¹ Yesu wa wudikidi mu nzu ya Nzambi waya. Alonguki jeindji endidi ku mu laba mu ku muleza atadi khia pila atungidi nzu ya Nzambi. ² Kashi mweni wa wa vutididi etshi Nwa yimweniku yima eyi yoshu. Kiedika ni ku nu lezanga kwa sala oku ata yala dimoshi a wulu dia dikowu dia ka leka kubwa. ³ Wendidi kushikama ha mondonda wa Olive alonguki a mu laba mu kwenda ku muhula etshi Tuleji tangwa eki mambu menama ma ka hangama. Yidimbu ekhi ya ka lombulula kwiza kweyi ni mambu ma twa kejikila tshuka ya thothu. ⁴ Yesu wa wa vutudidi etshi Kebenu muthu ka nuhuna oku. ⁵ Kikuma athu lawu akeza mu jina dia memi ni kwakulanga etshi Ami nidi khidishitu a ka bidisa athu lawu ndjila. ⁶ Nwa kevwa a yandjika kwakudila ndjita muma mwoshu nu di yangisa oku kikuma mambu menamana mafeti kubwa kashi keshiku kadi tshuka ya mambu. ⁷ Kikuma Thothu ya kabula kunwana ni thothu yikowu yifumu ya ka bula kunwana ni yifumu yekha. Nzala ya kengila mavu ma kabula kunikana muma mwosu. ⁸ Kashi yoshu eyina ya kakhala luyandjiku lwa pashi mudi ndambi jia kuteta. ⁹ Tangwa mwendina a ka bula ku nu mwenisa pashi ni ku nu jiya. Makanda moshu ma hashi ma ka nu menga kikuma kia jina dia memi. ¹⁰ Athu lawu a ka bwisa lukwikilu lwowu. Eni a ka bula kusumbisa akowu ni ku beyanganga owumweni. ¹¹ A mbikudi a luvunu lawu akeza mu kuhuna athu. ¹² Kia kela kubola kwa hitangana zola dia athu lawu dia kahwa. ¹³ Kashi koshu wa ka kasa mutshima tii ku tsuka wa ka huluka. ¹⁴ Tsangu mweneyi ya mboti ya kifumu kia Nzambi a ka yi longa mu kifutshi kioshu mu kuhana kithemu kudi yikanda yoshu. Kumanima he tsuka ya mambu moshu. ¹⁵ Kienikioki Ki nwa kela nwa mona kubola kwa hitangana mudi kiakudidi mbikudi Daniela kwendila mu nzu ya Nzambi Leka koshu watanga mambu ama a bakisi ¹⁶ etshi Oshu a kakhala ku Zude a katshina mu mindonda ¹⁷ oyu wa kakhala ha yangi kengila oku epi mu nzu mu kunona koshu kima kia sala ¹⁸ Oyu wa kakhala mutemu ka vutuka oku epi ku nzu endji mu kunona kazaku kendji. ¹⁹ Khenda jingi kudi akhetu emita ni awana a ka bula kwamusa ana mu yilumbu yeneyina. ²⁰ Lombenu Nzambi etshi kilumbu kienu kia kutshina kibwa oku mu kisiwu to mu kilumbu kia lumingu. ²¹ Kikuma Kumekama kwa ngolu kwa kakhala ku nwa konda kadi kumona yandjika tunda tii lelu etshi epi kwa kakhala oku. ²² Yilumbu mwene yina nga yi kehishidiku ata muthu mumoshi kambidiku ku huluka kashi kikuma kia awana a sodiwa yilumbu mweneyina ya kakhala ya kutanga. ²³ He yivwa muthu wa nu leza etshi Talenu khidishitu wudi haha to wudi okuna nu mu kwikila oku. ²⁴ Kikuma a khidishitu a makusu ni a mbikudi a wukhubidi akeza ni kuhanga yipedikisa ya ka bula kuyitukisa athu mu ku bidisa awana a sodiwa. ²⁵ Talenu Ami nia thethikila ku nu leza namu. ²⁶ Yivwa a nu leza etshi Talenu khidishitu wudi