi nia ka kusuwangana oku atat fioti ata kufwa nia kafwa ni ayi. Alonguki ekha akudidi kaka pila yimoshi. ³⁶ He Yesu watudidi ni Alonguki jienji mu kilanga kimoshi kienda kutambika Getesemani khalenu henaha ami niaya kusambila okuna. ³⁷ Wasendidi Petulu ni ana mbadi a Zebede Wakhedi khenda khenda ni mutshima pashi. ³⁸ He wa waleza etsi mutshima wemi wazala ni khenda mudi ni kufwa khalenu Salenu henaha tukhielenu. ³⁹ Wapushinini mwa fioti wafukama mbunzu hashi wayanjika kusambila Nzambi etsi Tata yivwa wa zola hitisa kopa edi dia pashi di kungwijilanga. ⁴⁰ Wuhanga oku luzolu lwemi kashi hanga moshu ma wazola. Wavutukidi kwakhedi alonguki asatu wendi kuwawana alangala thulu. Waleza Petulu kiehi enu nwa leka kukhiela ni ami ata tamgwa dimoshi. ⁴¹ Khalenu nwa tokama sambilangenu Nzambi mbeni aleki kunubwisa. Pevi ya muthu ya zala ni mambu mawaha kashi mwila wenji ngolu lo. ⁴² Waya epi mbala ya kiadi mu kusambila mweni etsi tata Yivwa kopa edi dialungidiku kuhita kaka ni dinu leka luzolu lweyi luhangami. ⁴³ Wavutuka epi kwakhedi Alonguki jienji wa wanini alangala kaka thulu kikuma mesu makhedi ma walema. ⁴⁴ Yesu wa washishidi epi waya kusambila mbala ya kisatu ni kwakula kaka mutishindu wumoshi. ⁴⁶ Kumanima he wavutukidi kwakhedi Alonguki jienji wa waleza etsi nudi kaka nwalangala to nwa tokama Talenu tangwa dialunga mwana muthu a kumu yekula ku mokhu ma athu a bola. ⁴⁵ Zangulukenu twendenu. Muthu wu ku yekula wudi haha. ⁴⁷ Tangwa Yesu akhedi kwakula Yudashi mu moshi mu katshi ka Alonguki kumi ni mbadi wejidi nia athu lawu anehini poku ya mwela ni mbolombolu. ⁴⁸ Muthu wa yekudidi Yesu wa walejidi pila yamba kumwijikila wa waleza etshi muthu wuniamba kuhwa mboti mweni yoyi hani nu mukwati. ⁴⁹ Mu mbala yimoshi Yudashi wendidi penapena ni Yesu wakula etshi mboti Longi wa yamba. ⁵⁰ Yesu wa muvutudila etshi Pangiemi moshu ma wazola kuhanga mahangi tswalu. Awana asadidi ejidi amushia Yesu mokhu amu kwata. ⁵³ Mumoshi mu kathsi ka athu akhedi ni Yesu wa wuwishidi poku yenji wakuba musadi wa fumu wa Anganga Nzambi wa muvuka diatu. ⁵² He Yesu wamuleza etshi vutula poku yeyi mu kilalu kikuma oshu awa enda kunwana ni poku akafwa ku poku. ⁵¹ Wushiku kwijikanga etshi nia lunga kutambika Tata eji kungu sadisa mu mbala yimoshi wukuthumisa asuta jienji Awanjio lawu ahita batayo kumi ni mbadi. ⁵⁴ Kashi yivwa nia hanga kienekina kiehi mambu medi masonama ma ku lunga. ⁵⁵ Kumanima Yesu wehula athu mwena wana etshi Enu nwa lungidiku kwiza ni ji poku ni mitondu mu ku ngu jiya mudi nidi mwiji. Niakhedi kukhala ni enu matshiku moshu mu Nzau ya Nzambi ni ku nu longa ekhi nwakhedi kukonda kukwatila. ⁵⁶ Menama moshu mabwa mu kulungisa mambu medi masonama mu mikanda ya a mbikudi. Alonguki oshu amushishidi atshina. ⁵⁷ Awana akwatidi Yesu endidi ku musenda kudi Kayafwa mbuta dia Anganga Nzambi kwenda kuwongama amambuta dibundu ni a malongi a jitshiku. ⁵⁸ Petulu wakhedi kulaba Yesu alaha tii mu lupangu lwa mbuta wa a nganga Nzambi. Wengididi mu lupangu wa shikama hakhedi akhengididi ni kutala kiehi maku suka. ⁵⁹ A fumu jia Anganga Nzambi ni a mbaku akhedi kuhenga athu alunga kuhunina Yesu mambu aswakadi ku mu jiya. ⁶⁰ Kashi athu ejidi engi ejidi ku muhunina mambu amweniku ata kubola kumoshi tii athu mbadi ejidi kutula ⁶¹ akula etshi Muthu mwenoyu wakhedi kwakula etshi Ami nia kabwisa nzu ya Nzambi nia ka yitunga epi mu matshiku masatu. ⁶² Mbuta dia anganga Nzambi wa zangulukidi wakula kudi Yesu etsi wendoku wa vutula mvutu ekhi akwakulanga ya bola mu jina dieyi. ⁶³ Kashi Yesu wakhedi wa dibata. Mbuta dia anganga Nzambi wa muleza esthi zenga ndefi mu jina dia Nzambi wa moyi wutuleji yivwa ayi wudi Mesiya mwana wa Nzambi. ⁶⁴ Yesu wa mu vutudila etshi ayi mweni wa makula. Kashi nia nuleza etshi yanjika kikimweni nu kubula kumona ami mwana wa muthu ki ni kibula kushikama penapena ni Tata ni lukumu lwoshu ti ki niakeza kukulumuka mu matuta. ⁶⁵ He mbuta dia anganga Nzambi wa bakhidi miledi yenji wakula etshi watukana Nzambi ekhi epi tukuhengila athemu Nwa divila enu mweni kia tukana Nzambi. ⁶⁶ Enu kiehi nwa banza eni etshi Afeti kaka kufwa. ⁶⁷ Ayanjika ku mu lokudila mati ku mbunzu ni ku mu bula khomi ni mbata ni kakula ⁶⁸ etshi ayi Mesiya popa wutu leji nani wa ku bula. ⁶⁹ Petulu wakhedi wa shikama hanji mu muwangu musadi wa mukhetu wa mbuta dia anganga Nzambi weza penapena wa muleza etshi ayi epi wakhedi ni Yesu oyu wa ku Ngandidi. ⁷⁰ Kashi mweni walekidi mu mesu mathu oshu mambu ma wu kwakulanga kudi ami nia mejikidiku. ⁷¹ He waya ku kishu kia lupangu. Mwana kisalu mwekha wa mukhetu wa mumona waleza athu akhedi nawu etshi muthu oyu wakhedi ni Yesu wa Nazaleti. ⁷² Petulu watunini epi wazenga ndefi mweni wa mu leza etshi ni mwijiku muthu oyu. ⁷³ Kumanima ma mwa tangwa athu akhedi hohu ejidi penapena ni Petulu eni esthi ayi wudi mumoshi mu katshi keni kwakula kweyi kwenda kwa ku funda. ⁷⁴ He Petulu wa vutula etshi leka Nzambi anguhu ndola yivwa nia dihuna nia zenga etshi ni mwijiku. kaka tangwa mwenedina nzolu wa kokula. ⁷⁵ Petulu webuka ma mulejidi Yesu nzolu kaka kokula oku kadi ayi waka ngu beya mbala jisatu etshi wu ngwijiku. Wa wudikidi waya ni kudila kia ngolu.