mutemu nwenda oku to wudi ku suku nu kwikila oku. ²⁷ Kikuma mudi kioki kienda kubwa nzazi kukedia katuka kwenda kuwudikla tangwa tii koku dienda kujioka kwiza kwa mwana muthu ki kia kakhala kioki. ²⁸ Hoshu hedi mbiji ya vunda henihohu henda kukhala tubukubuku. ²⁹ Kia kela yilumbu ya pashi mwenejina ya hita tangwa dia kekhina pipa ngonda ka kamwekana oku epi tutumbwa twa kabwa hashi ngolu jioshu jia ku wulu jia ka nikana. ³⁰ He kwa ka mwekana yidimbu ya mwana muthu kuwulu yikanda yoshu ya hashi ya ka bula ku nienganana. Eni a ka mona mwana muthu wa katukila ku wulu ni kwiza mu matuta ni ngolu ni lukumu lwoshu. ³¹ Kia kela ashika moondu wa katuma a wandjio jiendji mu kuwongika athu jiendji asodiwa mu thothu yoshu. ³² Nonenu mulongi wa mutondu wa ma figi. Yivwa mathayi mandandumuka mayiji mamena ejikenu etshi mvula ya tuluka. ³³ Kitezu kimoshi kidi etshi nwa mona mambu menama moshu nu feti kwijika etshi wudi ha belabela ha kishu kadi. ³⁴ Mu kiedika ni kwakulanga mbandu eyi ya kahita oku tii koku mambu ama ma kabwa. ³⁵ Wulu ni mavu dia kahita kashi ndaka jiemi jia kahita oku lo. ³⁶ Kashi mu kutala kilumbu mwenekina ni tangwa mwenedina ata mutu mumoshi kejiku a wandjio edi ku wulu lo mwana lo kashi Tata kasu. ³⁷ Mudi mu tangwa dia Nowa kienikioki epi kia kakhala kwiza kwa mwana muthu. ³⁸ Kikuma mudi mu yilumbu ya lekidi kadi kunoka kihunga athu akhedi kudia ni kunwa ni kukwelangana kowu ni kukwedisa ana jiowu akhetu ni amala tii kilumbu kiengididi Nowa mu masuwa. ³⁹ Eni kejikanga ata kima kimoshi tii kooku kwa nokinini kihunga kia wa hungumuna. Kienikioki kia kakhala kwiza kwa mwana muthu. ⁴⁰ He Amala mbadi a kakhala mu kilanga mumoshi wa ka noniwa mwekha a ka mushisa. ⁴¹ Akhetu mbadi a kakhala ha yanda ni kutwa mumoshi wa kanoniwa mwekha a ka mushisa. ⁴² Sungulukenu kikuma nwijiku kilumbu eki Fumu enu akeza kumwekana. ⁴³ Kashi ejikenu etshi Mukwa nzu ejika tangwa dia keza mwiji wu kukhala sungulu sungulu mu kuleka kwingisa mwiji mu nzu a kabi. ⁴⁴ Kinikioki enu epi nu feti kukhala nwa hangama kikuma mwana muthu wa keza mu tangwa di nwa kaleka kwijiya. ⁴⁵ Nani wudi musadi wa mboti ni wa mayela fumu endji a mushi mu nzu endji mu kuwa hwanga yima ya kudia mu tangwa dia pimbu. ⁴⁶ Kieshi ki kukhala kudi musadi oyu yivwa fumu endji weza ku mu wana wenda wa hanga kienekina. ⁴⁷ Kiedika ni ku nu lezanga etshi Fumu wu muhwa kiyeka kia yima yendji yoshu. ⁴⁸ Kashi yivwa musadi wa bola wakula etshi Fumu wemi ka kuswakala oku kwiza ⁴⁹ wa yandjika kubula asadi ekha ni kudia ni kunwa ni azedia maluvu ⁵⁰ fumu endji wa keza kia ka bula kuleka kumakinina mweni ni tangwa dia kaleka kwijiya. ⁵¹ Fumu endji wa muhwa ndola ya kola wa ka muma mu boloku mwenda kushia athu a bola kwenokuna wa ka bula kudila ni kudisuma mazewu.